រាជធានីភ្នំពេញ ៖ ជីវភាពបស់កម្មករ-កម្មការិនីនៅក្នុងវិស័យកាត់ដេរចាប់ផ្តើមល្អប្រសើរ ក្រោយពីជួបវិបត្តិកូវីដ ១៩ ។ ល្អប្រសើរ នៅពេលដែលប្រាក់ចំណូលទទួលបានពីការបំពេញការងារនៅក្នុងវិស័យមួយនេះអាចផ្គត់ផ្គង់គ្រួសារបានមួយចំណែកធំក្រោយពីការលំបាក ត្បិតអីពេលនេះ រោងចក្រជាច្រើនមានការងារច្រើន…
រាជធានីភ្នំពេញ ៖ ជីវភាពបស់កម្មករ-កម្មការិនីនៅក្នុងវិស័យកាត់ដេរចាប់ផ្តើមល្អប្រសើរ ក្រោយពីជួបវិបត្តិកូវីដ ១៩ ។ ល្អប្រសើរ នៅពេលដែលប្រាក់ចំណូលទទួលបានពីការបំពេញការងារនៅក្នុងវិស័យមួយនេះអាចផ្គត់ផ្គង់គ្រួសារបានមួយចំណែកធំក្រោយពីការលំបាក ត្បិតអីពេលនេះ រោងចក្រជាច្រើនមានការងារច្រើន តម្រូវឲ្យកម្មករធ្វើការថែមម៉ោងអាចរកប្រាក់ចំណូលបន្ថែម ។
កញ្ញា សុទ្ធ ជី កម្មការិនីធ្វើការនៅរោងចក្រផលិតស្បែកជើងមួយ ដែលមានទីទាំងនៅខេត្តតាកែវបានឱ្យដឹងថា បច្ចុប្បន្ននេះ ការងារសម្បូរច្រើនជាងពេលមុនធ្វើឲ្យកញ្ញាថែមម៉ោងជាង ១ ខែមកហើយ ។ «ពេលមានការងារធ្វើច្រើន និងបានថែមម៉ោងបានលុយច្រើន យើងមានអារម្មណ៍សប្បាយចិត្ត ព្រោះប្រាក់ចំណូលទទួលបានពីការងារមួយនេះបានផ្គត់ផ្គង់ដល់គ្រួសារបានគ្រាន់បើជាងនាពេលកន្លងមក» ។
កញ្ញា សុទ្ធ ជី បញ្ជាក់ថា ការងារបើធ្វើមិនគិតពីប្រាក់ថែមម៉ោងបានត្រឹមតែ ២០០ ដុល្លារអាមេរិក ប៉ុន្តែនៅពេលបានធ្វើការថែមម៉ោងអាចបើកប្រាក់បានជាង ២៦០ ដុល្លារអាមេរិកក្នុងមួយខែ ។ កញ្ញាបញ្ជាក់ថា កន្លងមកពេលមានការបិទ ឬភ្ជួរការងារក្នុងវិស័យកាត់ដេរមួយរយៈ ធ្វើឲ្យកម្មករជួបបញ្ហាលំបាកច្រើន នៅលើជីវភាពគ្រួសារ ។
កញ្ញា ឆាន់ ផល្លី សង្កេតឃើញថា ការងារមានភាពមមាញឹកតាំងពីខែតុលាហើយបានធ្វើការថែមម៉ោងបានជាង ១ ខែមកហើយបើគិតមកដល់ថ្ងៃនេះ ។ ពីមុនធ្វើការមិនបានថែមម៉ោងដល់ខែបើកបានលុយបានតិច តែលុះបានថែមម៉ោងបើកប្រាក់បានប្រមាណ ៣០០ ដុល្លារអាមេរិក ។
កញ្ញាបន្តថា «ប្រាក់ចំណូលបានមកពីការធ្វើការ និងការថែមម៉ោងក្នុងមួយខែកន្លងទៅនេះ វាជួយសម្រាលបន្ទុកនៅក្នុងគ្រួសារបានច្រើន ហើយយើងនៅសល់លុយខ្លះក្នុងដៃ ។ខ្ញុំក៏ដូចជាមិត្តភក្រ័ដទៃទៀតដែរ មានការសប្បាយចិត្ត និងចង់ធ្វើការថែមម៉ោង ព្រោះដល់ខែបើកបានលុយច្រើន» ។
បើតាមកញ្ញា ឆាន់ ផល្លី មកដល់សព្វថ្ងៃនេះកម្មករកម្មការិនីធ្វើការនៅក្នុងរោងចក្របានធ្វើការថែមម៉ោងប្រហែល ៨០% និងសំណូមពរដល់រាជរដ្ឋាភិបាលជួយឱ្យកម្មកកម្មការិនីមានការងារធ្វើបានទាំងអស់គ្នា ។
លោក រតនា សោភា អ្នកលក់បុកល្ហុង និងប្រហិតចៀននៅតាមមុខរោងចក្របានឱ្យដឹងថា ចាប់ពីកម្មករ-កម្មការិនីរោងចក្រមានការងារធ្វើរចេញនៅម៉ោង ៦ ល្ងាច លក់ដាច់បានគ្រាន់បើ តែបើកម្មករគាត់ចេញធ្វើការត្រឹមម៉ោង ៤ ល្ងាចទេ យើងលក់មិនសូវដាច់ឡើយ ។ «កន្លងមកនៅពេលកម្មករ-កម្មការិនី គាត់ចេញធ្វើការនៅម៉ោង ៤ ល្ងាច ក្នុងមួយថ្ងៃយើងលក់បានលុយ ១០ ឬ២០ ម៉ឺនរៀល ប៉ុន្តែដល់ពេលពួកគាត់មានការងារធ្វើច្រើននិងថែមម៉ោងជាប្រចាំយើងលក់ដាច់បានលុយច្រើនគ្រាន់បើជាងពេលមុនៗ ។ នៅក្នុងមួយថ្ងៃយើងលក់បុកល្ហុង និងប្រហិតចៀនអស់ ទទួលបានប្រាក់ចំណេញប្រមាណ ១០ ម៉ឺនរៀល តែបើថ្ងៃណាលក់មិនអស់ទេ យើងបានប្រាក់ប្រហែល៧ម៉ឺនរៀល ក្រៅពីកាត់ចំណាយថ្លៃដើមហើយ»។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ធ្លាប់បានឱ្យដឹងថា នៅពេលសព្វថ្ងៃនេះ កម្មករធ្វើការមានការថែមម៉ោងច្រើនមានរហូតដល់ ៧០% នៃក្រុមហ៊ុន ដោយសារតែការនាំចេញទៅសហរដ្ឋអាមេរិកនៅមានច្រើនដដែល ហើយទីផ្សារសម្លៀកបំពាក់នៅភូមានិងវៀតណាមបានប្តូរយកមកដេរនៅស្រុកខ្មែរច្រើន ។
លោកគូសបញ្ជាក់ថា «ក្នុងរយៈពេល ៣ ខែចុងក្រោយនេះមានឥវ៉ាន់ច្រើនមែនទែន ហើយខ្ញុំគិតថា ការផលិតអាចនិងឆ្លើយតបបានទៅតាមតម្រូវការ ដោយសារបញ្ហាជំងឺកូវីដ ១៩ នៅកម្ពុជាមិនមានភាពធ្ងន់ធ្ងរដូចកាលពេលមុន ។ លើសពីនេះការងារសម្រាប់យុវជនវ័យក្មេងរបស់យើងច្រើន ទោះបីមានក្រុមហ៊ុនបើកច្រើនកន្លែងក៏មិនខ្វះពលកម្មដែរ ។ ដូច្នេះខ្ញុំគិតថា ការផលិតនិងការនាំចេញអាចធ្វើទាន់សភាពការណ៍» ៕
ចែករំលែកព័តមាននេះ