ភ្នំពេញ៖ បេសកកម្មអន្តរក្រសួង ដឹកនាំដោយលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានចុះពិនិត្យ…
ភ្នំពេញ៖ បេសកកម្មអន្តរក្រសួង ដឹកនាំដោយលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានចុះពិនិត្យ ស្រាវជ្រាវករណីទន្ទ្រាន ឈូសឆាយដីព្រៃលិចទឹក និងកាប់កាប់ដីខុសច្បាប់ បានរកឃើញថា យ៉ាងហោចណាស់ មានផ្ទៃដីព្រៃលិចទឹកជាង ២១១៩០ហិកតា នៅ ៦ខេត្ត ជុំវិញបឹងទន្លេសាប រួមមាន៖ ខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និងខេត្តកំពង់ធំ។ ក្រុមការងារអន្តរក្រសួង បានចាប់ផ្តើមការងារចុះត្រួតពិនិត្យ កាលពីថ្ងៃទី២៩ ខែវិច្ឆិកា រហូតដល់ថ្ងៃទី៦ ខែធ្នូ ឆ្នាំ២០២១។
តាមរយៈរបាយការណ៍ ដែលលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលបានចុះធ្វើការផ្ទាល់ជាមួយលោក ជា សុផារ៉ា និងក្រុមការងារអន្តរក្រសួង បានបង្ហាញថា នៅខេត្តកំពង់ធំ មានករណីកាប់ទន្ទ្រាន ឈូសឆាយដីព្រៃលិចទឹក និងកាន់កាប់ដីខុសច្បាប់ មានចំនួន ៤០ ករណី លើផ្ទៃដីចំនួន ៣ ៥៦៦.៥៦១ ហិកតា។ នៅខេត្តកំពង់ឆ្នាំង ចំនួន ២១០០.៦៦០ ហិកតា។ ខេត្តបាត់ដំបង ៣៧៦៨,៤ហិកតា។ ក្នុងខេត្តពោធិ៍សាត់ មានចំនួន ៤,៤៣៤.០៧ហិកតា។ ខេត្តបន្ទាយមានជ័យ ចំនួន ៥ ៣៥០ហិកតា។ ខេត្តសៀមរាប ចំនួន ១,៩៧០.៨២២ ហិកតា។
បន្ទាប់ពីកិច្ចប្រជុំក្នុងបណ្តាខេត្តនិមួយៗ លោកឧបនាយករដ្ឋមន្ត្រី ជា សុផារ៉ា ប្រធានអង្គប្រជុំ បានសម្រេចដាក់ចេញនូវវិធានការជាច្រើនចំណុច ជូនរដ្ឋបាលខេត្ត រួមមាន៖ ដកហូតដី ពីអ្នកមានអំណាច និងប្រជាជនចូលទន្ទ្រាន និងកាន់កាប់ទាំងអស់នោះ មកវិញជាបន្ទាន់។ ខេត្តនិមួយៗ ក៏ត្រូវចេញលិខិតណែនាំដល់អាជ្ញាធរស្រុក ឃុំ ត្រូវបញ្ឈប់ការពិនិត្យបញ្ជាក់លើលិខិតសុំកាន់កាប់ដី និងលិខិតផ្ទេរសិទ្ធិកាន់កាប់ដី ក្នុងដែនព្រៃលិចទឹក ព្រមទាំងចេញលិខិតបដិសេធលើរាល់លិខិត ដែលបានចេញរួចពីពេលមុន ជាដើម។
សូមរម្លឹកថា កាលពីរសៀលថ្ងៃអាទិត្យ ទី២៨ ខែវិច្ឆិកា ឆ្នាំ២០២១ សម្តេចតេជោ នាយករដ្ឋមន្ត្រី ហ៊ុន សែន បានចេញសារជាសំឡេង ដោយបញ្ជាឲ្យអភិបាលខេត្ត ជាប់បឹងទន្លេសាប រួមមាន៖ ខេត្តកំពង់ឆ្នាំង ពោធិសាត់ បាត់ដំបង បន្ទាយមានជ័យ សៀមរាប និងខេត្តកំពង់ធំ រួមទាំងគណៈកម្មការសូរិយោដីថ្នាក់ជាតិ ដឹកនាំដោយលោកឧបនាយករដ្ឋមន្ត្រី ជា សុផារ៉ា អង្គភាពប្រឆាំងអំពើពុករលួយ និងស្ថាប័នពាក់ព័ន្ធថ្នាក់ជាតិដទៃទៀត ត្រូវធ្វើសកម្មភាពជាបន្ទាន់ ដើម្បីទប់ស្កាត់ការកាប់រានព្រៃលិចទឹក ដើម្បីយកដីធ្វើកម្មសិទ្ធិ នៅតំបន់បឹងទន្លេសាប។
ចំពោះមុខ សម្តេចតេជោ ហ៊ុន សែន ក៏បានបញ្ជាឲ្យដកហូតនូវដីព្រៃលិចទឹក នៅបឹងទន្លេសាប ដែលអតីតអភិបាលខេត្តកំពង់ឆ្នាំង លោក ឈួរ ច័ន្ទឈឿន រំលោភយកជាង ២០០០ហិកតា ផងដែរ។
បន្ថែមលើបទបញ្ជាឲ្យអភិបាលខេត្តជាប់បឹងទន្លេសាប និងអាជ្ញាធរសមត្ថកិច្ចពាក់ព័ន្ធ ត្រូវចាត់វិធានការជាបន្ទាន់ ដើម្បីទប់ស្កាត់បទល្មើសកាប់រានដីព្រៃលិចទឹក នៅតំបន់បឹងទន្លេសាប សម្តេចតេជោ នាយករដ្ឋមន្ត្រី ហ៊ុន សែន ក៏បានប្រកាសព្រមានឲ្យមន្ត្រីខិលខូចទាំងអស់ ចេញសារភាពជាបន្ទាន់ បើមិនដូច្នោះទេ មន្ត្រី និងអ្នកពាក់ព័ន្ធទាំងនោះ នឹងត្រូវដកហូត រឹបអូសទ្រព្យ ព្រមទាំងចាប់ខ្លួន បើសិនជាពាក់ព័ន្ធនឹងបទល្មើស កាប់រានព្រៃ យកដីតំបន់លិចទឹកបឹងទន្លេសាប ធ្វើកម្មសិទ្ធិ៕
ចែករំលែកព័តមាននេះ