រាជធានីភ្នំពេញ ៖ ប្រធាសមាគមវារីវប្បករកម្ពុជា ក៏ដូចជាអ្នកចិញ្ចឹមត្រីក្នុងស្រុកផ្សេងទៀតមានការសប្បាយចិត្តនៅពេលដែលទទួលដំណឹងថា ភាគីចិន សម្រេចចិត្តធ្វើការសិក្សា និងធ្វើការវិភាគលើផ្លែមៀនប៉ៃលិន និងត្រីប្រាកម្ពុជា សម្រាប់ការនាំចូលផលិតផលកសិកម្មពីរប្រភេទប្រសិនជាគុណសមស្របដែលចិនអាចទទួលយកបាន ។
ជាមួយក្តីត្រេកអរ លោក សុខ រ៉ាដែន ប្រធាសមាគមវារីវប្បករកម្ពុជា បានឱ្យដឹងថា អ្នកចិញ្ចឹមត្រីទាំងអស់គ្នាត្រូវតែធ្វើម៉េចឱ្យផលិតផលរបស់ខ្លួនមានគុណស្របតាមស្តង់ដារប្រទេសចិន ព្រោះការនាំចេញត្រីត្រូវមើលទាំងភូតគាមអនាម័យ និងគុណភាព ។យើងសប្បាយចិត្ត ប៉ុន្តែត្រូវយកចិត្តទុកដាក់ខ្ពស់អនាម័យ និងគុណភាពនេះជាការដាស់តឿនឱ្យបងប្អូនវារីវប្បករយកចិត្តទុក ដាក់មួយកម្រិតទៀត មានន័យថា ចិញ្ចឹមត្រីឱ្យមានស្តង់ដារល្អ, ចិញ្ចឹមឱ្យមានអនាម័យល្អ, ចិញ្ចឹមប្រើចំណីល្អ ធ្វើឱ្យអ្នកបរទេសនាំទៅក្រៅបានមិនត្រឹមនាំចេញទៅប្រទេសចិននោះទេ ។
លោក Wang Wentian ឯកអគ្គរដ្ឋទូតចិនប្រចាំកម្ពុជា បានថ្លែងនៅក្នុងពិធីបើកសម្ពោធជាផ្លូវការ ផ្លូវជាតិលេខ ១១ ជាមួយប្រមុខដឹកនាំកម្ពុជានៅថ្ងៃទី ៦ ខែធ្នូ ឆ្នាំ ២០២១ ថា ចិន បានសម្រេចចិត្តធ្វើការសិក្សា និងវិភាគហានិភ័យលើផ្លែមៀន និងត្រីប្រា របស់កម្ពុជា តាមរយៈវិដេអូពីចម្ងាយដែលជាវិធានការសំខាន់មួយដើម្បីឆ្លើយតបតាមកិច្ចព្រមព្រៀងរវាងថ្នាក់ដឹកនាំប្រទេសទាំងពីរដែលបានធ្វើកាលពីពេលថ្មីៗនេះ ។ លោកទូតថា បើសិនការវិភាគនេះដំណើរការរលូនផ្លែមៀនរបស់កម្ពុជាអាចនាំចេញទៅប្រទេសចិនបាននៅពេលរដូវប្រមូលផលលើកក្រោយ រីឯត្រីប្រា វិញនឹងអាចនាំចេញទៅទីផ្សារប្រទេសចិន នាពេលដ៏ខ្លីខាងមុខនេះ ។
ដំណឹងនេះមិនត្រឹមធ្វើឲ្យសម្តេច ហ៊ុន សែន សម្តែងក្តីរីករាយនោះទេ អ្នកចិញ្ជឹមត្រី អ្នកដាំមៀនប៉ៃលិនបង្ហាញក្តីរីករាយពីការដែលមានទីផ្សារលក់ផលិតផល ។ ប្រធានសមាគមវារីវប្បករកម្ពុជា ដែលបច្ចុប្បន្នសមាគមមានសមាជិកជាង ៤០០ នាក់ និយាយថាភាគច្រើននៃសមាជិករបស់ខ្លួន ជាអ្នកចិញ្ចឹមត្រីប្រា ។ ការចិញ្ចឹមត្រីប្រាមកដល់សព្វថ្ងៃនេះមានការថយចុះដោយសារជួបវិបត្តិជំងឺកូវីដ តម្លៃដើមផលិតខ្ពស់ ចំណី និងកូនត្រីពូជនាំចូលមកពីបរទេស និងនៅពេលចិញ្ចឹមបានមិនសូវមានអ្នកមកទិញ ។
ជាមួយដំណឹងល្អពីទីផ្សារប្រទេសចិននេះ លោក សុខ រ៉ាដែន បានអំពាវនាវឱ្យខាងរាជរដ្ឋាភិបាលជួយដោះស្រាយប្រព័ន្ធហេដ្ឋារចនាសម្ព័ន្ធធារាសាស្ត្រ ។ លោកថា ប្រសិនភាគីចិនទិញយកទៅស្រុកគេកម្ពុជាត្រូវមានប្រព័ន្ធធារាសាស្ត្រទូលំទូលាយហើយល្អ ហើយតម្លៃប្រេងឥន្ទនៈ តម្លៃអគ្គិសនី និងហេដ្ឋារចនាសម្ព័ន្ធដឹកជញ្ជូនផ្សេងៗចូលទៅស្រះចិញ្ចឹមត្រីក៍ត្រូវតែល្អជាងបច្ចុប្បន្ន ។
លើសពីនេះប្រធានសមាគមបានអំពាវនាវឱ្យមានអ្នកវិនិយោគទុន បង្កើតរោងចក្រផលិចំណីត្រីនៅក្នុងស្រុក ។ លោក សុខ រ៉ាដែន លើកឡើងថា បើសិនយើងមិនអាចផលិតចំណីបានគ្រប់នោះទេ ដោយយើងរំពឹងការនាំចូលពីប្រទេសជិតខាង ខ្ញុំជឿថាការផលិតត្រីប្រានឹងមានការពិបាក ព្រោះថ្លៃដើមនឹងអាចឡើងថ្លៃធ្វើឱ្យពិបាកក្នុងការប្រកួតប្រជែង ៕
ចែករំលែកព័តមាននេះ