ADផ្ទាំងផ្សព្វផ្សាយពាណិជ្ជកម្ម

Picture

ចាក់​ដី​លុប​បិទ​ជិត​ប្រឡាយ ធ្វើ​ឲ្យទឹកលិចភូមិ ពលរដ្ឋ​ សុំ​ឱ្យ​អាជ្ញាធរ ​ជួយ!

2 ឆ្នាំ មុន
  • កណ្តាល

ខេត្តកណ្តាល​៖ អ្នក​ភូមិ​គគីរ​ធំ ឃុំ​គគីរ​ធំ ស្រុក​កៀនស្វាយ ដែល​កំពុង​ប្រឈម​មុខ​នឹងទឹកជំនន់​លិច​ភូមិ​ មិន​ហូរ​ទៅ​ណា​នោះ បាន​ប្រាប់អ្នក​សារព័ត៌មាន ​កាលពីព្រឹក​ថ្ងៃ​ទី​៨ ខែធ្នូ ឆ្នាំ​២០២១​ថា…

ខេត្តកណ្តាល​៖ អ្នក​ភូមិ​គគីរ​ធំ ឃុំ​គគីរ​ធំ ស្រុក​កៀនស្វាយ ដែល​កំពុង​ប្រឈម​មុខ​នឹងទឹកជំនន់​លិច​ភូមិ​ មិន​ហូរ​ទៅ​ណា​នោះ បាន​ប្រាប់អ្នក​សារព័ត៌មាន ​កាលពីព្រឹក​ថ្ងៃ​ទី​៨ ខែធ្នូ ឆ្នាំ​២០២១​ថា មូលហេតុ​ដែល​នាំ​ឱ្យ​មាន​ជំនន់​ទឹកភ្លៀង​លិច​ផ្លូវ លិច​ផ្ទះសម្បែង និង​លិច​ដំណាំ​របស់​ពួក​គាត់ ​បណ្តាល​ឱ្យ​ខូចខាត​នោះ គឺ​ដោយសារ​មាន​បុគ្គល​មួយ​ចំនួន ​ចាក់​ដី​លុប​បិទ​ជិត​ប្រឡាយ​រំដោះ​ទឹក​សាធារណៈ ហើយ​សាងសង់​សំណង់​រំលោភ​យក​ធ្វើ​ជា​កម្មសិទ្ធិ​ផ្ទាល់ខ្លួន​។

ប្រឡាយ​នេះ ​នៅ​ខាងក្រោយ​ភូមិ មាន​ទទឹង ៣​ម៉ែត្រ កន្លែង​ខ្លះ​ ៤​ ទៅ ​៥​ម៉ែត្រ និង​មាន​បណ្តោយជិត ​១​គីឡូម៉ែត្រ​។ ពី​ដើម ​ប្រឡាយ​នេះ ​មានជម្រៅ​ជ្រៅ​គួរសម និង​មាន​ផ្លូវ ​សម្រាប់​ដើរ ​និងផ្លូវ​រទេះគោ ​នៅ​សងខាង​ តាម​ខ្នង​ប្រឡាយ ហើយ​ក៏​មាន​សារៈសំខាន់​ខ្លាំង​ណាស់ សម្រាប់​ជា​ប្រព័ន្ធ​រំដោះ​ទឹក​ ដើម្បី​បញ្ចៀស​ជំនន់​ទឹកភ្លៀង ​កុំឱ្យ​ជន់​លិច​ភូមិ​គគីរ​ធំ​ទាំងមូល ដោយ​ហូរ​ចេញ​ទៅ​ទន្លេមេគង្គ​។         

ប៉ុន្តែ​ចាប់តាំងពី​គេ​ចាក់​ដី​លុប​ធ្វើ​របង​ថ្ម​បិទ​ជិត ​ប្រព័ន្ធ​រំដោះ​ទឹក​នេះ​មក ជំនន់​ទឹកភ្លៀង​បាន​ជន់​លិច​ ២ ​ទៅ​ ៣​ឆ្នាំ​បន្តបន្ទាប់​គ្នា គ្រាន់តែ​ឆ្នាំ​មុន​ៗ លិច​រាក់ តែ​ឆ្នាំ​នេះ ​លិច​ជ្រៅ ​ចាប់តាំងពី​ខែកញ្ញា​មក មាន​កន្លែង​ខ្លះ​លិច​ត្រឹម​ជង្គង់ និង​កន្លែង​ខ្លះ​ទៀត ​លិច​លើ​ចង្កេះ​ឯណោះ​។

អ្នក​ភូមិ​បាន​សម្តែង​ការ​ព្រួយបារម្ភ ​ព្រោះតែ​ប្រឈម​នឹង​៖ ១-​ទឹកធុំ​ក្លិនស្អុយ​សាយភាយ​បង្ក​ការ​ប៉ះពាល់​ដល់​សុខភាព ពិសេស​មនុស្ស​ចាស់​និង​ក្មេង​។ ២-​ខ្លាច​ក្មេង​តូច​ៗ​លង់ទឹក​ពេល​ឪពុក​ម្តាយ​ជាប់រវល់​ការងារ។ ៣-​ខ្លាច​ពស់មានពិស​ចូល​ផ្ទះ​ចឹក​មនុស្ស​ស្លាប់​។ ៤-​ខូចខាត​ដំណាំ ជួប​ការ​​លំបាក​ក្នុង​ជីវភាព​គ្រួសារ​។ ៥-​ពិបាក​ចិញ្ចឹម​សត្វពាហន​:​ផ្សេង​ៗ​។ 

ដូច្នេះ​ ពួក​គាត់​ស្នើ​សុំ​ឱ្យ​អាជ្ញាធរ​គ្រប់​ជាន់ថ្នាក់​មេត្តា​ជួយ​ដោះស្រាយ​បើក​ឱ្យ​មាន​ប្រឡាយ​រំដោះ​ទឹក​ដូច​ដើម​វិញ​ឱ្យ​បាន​ឆាប់រហ័ស ឆាប់​រីង​ទឹក ដើម្បី​ឱ្យ​ពួក​គាត់​ចាប់ផ្តើម​ប្រកប​មុខរបរ​លក់ដូរ​ឬ​បង្កបង្កើន​ផល​ចិញ្ចឹមជីវិត​។ ពិសេស ឆាប់​គោក​ផ្លូវលំ​ ក្នុងភូមិ​ងាយស្រួល​ឱ្យ​សិស្ស​ទៅ​រៀនសូត្រ និង​ព្រះសង្ឃ​និមន្ត​បិណ្ឌបាត ក៏​ដូច​ជា ​ពលរដ្ឋ​ទូទៅ​បាន​ធ្វើ​ដំណើរ​ផង​។

អ្នក​ភូមិ​និយាយ​ទៀត​ថា រឿង​អ្នក​រំលោភ​យក​ដី​ប្រឡាយ​នេះ គឺ​ពួក​គាត់​ធ្លាប់​បាន​ជម្រាប​ប្រាប់អាជ្ញាធរ​ភូមិ ឃុំ និង​ស្រុក ក្នុង​វេទិកាសាធារណៈ​នៅ​វត្ត​គគីរ​ធំ ហៅ​វត្ត​ចាស់ ជា​រឿយ​ៗ​រួច​មក​ហើយ​ដែរ តែ​ហាក់បីដូចជា​គ្មាន​ដំណោះស្រាយ​ឱ្យ​មាន​ប្រសិទ្ធភាព​សោះឡើយ​។                                              

ពាក់ព័ន្ធ​នឹង​បញ្ហា​នេះ លោក ចាន់ ធូ មេឃុំ​គគីរ​ធំ បាន​ប្រាប់​អ្នក​យក​ព័ត៌មាន​តាម​ទូរស័ព្ទ​ថា ពី​មុន​ដាក់​គ្រឿងចក្រ​ទៅ​ធ្វើ​ម្តង​ហើយ តែធ្លាក់​ភ្លៀង​ជាប់​គ្រឿងចក្រ​ធ្វើការ​មិនកើត ។ អាជ្ញា​ធរ​បាន​សម្របសម្រួល​ជាមួយ​អ្នក​ចាក់​ដី​ធ្វើ​របង​យក​ដី​ប្រឡាយ​ព្រមព្រៀង​គ្នា​អស់ហើយ ចាំតែ​ពេល​រាំងភ្លៀង​នឹង​ចុះ​ធ្វើ តែ​ប្រឡាយ​មិនបាន​តាម​ទំហំ​ប្រឡាយ​ដើម​ទេ ព្រោះ​យើង​លៃ​ទុក​ធ្វើ​ផ្លូវ​សងខាង​ប្រឡាយ​ផង​សម្រាប់​ពួក​គាត់​ធ្វើ​ដំណើរ​៕

អត្ថបទសរសេរ ដោយ

កែសម្រួលដោយ