ភ្នំពេញ៖ យ៉ាងហោចណាស់ មានបុរសស្ត្រី ២នាក់ នៅខេត្តសៀមរាប និងនៅខេត្តព្រៃវែង ត្រូវបានតុលាការសាលាដំបូងរាជធានីភ្នំពេញ បានចេញដីកា បង្គាប់ឲ្យចូលបំភ្លឺ នៅព្រឹកថ្ងៃទី១៦…
ភ្នំពេញ៖ យ៉ាងហោចណាស់ មានបុរសស្ត្រី ២នាក់ នៅខេត្តសៀមរាប និងនៅខេត្តព្រៃវែង ត្រូវបានតុលាការសាលាដំបូងរាជធានីភ្នំពេញ បានចេញដីកា បង្គាប់ឲ្យចូលបំភ្លឺ នៅព្រឹកថ្ងៃទី១៦ ខែធ្នូ ឆ្នាំ២០២១ ពាក់ព័ន្ធនឹងការក្លែងបន្លំស្នាមមេដៃ បង្កើតគណបក្សបេះដូងជាតិ។ ដីកាកោះនោះ ចេញថ្ងៃទី៦ ខែធ្នូ ឆ្នាំ២០២១ ដោយលោក សេង ហៀង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ។ សំណុំរឿងក្តីនេះ ចុះថ្ងៃទី១ ខែធ្នូ ឆ្នាំ២០២១។
តាមដីកា បុរសស្ត្រី២នាក់ ដែលតុលាការកោះហៅឲ្យចូលបំភ្លឺនោះ មានស្ត្រីឈ្មោះ ស៊ីម ធាំ អាយុ ៦១ឆ្នាំ នៅភូមិត្រាវបាក់ ឃុំតាយ៉ែក ស្រុកសូទ្រនិគម ខេត្តសៀមរាប។ រីឯបុរស ឈ្មោះ ជា អ៊ាន អាយុ ៦២ឆ្នាំ នៅឃុំបន្ទាយចក្រី ស្រុកព្រះស្តេច ខេត្តព្រៃវែង។
អ្នកទាំង ២ ត្រូវបានគេអះអាងថា ជាអ្នកគាំទ្រគណបក្សបេះដូងជាតិ ដែលបានផ្តិតមេដៃ បង្កើតគណបក្សបេះដូងជាតិ។
សូមរម្លឹកថា កាលពីថ្ងៃទី៣ ខែមិថុនា ឆ្នាំ២០២១ លោក សៀម ភ្លុក តំណាងគណបក្សបេះដូងជាតិ បានដាក់លិខិត ស្នើសុំក្រសួងមហាផ្ទៃ ដើម្បីបង្កើតគណបក្សបេះដូងជាតិ។ នៅថ្ងៃទី២១ ខែមិថុនា ឆ្នាំ២០២១ សម្តេចក្រឡាហោម ស ខេង បានចេញលិខិត អនុញ្ញាតឱ្យបង្កើត “គណបក្សបេះដូងជាតិ”។
នៅថ្ងៃទី១៥ ខែកញ្ញា ឆ្នាំ២០២១ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានលិខិត ជម្រាបទៅលោក សៀម ភ្លុក តំណាងស្ថាបនិកគណបក្សបេះដូងជាតិ ដោយរម្លឹកជាលើកទីពីរ ចំពោះ “គណបក្សបេះដូងជាតិ” ដើម្បីឲ្យកែសម្រួលខ្លឹមសារ នៃលក្ខន្តិកៈគណបក្ស ដែលបានដាក់មកកាន់ក្រសួងមហាផ្ទៃ រួមទាំងបំពេញលក្ខខណ្ឌនានា ក្នុងការចុះបញ្ជីគណបក្ស ដោយស្របច្បាប់ នៅក្រសួងមហាផ្ទៃ។ ប៉ុន្តែគណបក្សនេះ មិនអនុវត្តតាមលិខិតជូនដំណឹងរបស់ក្រសួងមហាផ្ទៃ ឡើយ។
កាលពីថ្ងៃទី១៦ ខែវិច្ឆិកា ឆ្នាំ២០២១ សម្តេចក្រឡាហោម ស ខេង បានចេញលិខិត ជម្រាបជូនលោក សៀម ភ្លុក តំណាងស្ថាបនិកគណបក្សបេះដូងជាតិ ដោយក្រសួងមហាផ្ទៃ សម្រេចបដិសេធក្នុងការសុំចុះបញ្ជីរបស់គណបក្សបេះដូងជាតិ។ មូលហេតុ ក្រសួងមហាផ្ទៃ លើកឡើងថា ដោយសារតែការផ្តិតស្នាមមេដៃរបស់សមាជិកគណបក្សបេះដូងជាតិ ដើម្បីគាំទ្រក្នុងការសុំចុះបញ្ជីមានចេតនាទុច្ចរិត ដោយមានការផ្តិតស្នាមមេដៃជំនួស ការក្លែងបន្លំអត្តសញ្ញាណបុគ្គល និងការផ្តិតធ្វើឲ្យខូចគុណភាព ដើម្បីបង្កើនបរិមាណចំនួនសមាជិក ព្រមទាំងខ្លឹមសារប្រការមួយចំនួន នៃលក្ខន្តិកៈគណបក្សផ្ទុយនឹងបទប្បញ្ញត្តិ នៃច្បាប់ស្តីពីគណបក្សនយោបាយផងដែរ។
ចុងក្រោយនេះ ក្រសួងមហាផ្ទៃ បានសម្រេចប្តឹងតំណាងស្ថាបនិកគណបក្សបេះដូងជាតិ ទៅតុលាការ ដោយសារតែស្នាមដៃ ដែលផ្តិតក្នុងបែបបទចុះបញ្ជីគណបក្ស នៅក្រសួងមហាផ្ទៃ គឺមានភាពមិនប្រក្រតី។ អគ្គស្នងការនគរបាលជាតិ បានបើកការស៊ើបអង្កេតលើស្នាមមេដៃជិត ៥ពាន់ស្នាមមេដៃ ដែលភ្ជាប់ក្នុងសំណុំឯកសាររបស់គណបក្សបេះដូងជាតិ៕
ចែករំលែកព័តមាននេះ