ខេត្តបន្ទាយមានជ័យ ៖ ពលរដ្ឋរស់នៅអមសងខាងផ្លូវ១ខ្សែ ស្ថិតក្នុងភូមិមិត្តភាព សង្កាត់ប៉ោយប៉ែត បាននាំគ្នារអ៊ូរទាំថា ពិបាកធ្វើដំណើររយៈពេលប៉ុន្មានឆ្នាំចុងក្រោយនេះ ព្រោះថានៅរដូវវស្សាគឺទឹកលិច ឯរដូវប្រាំងវិញ គឺជង្ហុកជ្រៅៗតែម្តង។
ផ្លូវ១ខ្សែខាងលើនេះ គឺតភ្ជាប់ពីអតីតផ្លូវ ZOA ក្បែរស្ថានីយប្រេងឥន្ទនៈដេប៉ូតេឡា ជាភារម្យ ឆ្ពោះទៅផ្លូវបេតុងក្នុងភូមិសាមគ្គីមានជ័យ និងភូមិព្រៃព្រិច (ជាប់របងអង្គការ MMF)។
បើតាមពលរដ្ឋរស់នៅអមដងផ្លូវ១ខ្សែនេះ បានរអ៊ូរទាំប្រាប់កោះសន្តិភាពឱ្យដឹងថា ពួកគាត់ពិបាកធ្វើដំណើរឲ្យតែដល់រដូវវស្សា។ ចំណែកស្ត្រីវ័យចំណាស់ឈ្មោះហ៊ី ស័ន មានវ័យ៦៦ឆ្នាំ ក៏បានប្រាប់ដែរថា នាពេលកន្លងមកនេះ ខណៈផ្លូវ១ខ្សែខាងលើលិចលង់ដោយសារតែគ្រោះជំនន់ទឹកភ្លៀងនោះ គឺគាត់បានរអិលជើងដួលរហូតបាក់ឆ្អឹងដងកាំបិតស្មាខាងឆ្វេង ព្រោះមិនដឹងថា កន្លែងដួលនោះមានទឹកជ្រៅឡើយ។
រីឯពលរដ្ឋផ្សេងៗទៀតក៏ប្រាប់ដែរថា ក្នុងរដូវវស្សា មានយានយន្តមិនតិចគ្រឿងនោះទេ ដែលរលត់ខូចកណ្តាលផ្លូវ១ខ្សែនេះ ហើយពួកគាត់ថែមទាំងជួយរុញទៀតផង។ ពួកគាត់បន្តថា កន្លងមក ក៏មានទាំងស្ត្រីមានផ្ទៃពោះធ្វើដំណើរតាមម៉ូតូបានដួល និងបារម្ភពីសុវត្ថិភាពកូនក្នុងផ្ទៃទៀតផងរ។
ក្រុមប្រជាពលរដ្ឋខាងលើក៏បានលើកឡើងទៀតថា កាលពីដំបូង ផ្លូវ១ខ្សែនេះខ្ពស់មិនសូវលិចលង់ក្នុងរដូវវស្សាប៉ុន្មានទេ។ ពួកគាត់បញ្ជាក់ថា ដោយសារកន្លងមក មានគេមកកៀរគរសុំពលរដ្ឋចូលរួមអភិវឌ្ឍន៍ផ្លូវ ដោយទារប្រាក់តាមមុខផ្ទះទាំងថ្លៃលូ, ថ្មមិច និងផ្សេងៗទៀត១ល្វែង៦០០ដុល្លារ ហើយអ្នកចូលរួមមានចំនួនតិច ស្រាប់តែស្ងប់ស្ងាត់ទៅវិញរហូតដល់បច្ចុប្បន្ន។
អ្វីដែលធ្វើឲ្យផ្លូវ១ខ្សែនេះលិចលង់ និងមានទឹកជ្រៅនោះ ត្រូវបានពលរដ្ឋខាងលើប្រាប់ថា ដោយសារតែមានគេកាយយកអាចម៍ដីផ្លូវនេះចេញ ដោយមិនដឹងយកទៅណាទេ ហើយសន្យាថានឹងអភិវឌ្ឍន៍ផ្លូវ១ខ្សែខាងលើឡើងវិញ។
ក្រុមពលរដ្ឋបានសំណូមពរសុំអាជ្ញាធរ មេត្តាជួយពន្លឿនកាអភិវឌ្ឍន៍ផ្លូវ១ខ្សែនេះឲ្យបានឆាប់ផង ព្រោះវាមិនត្រឹមតែជួយឲ្យពួកគាត់បានធ្វើដំណើរស្រួលប៉ុណ្ណោះទេ ពោលគឺអាចជួយដល់អ្នកមកពីភូមិផ្សេងធ្វើដំណើរបានលឿនទៅទីតាំងមួយចំនួនដូចជា ច្រកទ្វារអន្តរជាតិប៉ោយប៉ែត ជាពិសេសអ្នកត្រូវទៅធ្វើការតាមកាស៊ីណូជាដើម។ល។
ពាក់ព័ន្ធនឹងបញ្ហាផ្លូវ១ខ្សែខាងលើនេះ លោក សន មុន្នី មេភូមិមិត្តភាព ក៏បានប្រាប់កោះសន្តិភាពតាមទូរស័ព្ទថា កន្លងមក ពិតជាមានគេកាយយកអាចម៍ដីចេញពីផ្លូវមែន ប៉ុន្តែថាអាចម៍ដីនោះមិនបានយកទៅលក់ដូរទេ គឺខាងអភិវឌ្ឍន៍សង្កាត់ គេដឹកយកទៅចាក់ផ្លូវដែលរងការខូចខាតកន្លែងផ្សេងៗក្នុងសង្កាត់។
លោកបញ្ជាក់ថា ផ្លូវ១ខ្សែខាងលើនេះ គឺមានប្រវែងប្រហែល៤០០ម៉ែត្រ ហើយអាជ្ញាធរនឹងអភិវឌ្ឍន៍ចាក់ថ្មមិច ជាថវិការអភិវឌ្ឍន៍ឃុំ-សង្កាត់ក្នុងពេលឆាប់ខាងមុខនេះហើយ៕
ចែករំលែកព័តមាននេះ