រាជធានីភ្នំពេញ ៖ អង្គការអន្តរជាតិខាងការងារវាយតម្លៃថា វិស័យកាត់ដេរនឹងអាចបាត់បង់ការងាររហូតដល់ ៧០% នៅរយៈពេល១០ ឆ្នាំទៀតបើសិនមិនមានគោលនយោបាយច្បាស់លាស់នោះ ។ លោក អាត់…
រាជធានីភ្នំពេញ ៖ អង្គការអន្តរជាតិខាងការងារវាយតម្លៃថា វិស័យកាត់ដេរនឹងអាចបាត់បង់ការងាររហូតដល់ ៧០% នៅរយៈពេល១០ ឆ្នាំទៀតបើសិនមិនមានគោលនយោបាយច្បាស់លាស់នោះ ។ លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាបានឱ្យដឹងថា បើតាមការប្រមើលមើលរបស់អង្គការ ILO កាលពីឆ្នាំ ២០១៩ បញ្ជាក់ថា បើសិនកម្ពុជាមិនមានគោលនយោបាយច្បាស់លាស់សម្រាប់វិស័យកាត់ដេរនោះទេ កម្លាំងពលកម្មនៅក្នុងវិស័យនេះ នឹងអាចបាត់បង់ការងារពី ៦០% ទៅ ៧០% ក្នុងរយៈពេល ១០ ឆ្នាំខាងមុខ ដោយសារតែបដិវដ្តន៍ឧស្សាហកម្ម ៤.០ ។ ឧស្សាហកម្មបច្ចេកវិទ្យាថ្មីនេះ តម្រូវឱ្យការវិវត្តធនធានមនុស្សដើរស្របគ្នា ។ ជាងនេះទៅទៀតការធ្វើទំនើបកម្មនិងការអភិវឌ្ឍ ទំនាក់ទំនងពាណិជ្ជកម្មផ្សេងទៀតត្រូវធ្វើឱ្យស្របគ្នាផងដែរ ។
«ខ្ញុំគិតថា បើសិនកម្ពុជាមានការអភិវឌ្ឍន៍វិស័យកាត់ដេរដោយមានផែនការយុទ្ធសាស្ត្រច្បាស់លាស់ កម្ពុជាអាចនឹងរក្សាបាននូវស្ថិរភាពនាំចេញ និងការធ្វើពាណិជ្ជកម្មនៅក្នុងវិស័យកាត់ដេរនេះបាន ។ ថ្ងៃអនាគតកម្ពុជាអាចផលិតសម្លៀកបំពាក់ឬម៉ូដវិញដូចជានៅហុងកុងនិងប្រទេសកូរ៉េ ដែលកាលពីមុនគេជាអ្នកដេរ តែមកដល់ឥលូវនេះគេក្លាយជាអ្នកឌីហ្សាញ និងចេញម៉ូដសម្លៀកបំពាក់វិញ» នេះជាការបញ្ជាក់របស់លោក អាត់ ធន់ ។
លោកបណ្ឌិត ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុថ្មីៗនេះបានលើកឡើងថា វិស័យកាត់ដេរជាវិស័យសំខាន់មួយនៅក្នុងការជំរុញកំណើនសេដ្ឋកិច្ចជាតិ ។ អ្វីដែលជាចំណុចល្អរបស់កម្ពុជានាពេលនេះ គឺកម្មករកម្មការិនី បានចាក់វ៉ាកសាំងស្ទើរទាំងអស់ ខុសពីប្រទេសមួយចំនួនដែលមានការប្រឈម និងមិនទាន់បានគ្រប់គ្រងបានល្អ ។ លោកបានបញ្ជាក់ថា «ដូចនេះការបញ្ជាទិញបានបង្វិលមកប្រទេសកម្ពុជាយើង ជាហេតុធ្វើឱ្យវិស័យមួយនេះងើបឡើងលឿននៅរយៈពេលចុងក្រោយនេះ ហើយជាទិសដៅទៅមុខសម្រាប់ឆ្នាំ ២០២២ វិស័យកាត់ដេរនេះនូវមានស្ថានភាពល្អប្រសើរទាំងរួមទាំងការបញ្ជាទិញ» ។
មន្ត្រីជាន់ខ្ពស់បានបញ្ជាក់ថា រាជរដ្ឋាភិបាលបានកំពុងបានរៀបចំយុទ្ធសាស្ត្រ ឬក្របខណ្ឌគោលនយោបាយពិតប្រាកដមួយសម្រាប់ជំរុញវិស័យ ដែលយុទ្ធសាស្ត្រនោះនឹង នឹងដាក់ចេញក្នុងពេលឆាប់ៗ ។
ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈធ្លាប់បានលើកឡើងថា កម្ពុជាបានបន្តដំឡើងប្រាក់ឈ្នួលអប្បបរមាពីរឆ្នាំជាប់គ្នានៅក្នុងឆ្នាំ ២០២០ និងឆ្នាំ ២០២១ ខណៈប្រទេសក្នុងតំបន់ និងប្រទេសប្រកួតប្រជែងជាមួយកម្ពុជាបានពន្យារពេល ឬមិនបានផ្តល់ឱកាសឱ្យមានការជជែកចរចាប្រាក់ឈ្នួលអប្បបរមានោះឡើយ នៅក្នុងអំឡុងពេលរីករាលដាលនៃជំងឺកូវីដ-១៩ ។ ការដំឡើងនេះ បានបង្ហាញអំពីការយកចិត្តទុកដាក់របស់រាជរដ្ឋាភិបាលក្នុងការធានា និងរក្សាស្ថិតភាពជីវភាពរបស់កម្មករនិយោជិត ដោយឈរលើអភិក្រមនៃការវាយតម្លៃ តុល្យភាពរវាងផលប៉ះពាល់ជាអវិជ្ជមាន ដល់សង្គម-សេដ្ឋកិច្ច និងការងារ ទៅនឹងនិរន្តរភាពនៃរោងចក្រ សហគ្រាស និងការការពារប្រាក់ចំណូលរបស់កម្មករនិយោជិត និងគ្រួសារ ដែលស្របតាមអនុសាសន៍របស់អង្គការអន្តរជាតិខាងការងារ ILO ៕
ចែករំលែកព័តមាននេះ