រាជធានីភ្នំពេញ ៖ លោកម៉ានី ជាអ្នកបម្រើការងារនៅកន្លែងម៉ាស្សាមួយដែលទើបទ្វារទទួលស្វាគមន៍ភ្ញៀវឡើងវិញកាលពីប៉ុន្មានថ្ងៃនេះ ។ បុរសមានកូនពីររូបនេះ និយាយថា គាត់បានបាត់ចំណូលជាងមួយឆ្នាំ នៅក្នុងកំលុងពេលជំងឺកូវីដ ១៩…
រាជធានីភ្នំពេញ ៖ លោកម៉ានី ជាអ្នកបម្រើការងារនៅកន្លែងម៉ាស្សាមួយដែលទើបទ្វារទទួលស្វាគមន៍ភ្ញៀវឡើងវិញកាលពីប៉ុន្មានថ្ងៃនេះ ។ បុរសមានកូនពីររូបនេះ និយាយថា គាត់បានបាត់ចំណូលជាងមួយឆ្នាំ នៅក្នុងកំលុងពេលជំងឺកូវីដ ១៩ រាតត្បាត ។ ទើបតែនៅដើមខែធ្នូនេះថៅកែរបស់លោកបានហៅលោក និងក្រុមការងារមកបំពេញកិច្ចការវិញ ដែលធ្វើឲ្យពួកលោកមានការក្តីសប្បាយចិត្តត្បិតបានរងការលំបាក ស៊ីអត់ ស៊ីឃ្លាតច្រើនខែមកហើយ ។
បុរសដែលមានមាឌធំដំបងរូបនេះ ធ្វើការជាអ្នកបម្រើសេវាដល់ភ្ញៀវទូទៅដែលចូលទៅហាត់ប្រាណ និងម៉ាស្សានៅកន្លែងរបស់លោក ។ លោកបានរៀបរាប់ថា នៅពេលហាងបិទទ្វារ លោកបានត្រឡប់ទៅស្រុកកំណើតជួបជុំប្រពន្ធកូននៅខេត្តព្រៃវែង ដែលនៅទីនោះលោកគ្មានប្រភពចំណូលអ្វីសម្រាប់ចិញ្ចឹមជីវិតឡើយ គឺមួយថ្ងៃៗត្រូវដើរនេសាទត្រីដើម្បីហូបប៉ុណ្ណោះ ។
«ជិតមួយឆ្នាំមកនេះ ខ្ញុំបានបាត់បង់ការងារ បាត់ចំណូលដែលមានប្រាក់ខែ ១៥០ ដុល្លារ ។ ពេលមានប្រាក់ខែគ្រាន់បានផ្ញើឲ្យប្រពន្ធទិញទឹកដោះគោឲ្យកូន លុះដល់ពេលអត់ប្រាក់ខែ កូនឲ្យប៉ៅទឹកបបរជំនួសទឹកដោះគោវិញ» ។ បុរសខាងលើនិយាយបន្តថាក្រៅពីការបង្ខំចិត្តឲ្យកូនតូចអាយុជាង ៤ ខែបៅទឹកបបរជំនួសទឹកដោះគោហើយនោះ ការរស់នៅរបស់គ្រួសារលោកប្រចាំថ្ងៃក៍លំបាកដែរត្បិតអីគ្មានចំណូលអ្វីទាំងអស់ ។
ជាងមួយឆ្នាំមកនេះគ្រួសារលោករស់ទាំងលំបាក ពេលនៅស្រុកខ្ញុំដើរស្ទួយត្រី និងបាចបឹងចាប់ត្រី ។ ថ្ងៃណាបានត្រីច្រើនអាចលក់គ្រាន់បានទិញអង្ករ និងម្ហូប ប៉ុន្តែថ្ងៃដែលមិនបានសឹងរកហូបខ្លួនឯងសឹងមិនគ្រប់ ដូច្នេះការរស់នៅលំបាកណាស់ ។ ពេលគ្មានការងារគ្រួសារខ្ញុំបានខ្ចីលុយបងប្អូនចាយខ្លះ តែពេលនេះបានចូលធ្វើការវិញ អាចនឹងបានប្រាក់សង និងទុកសម្រាប់អាហាររបស់កូន ហើយ ។
កម្ពុជាបានរងការវាយប្រហារពីជំងឺកូវីដ ១៩ ចាប់ពីឆ្នាំ ២០២០ មក អាជីវកម្មលើសេវាកម្មទេសចរណ៍ និងកម្សាន្តបានរងផលប៉ះពាល់ខ្លាំងជាងគេ ក្នុងនោះមានអាជីវកម្មម៉ាស្សានេះមួយដែរ ។ អាជីវកម្មម៉ាស្សាដែលមនុស្សត្រូវប៉ះ និងមនុស្សជាប្រភេទការងារមានហានិភ័យខ្ពស់នៅក្នុងការចម្លងកូវីដ ១៩ ។ កន្លងមកធ្លាប់មានការលើកឡើងថានៅក្នុងបរិបទកូវីដ ១៩ មានវត្តមាននេះ អ្នកប្រកបការងារជាអ្នកម៉ាស្សាគួរផ្លាស់ប្តូរមុខរបរ ។
ទោះយ៉ាងណានៅពេលប្រកាសបើកប្រទេសឡើងវិញ អាជីវកម្មម៉ាស្សាក៍អាចនឹងបើកឲ្យដំណើរបានវិញដែរ ប្រសិនជាគេបានគោរពតាមវិធានការសុខាភិបាលនេះ បើតាមការ ជូនដំណឹងរបស់ក្រសួងទេសចរណ៍កាលពីថ្ងៃទី ៣០ វិច្ឆិកាកន្លងមកនេះ ៕
ចែករំលែកព័តមាននេះ