រាជធានីភ្នំពេញ ៖ ការបិទសាសារៀននៅកម្ពុជាកំលុងពេលកូវីដ ១៩ រាតត្បាតត្រូវបានធនាគារពិភពលោក វាយតម្លៃថា បាននាំមកនូវការខាតបង់ធំធេងនៅទូទាំងប្រទេស និងបានកាត់បន្ថយប្រាក់ចំណូលរំពឹងទុកប្រចាំឆ្នាំរបស់ក្រុមជនក្រីក្រប្រមាណ ៧៣៨ ដុល្លារអាមេរិកនៅក្នុងមនុស្ស…
រាជធានីភ្នំពេញ ៖ ការបិទសាសារៀននៅកម្ពុជាកំលុងពេលកូវីដ ១៩ រាតត្បាតត្រូវបានធនាគារពិភពលោក វាយតម្លៃថា បាននាំមកនូវការខាតបង់ធំធេងនៅទូទាំងប្រទេស និងបានកាត់បន្ថយប្រាក់ចំណូលរំពឹងទុកប្រចាំឆ្នាំរបស់ក្រុមជនក្រីក្រប្រមាណ ៧៣៨ ដុល្លារអាមេរិកនៅក្នុងមនុស្ស ១ នាក់ថែមទៀតផង ។
ក្នុងរបាយការណ៍ថ្មីចុងក្រោយរបស់ធនាគារពិភពលោក មានចំណងជើងថា «រស់នៅជាមួយកូវីដ ១៩» ដែលបានចេញផ្សាយកាលពីថ្ងៃទី ៩ ខែធ្នូ ឆ្នាំ ២០២១ លើកឡើងថា ការបិទសាលារៀនបាននាំមកនូវការខាតបង់ធំធេងនៅទូទាំងប្រទេស ។ ក្រសួងអប់រំ យុវជន និងកីឡា បានខិតខំបង្កើតជម្រើសកម្មវិធីច្រើនយ៉ាងសម្រាប់ការរៀនពីចម្ងាយក៏ពិតមែន ប៉ុន្តែសិស្សមួយចំនួននៅតែមិនអាចប្រើប្រាស់វាបាន ឬ មិនបានប្រើប្រាស់វាសោះតែម្តង ។
«សិស្សណាដែលរៀនមិនបានជាប់លាប់ ឬដែលបោះបង់ចោលការសិក្សា នឹងមានលទ្ធភាពអាចរកបានចំណូលតិចតួចក្នុងមួយជីវិតរបស់ខ្លួន ខុសពីអ្នកដែលបានរៀនសូត្រគ្រប់គ្រាន់ ។ ការខាតបង់ការរៀនសូត្រដោយសារតែការបិទសាលារៀនក្នុងកំលុងពេលមានការរាតត្បាតជំងឺនេះ នឹងបង្កឱ្យមាននូវវិបាកធំធេងផ្នែកសេដ្ឋកិច្ច ដោយវានឹងកាត់បន្ថយប្រាក់ចំណូលរំពឹងទុកប្រចាំឆ្នាំរបស់ក្រុមជនក្រីក្រអស់ចំនួនប្រមាណជា ៧៣៨ ដុល្លារអាមេរិក សម្រាប់មនុស្សម្នាក់ នេះបើនិយាយក្នុងន័យធៀបអំពីលទ្ធភាពក្នុងការទិញសម្រាប់ពួកគេ”របាយការណ៍បន្ថែម ។
លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាយល់ឃើញថា
ពេលបិទខ្ទប់សង្កេតឃើញការបោះបង់ការរៀនសូត្រមានអត្រាខ្ពស់ជាងពេលធម្មតា ពិសេសក្រុមកុមាររៀននៅថ្នាក់ក្រោមបឋមសិក្សានៅតាមតំបន់ជនបទ ដោយសារតែពួកគាត់គ្មានលទ្ធភាពភ្ជាប់ជាមួយប្រព័ន្ធអ៊ិនធើណេត ឬប្រព័ន្ធអ៊ិនធើណេតទៅមិនដល់ ។
លោកបណ្ឌិតលើកឡើងថា បច្ចុប្បន្ននេះរាជរដ្ឋាភិបាលកម្ពុជាបានបង្កើតសាលាបណ្តុះបណ្តាលវិជ្ជាជីវៈមានចំនួនច្រើនដើម្បីជំរុញនិងលើកកម្ពស់ឱ្យកាន់តែខ្ពស់ដើម្បីក្រុមដែលបានបោះបង់ការសិក្សាពីថ្នាក់ក្រោមបឋម និងអនុវិទ្យាល័យនេះអាចនឹងមានលទ្ធភាពទទួលបានការបណ្តុះបណ្តាលនូវបំណិនជីវិតរបស់គាត់ដូចជាជំនាញបច្ចេកទេសសម្រាប់ជាឈ្នាន់នៅក្នុងការប្រកបរបរចិញ្ចឹមជីវិតនិងប្រាក់ចំណូលនាពេលអនាគត ។
លោក រស់ សុវាចា អ្នកនាំពាក្យ និងជាអគ្គលេខាធិការនៃក្រសួងអប់រំ យុវជន និងកីឡា បានឱ្យដឹងថា ការសិក្សានៅតែដំណើរការពេលកូវីដ ១៩ ពីព្រោះថា គ្រូបង្រៀនភាគច្រើនអាចប្រើប្រាស់ប្រព័ន្ធបច្ចេកវិទ្យាសម្រាប់បង្រៀនតាមអនឡាញមុន និងក្នុងបរិការណ៍កូវីដ ១៩ ។ ចំពោះគ្រូបង្រៀនដែលត្រូវការការបណ្តុះបណ្តាលបន្ថែមដើម្បីអាចប្រើប្រាស់ប្រព័ន្ធបច្ចេកវិទ្យាសម្រាប់បង្រៀនតាមបែបចម្រុះ រួមទាំងតាមអនឡាញ ក្រសួងបានបន្តផ្តល់ឱកាសពង្រឹងសម្ថតភាពតាមគ្រប់រូបភាព ។ «ក្នុងន័យនេះ ក្រសួងអប់រំបង្វែរបញ្ហាប្រឈម ឱ្យទៅជាឱកាសពង្រឹងគុណវុឌ្ឍិគ្រូបង្រៀន ដែលស្របតាមផែនការយុទ្ធសាស្ត្រវិស័យអប់រំ ២០១៩-២០២៣ ក្នុងគោលបំណងអភិវឌ្ឍន៍មូលធនមនុស្សសម្រាប់ចូលរួមប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់ក្នុងឆ្នាំ២០៣០ និងប្រទេសអភិវឌ្ឍន៍នៅឆ្នាំ ២០៥០» ។
ទោះយ៉ាងណារបាយការណ៍របស់ធនាគារពិភពលោកបានផ្តល់អនុសាសន៍ថា កម្ពុជាចាំបាច់ត្រូវវិនិយោគបន្ថែមលើធនធានមនុស្ស អមដោយការចាត់វិធានការឱ្យបានទាន់ពេលវេលាដើម្បីទប់ស្កាត់ការឈប់រៀន, ធ្វើការវាយតម្លៃការរៀនសូត្ររបស់សិស្ស និងអនុវត្តបច្ចេកទេសសម្រាប់ស្តារការរៀនឡើងវិញ ដើម្បីជួយឱ្យសិស្សអាចបំពេញបានមកវិញនូវអ្វីដែលគេខាតបង់ដោយសារការបិទសាលាកន្លងមក ៕
ចែករំលែកព័តមាននេះ