រឿងរ៉ាវនឹកស្មានមិនដែលមហាជនសម្តែងនូវក្តីអាណិតអាសូរលើបុរសមួយរូប ដែលជួបទុក្ខសោកផ្ទួនៗ គឺភរិយាជាទីស្រលាញ់បានលាចាកលោកទៅ ខណៈកូនឈឺដេកពេទ្យ ស្រាប់តែដំបូលដែលធ្លាប់ជ្រក
ខេត្តកំពត ៖ រឿងរ៉ាវនឹកស្មានមិនដែលមហាជនសម្តែងនូវក្តីអាណិតអាសូរលើបុរសមួយរូប ដែលជួបទុក្ខសោកផ្ទួនៗ គឺភរិយាជាទីស្រលាញ់បានលាចាកលោកទៅ ខណៈកូនឈឺដេកពេទ្យ ស្រាប់តែដំបូលដែលធ្លាប់ជ្រកត្រូវខាងសាច់ថ្លៃកំទេចចោលទៀត ។
រឿងគួរឱ្យអនិច្ចារនេះ គឺកើតមាននៅក្នុងរង្វង់គ្រួសារមួយ ដែលមានបងប្អូនបង្កើតប្រុសស្រីចំនួន៨នាក់ ក្នុងនោះមានប្រុស២នាក់ និងស្រី៦នាក់ ហើយបន្ទាប់ពីឪពុកម្តាយបានស្លា.ប់ចោលអស់ បងប្អូនទាំង៨នាក់គឺបានរស់នៅជាមួយគ្នា មើលថែគ្នា ដូចជាកាលអ្នកមានគុណទាំងទ្វេរស់នៅជាមួយអ៊ីចឹងដែរ។ បងប្អូនទាំង៨នាក់ខាងលើនេះ គឺមាន បងស្រីទី១-ឈ្មោះស្រី ម៉ាច ទី២-ឈ្មោះស្រី បុប្ផា ទី៣-ឈ្មោះស្រី ចាន់ត្រា (ប្រុស) ទី៤- ឈ្មោះស្រី ក្លឹង ទី៥-ឈ្មោះ ស្រី ចន្ធូ ទី៦-ឈ្មោះ ស្រី សុខលី ទី៧-ឈ្មោះស្រី លីនណា (ម្ចាស់ផ្ទះដែលស្លា.ប់) និងទី៨- ឈ្មោះ ស្រី សាវរ៉ា (ប្អូនប្រុសពៅ) ។
តាមប្រភពពីប្អូនប្រុសពៅក្នុងគ្រួសារឈ្មោះ ស្រី សាវរ៉ា បានប្រាប់អ្នកយកព័ត៌មានឱ្យដឹងថា ក្រោយពីឪពុកម្តាយបានស្លា.ប់ទៅ បងប្អូនខ្លួនទាំងអស់បានរស់នៅក្នុងផ្ទះជុំគ្នា ដោយបងៗមើលថែគ្រប់គ្រងប្អូនៗដូចជា ឪពុកម្តាយរស់នៅអ៊ីចឹងដែរ។ លុះពេលធ្វើការរកស៊ីយូរៗទៅ បងស្រីឈ្មោះស្រី ក្លឹង បានទិញដីធ្វើផ្ទះមួយខ្នង ប្រគល់ឲ្យទៅបងស្រីឈ្មោះស្រី លីនណា រីឯរូបគាត់ (ប្អូនប្រុសពៅ) ក៏ត្រូវបងប្អូនរួមគ្នាទិញដីសង់ផ្ទះមួយខ្នងឲ្យដែរ។
ប្អូនប្រុសពៅខាងលើបានរៀបរាប់បន្តថា ក្រោយពីបងស្រីធ្វើផ្ទះជាអំណោយប្រគល់ជូនបងស្រីលីនណាហើយ បងស្រីនណា ក៏បានរៀបការ ហើយនាំប្តីប្រពន្ធគាត់មករស់នៅលើផ្ទះដែលបងប្រគល់ឲ្យនេះ ។ ក្រោយពេលបងស្រី លីនណា រស់នៅបានជិត៣ឆ្នាំ គាត់ក៏បង្កើតបានកូនស្រីម្នាក់ លុះដល់ឆ្នាំ២០២១នេះ ក្នុងកំឡុងពេល២ខែមុននេះ បងស្រី លីនណា គាត់បានប្រសូតកូនប្រុសម្នាក់ទៀត ។ ប្អូនប្រុសពៅបន្តថា ប៉ុន្តែក្រោយការប្រសូតកូនប្រុសម្នាក់នេះហើយ ជាអកុសល បងស្រីលីនណា ក៏បានស្លា.ប់ចោលកូនប្រុសដែលទើបនឹងកើតនោះតែម្តង ជាហេតុធ្វើឲ្យបងថ្លៃប្រុសរបស់ខ្លួនឈ្មោះ ជួន ណារិទ្ធ (ជាប្តីរបស់បងស្រីលីនណា) មានទុក្ខជាទម្ងន់ ដោយសារគ្រោះអកុសលនេះ ។
ប៉ុន្តែទុក្ខសោកមិនទាន់ធូរស្រាលក្នុងបន្ទុកគ្រួសារផង ក៏ត្រូវបានបងស្រីបង្កើតរបស់ខ្ញុំឈ្មោះស្រីចន្ធូ (បងស្រីម្នាក់ក្នុងចំណោមបងប្អូនទាំង៨នាក់) បានមកទាមទារយកដីដែលបងថ្លៃខ្ញុំសង់ផ្ទះរស់នៅជាមួយខ្មោចប្រពន្ធគាត់ ដែលត្រូវជាបងស្រីខ្ញុំទើបនឹងស្លា.ប់បានពីរខែនោះវិញ ជាមួយបងស្រីខ្ញុំម្នាក់ទៀតឈ្មោះស្រីក្លឹង (បងស្រីម្នាក់ទៀតក្នុងចំណោមបងប្អូនទាំង៨នាក់) ក៏បានមកទាមទារដីនេះដែរ ដោយដេញបងថ្លៃប្រុសដែលរស់នៅលើផ្ទះនេះចេញ ដើម្បីឱ្យពួកគាត់ទាំងពីរនាក់យកដីដែលពួកគាត់ប្រគល់ឲ្យទៅប្អូនស្រីដែលស្លា.ប់នោះមកវិញ។
ពាក់ព័ន្ធក្នុងករណីដែលទាមទារយកដីពីសំណាក់បងស្រីទាំងពីរខាងលើនេះដែរ គេឃើញអ្នកទាំងពីរនាក់បានមកដាក់ពាក្យប្តឺងទៅអាជ្ញាធរឲ្យជួយដោះស្រាយដែរ តែបើតាមអាជ្ញាធរឃុំ លោកប្រាក់ សាមឿន មេឃុំស្ទឹងកែវ បានឲ្យដឹងថា រឿងទំនាស់ដីធ្លីផ្ទះសម្បែងរបស់ក្រុមគ្រួសារនេះ គឺកើតឡើងជាយូរមកហើយ ហើយគេឃើញបងស្រីៗទាំងពីរនាក់នេះក៏ បានដាក់ពាក្យប្តឹងឲ្យស្រុក និងខេត្តជួយដោះស្រាយ ។ ប៉ុន្តែកន្លងមកស្រុកនិងខេត្ត ក៏បានបង្វែរសំណុំរឿងនេះឲ្យឃុំជួយដោះស្រាយ និងធ្វើការសម្របសម្រួលវិញ។
លោកមេឃុំស្ទឹងកែវ បានបន្តទៀតថា ៖ លោកក៏បានចុះមកធ្វើការសម្របសម្រួល ៣ លើករួចមកហើយ តែភាគីដើមបណ្តឹងនៅតែមិនព្រមទទួលយកការសម្របសម្រួលឡើយ លុះរហូតដល់ថ្ងៃទី១៤ ខែធ្នូ ឆ្នាំ២០២១ នេះ វេលាម៉ោង១០និង៣០នាទីព្រឹកនេះ ភាគីដើមបណ្តឹងក៏បានធ្វើសកម្មភាពរំលោ.ភវាយកម្ទេចផ្ទះរបស់ខ្មោចប្អូនស្រីឈ្មោះស្រី លីនណា ស្ថិតក្នុងភូមិអន្លុងម៉ាក់ប្រាង្គ ឃុំស្ទឹងកែវ ស្រុកទឹកឈូ ខេត្តកំពត ខណៈពេលបុរស ជាសាច់ថ្លៃ (ជាប្តីរបស់ស្ត្រីជាប្អូនដែលបានស្លា.ប់) កំពុងតែរស់នៅមើលថែកូនប្រុសតូចទើបតែអាយុបាន២ខែ ខណៈកូនបងម្នាក់ទៀតកំពុងឈឺដេកពេទ្យ ។
ជុំវិញការវាយកំទេចផ្ទះប្អូនថ្លៃដែលប្រពន្ធទើបនឹងស្លា.ប់អស់មួយល្វែងខាងក្រោយនេះ លោកមេប៉ុស្តិ៍រដ្ឋបាលឃុំស្ទឹងកែវ បានរាយការទៅអធិការនគរបាលស្រុកទឹកឈូ ដើម្បីសុំជួយអន្តរាគមណ៍លើករណីនេះ តែត្រូវបានលោកអធិការនគរបាលស្រុកបានប្រាប់មកប៉ុស្តិ៍វិញថា លោកកំពុងជាប់ប្រជុំ ចាំព្រឹកថ្ងៃទី១៥ ធ្នូ លោកនឹងចុះទៅដល់កន្លែងកើតហេតុ។
ពាក់ព័ន្ធនឹងបញ្ហាខាងលើនេះ មហាជនក៏ដូចជាបងប្អូនក្នុងក្រុមគ្រួសារអ្នកដែលកំពុងរំលោ.ភបំពានលើអចលទ្រព្យបងប្អូនយ៉ាងកំរោល ដោយមិនស្តាប់អាជ្ញាធរធ្វើការសម្របសម្រួលនេះ គេចាំមើលថា តើសមត្ថកិច្ចនឹងចាត់វិធានការ ដើម្បីផ្តល់ភាពយុត្តិធម៌ដល់ជនរងគ្រោះយ៉ាងណាដែរ?៕
ចែករំលែកព័តមាននេះ