រាជធានីភ្នំពេញ ៖ សហគមន៍កសិកម្មតាសីសាមគ្គី បានអនុវត្តផលិតកម្មកសិកម្មតាមកិច្ចសន្យា បច្ចុប្បន្នអាចផលិតបន្លែបានជាង ៣ តោនក្នុងមួយថ្ងៃ ។ កសិកម្មកិច្ចសន្យាជាផ្លូវសំខាន់មួយធ្វើឱ្យកសិករដែលជាអ្នកដាំបន្លែមានទំនុកចិត្តក្នុងការផលិតបន្លែនិងផ្លែ ។…
រាជធានីភ្នំពេញ ៖ សហគមន៍កសិកម្មតាសីសាមគ្គី បានអនុវត្តផលិតកម្មកសិកម្មតាមកិច្ចសន្យា បច្ចុប្បន្នអាចផលិតបន្លែបានជាង ៣ តោនក្នុងមួយថ្ងៃ ។ កសិកម្មកិច្ចសន្យាជាផ្លូវសំខាន់មួយធ្វើឱ្យកសិករដែលជាអ្នកដាំបន្លែមានទំនុកចិត្តក្នុងការផលិតបន្លែនិងផ្លែ ។
លោក ណុប នុន ប្រធានក្រុមប្រឹក្សាភិបាលនៃសហគមន៍កសិកម្ម តាសីសាមគ្គី បានឱ្យដឹងថា ផលិតកម្មសិកម្មតាមកិច្ចសន្យានេះមានសារសំខាន់ ជាផ្លូវមួយធ្វើឱ្យកសិករមានទំនុកចិត្តក្នុងការផលិតបន្លែ ឬផ្លែឈើ ។ សហគមន៍កសិកម្មតាសីសាមគ្គី ទទួលការគាំទ្រហិរញ្ញប្បទានពីធនាគារអភិវឌ្ឍន៍ជនបទ និងកសិកម្មចំនួន ៣៧ ម៉ឺនដុល្លារ និង ១០ ម៉ឺនដុលា្លរពីគម្រោងជំរុញទីផ្សារសម្រាប់កសិកម្មខ្នាតតូច (AIMS) ។ តាមរយៈហិរញ្ញប្ប ទាននេះ សហគមន៍បានពង្រីកអាជីវកម្ម កសាងការិយាល័យ ឃ្លាំងស្តុកបន្លែ រថយន្តបំពាក់ដោយទូរត្រជាក់ និងសម្ភារមួយចំនួនទៀតសម្រាប់អនុវត្តការងារ និងពង្រីកអាជីវកម្ម ។
សហគមន៍មានគំនិតផ្តួចផ្តើមក្នុងការពង្រឹងមុខរបរដែលមានស្រាប់ និងបង្កើតមុខរបរថ្មី ដើម្បីបង្កើតឱកាសការងារ កាត់បន្ថយចំណាកស្រុក និងបង្កើនប្រាក់ចំណូលជូនដល់សមាជិក ។ ស្ថិតក្នុងស្ថានភាពនៃការរីករាលដាលនៃជំងឺឆ្លងកូវីដ-១៩ សហគមន៍នៅតែអាចបង្កើនចំនួនបញ្ជាទិញ និងការផ្គត់ផ្គង់បន្លែសុវត្ថិភាពទៅកាន់ទីផ្សារប្រមាណជាង ៧២០ តោន ក្នុងឆ្នាំ២០២១ ដែលចំនួននេះបានកើនឡើងរហូតដល់ទៅ ៤០% បើធៀបទៅនឹងឆ្នាំ ២០២០ និងបានផ្តល់ឱកាសការងារជូនដល់សមាជិកបានប្រមាណជាង ១៨០ គ្រួសារ និងទទួលបានប្រាក់ចំណូលជាមធ្យមប្រមាណ ៥០០ ដុល្លារអាមេរិកក្នុងខែ ។
លោក ណុប នុន គូសបញ្ជាក់ថា «ផលិតកម្មកសិកម្មតាមកិច្ចសន្យាអាចចៀសផុតពីហានិភ័យបានរហូតដល់ជាង ៩០% ។តែសម្រាប់កសិករជាទូទៅធ្វើការដាំដុះតែម្នាក់ឯង មិនបានចងក្រងជាក្រុមផលិតកសិកម្មតាមកិច្ចសន្យាការដាំដុះឡើយ ដែលធ្វើឲ្យទីផ្សារកសិផលរបស់ពួកគាត់ពេលប្រមូលផលម្តងៗ ម្តងលិចម្តងអណ្តែតៗ ។ កសិករតែងតែមិនដឹងមុនថា គាត់ត្រូវចំណេញប្រាក់ប៉ុន្មាន ។ តែសម្រាប់ការដាំដុះមានកិច្ចសន្យា នៅក្នុងសហគមន៍របស់ខ្ញុំយើងដឹងជាមុនពីទីផ្សារ ដូច្នេះពេលដាំដុះយើងមិនបារម្ភពីការលក់ឡើយ ។ បើយើងដាំស្ពៃក្នុងមួយផ្ទះសំណាញ់យើងដឹងថា ត្រូវចំណេញប្រាក់បានប៉ុន្មាននិងចំណាយថ្លៃដើមអស់ប៉ុន្មានបាត់ទៅហើយ» ។
បើតាមប្រធានក្រុមប្រឹក្សាភិបាលខាងលើ ការអនុវត្តផលិតកម្មកសិកម្មតាមកិច្ចសន្យាអាចចៀសផុតពីហានិភ័យបានរហូតដល់៩៩% ហើយហានិភ័យដែលកើតឡើង ១% នោះ គឺបង្កឡើងដោយភាពមិនប្រក្រតីនៃធាតុអាកាស ។ មកដល់បច្ចុប្បន្ននេះ សហគមន៍កសិកម្មតាសីសាមគ្គីក្នុងមួយថ្ងៃអាចផលិតបន្ថែបានពី ៣ តោនទៅ ៣,៥ តោន ។ បន្លែទាំងនោះបានបែងចែកជាប្រភេទបន្លែចំណាត់ថ្នាក់លេខមួយ សម្រាប់ហាង ផ្សារទំនើប, ចំណាត់ថ្នាក់លេខ ២ បន្លែលក់នៅតាមផ្សារធម្មតា និងចំណាត់ថ្នាក់បន្លែលេខ ៣ ជំរុញទៅលក់នៅតាមផ្សារលក់រាយ ៕
ចែករំលែកព័តមាននេះ