រដ្ឋមន្ត្រីការពារជាតិថា តៃវ៉ាន់ទាំងមូលនឹងក្លាយជាសមរភូមិក្នុងជម្លោះជាមួយចិន
តៃវ៉ាន់ ៖ រដ្ឋមន្ត្រីការពារជាតិតៃវ៉ាន់ លោក Chiu Kuo-cheng បាននិយាយនៅថ្ងៃពុធ ទី8 ធ្នូ នេះថា ស្ថានភាពនៅច្រកសមុទ្រ
តៃវ៉ាន់ ៖ រដ្ឋមន្ត្រីការពារជាតិតៃវ៉ាន់ លោក Chiu Kuo-cheng បាននិយាយនៅថ្ងៃពុធ ទី8 ធ្នូ នេះថា ស្ថានភាពនៅច្រកសមុទ្រតៃវ៉ាន់ក្នុងពេលថ្មីៗនេះឡើងកម្តៅខ្លាំង ខណៈដែលយោធាចិននៅតែបន្តបង្កហេតុជុំវិញកោះតៃវ៉ាន់។
កាលពីថ្ងៃអង្គារ ទី៧ ធ្នូ ម្សិលមិញ កងទ័ពជើងទឹករបស់តៃវ៉ាន់បានធ្វើសមយុទ្ធនៅបណ្តោយឆ្នេរសមុទ្រភាគនិរតីនៃកោះតៃវ៉ាន់ ខណៈដែលកងទ័ពអាកាសបានធ្វើសមយុទ្ធរួមគ្នា។ នៅថ្ងៃដដែលនោះដែរ យន្តហោះចំនួន៦គ្រឿងរបស់ចិនបានហោះចូលតំបន់ការពារដែនអាកាសរបស់តៃវ៉ាន់។
ក្នុងអំឡុងកិច្ចប្រជុំថ្ងៃពុធនេះ រដ្ឋមន្ត្រីការពារជាតិតៃវ៉ាន់ មិនបានធ្វើអត្ថាធិប្បាយថាតើយន្តហោះយោធាចិនបានធ្វើប្រតិបត្តិការយ៉ាងណាទេ អំឡុងការហោះឈ្លានពានចូលដែនអាកាសរបស់តៃវ៉ាន់។ ប៉ុន្តែលោកបានបញ្ជាក់ថា ស្ថានភាពនៅច្រកសមុទ្រតៃវ៉ាន់កាន់តែតានតឹងឡើងៗ។
រដ្ឋមន្ត្រីការពារជាតិរូបនេះបានចង្អុលបង្ហាញថា ការញុះញង់របស់ចិនប្រឆាំងនឹងតៃវ៉ាន់ មិនថានៅដែនសមុទ្រ ឬដែនអាកាសទេ នឹងមិនបញ្ឈប់ឡើយ។ លោកថ្លែងទៀតថា យន្តហោះចិនតែងតែហោះចូលដែនអាកាសរបស់តៃវ៉ាន់ ទោះបីជានៅថ្ងៃធម្មតា គ្មានការធ្វើសមយុទ្ធក៏ដោយ។
លោកបានថ្លែងទៀតថា «សមរភូមិមាននៅគ្រប់ទីកន្លែង ហើយការហ្វឹកហ្វឺនតែងតែត្រូវបានអនុវត្តន៍ជាប់ជានិច្ច»។
លោកបន្តថា ស្ថានភាពធ្ងន់ធ្ងរនៅជុំវិញច្រកសមុទ្រតៃវ៉ាន់គឺច្បាស់ខ្លាំងណាស់សម្រាប់មនុស្សគ្រប់គ្នា។ នៅពេលប្រតិបត្តិការការពារជាតិចាប់ផ្តើមនៅលើកោះ Penghu និងកោះសំខាន់របស់តៃវ៉ាន់ ប្រជាជាតិទាំងមូលនឹងក្លាយជាសមរភូមិ។
សូមរម្លឹកថា មហាយក្សចិន តែងចាត់ទុកកោះតៃវ៉ាន់ជាផ្នែកមួយរបស់ខ្លួន និងប្រកាសរួបរួមជាមួយគ្នាវិញនៅពេលអនាគត។ ប៉ុន្តែមេដឹកនាំតៃវ៉ាន់ បានប្រកាសថានឹងធ្វើអ្វីៗគ្រប់យ៉ាងដើម្បីការពារទឹកដី និងប្រជាជន។
តៃវ៉ាន់ ដែលចាត់ទុកខ្លួនឯងជារដ្ឋឯករាជ្យ និងមានឈ្មោះផ្លូវការថាសាធារណៈរដ្ឋចិន បានផ្តាច់ចេញពីចិននៅក្នុងឆ្នាំ ១៩៤៩ ក្រោយពេលសង្គ្រាមស៊ីវិល៕ (យោងតាមប្រភព៖ Taiwan News)
ចែករំលែកព័តមាននេះ