រាជធានីភ្នំពេញ ៖ ប្រទេសចិន អះអាងថា ខ្លួនបានសម្រេចចិត្តធ្វើការសិក្សា និងវិភាគពីហានិភ័យផ្លែមៀនប៉ៃលិន និងត្រីប្រារបស់កម្ពុជា ។ ប្រសិនជាអាចទទួលយកបានចិន នឹងធ្វើការនាំចូលផ្លែមៀនប៉ៃលិននៅរដូវប្រមូលផលលើកក្រោយ…
រាជធានីភ្នំពេញ ៖ ប្រទេសចិន អះអាងថា ខ្លួនបានសម្រេចចិត្តធ្វើការសិក្សា និងវិភាគពីហានិភ័យផ្លែមៀនប៉ៃលិន និងត្រីប្រារបស់កម្ពុជា ។ ប្រសិនជាអាចទទួលយកបានចិន នឹងធ្វើការនាំចូលផ្លែមៀនប៉ៃលិននៅរដូវប្រមូលផលលើកក្រោយ ។
លោក Wang Wentian ឯកអគ្គរដ្ឋទូតចិនប្រចាំកម្ពុជា បានថ្លែងនៅក្នុងពិធីបើកសម្ពោធជាផ្លូវការ ផ្លូវជាតិលេខ ១១ ជាមួយប្រមុខដឹកនាំកម្ពុជានៅថ្ងៃទី ៦ ខែធ្នូ ឆ្នាំ ២០២១ នេះថា ចិន បានសម្រេចចិត្តធ្វើការសិក្សា និងវិភាគហានិភ័យលើផ្លែមៀន និងត្រីប្រា របស់កម្ពុជា តាមរយៈវិដេអូពីចម្ងាយដែលជាវិធានការសំខាន់មួយដើម្បីឆ្លើយតបតាមកិច្ចព្រមព្រៀងរវាងថ្នាក់ដឹកនាំប្រទេសទាំងពីរដែលបានធ្វើកាលពីពេលថ្មីៗនេះ ។
លោកទូតសង្គត់ធ្ងន់ថា «បើសិនការវិភាគនេះដំណើរការរលូនផ្លែមៀនរបស់កម្ពុជាអាចនាំចេញទៅប្រទេសចិនបាននៅពេលរដូវប្រមូលផលលើកក្រោយ រីឯត្រីប្រា វិញនឹងអាចនាំចេញទៅទីផ្សារប្រទេសចិន នាពេលដ៏ខ្លីខាងមុខនេះ ។
សម្តេចតេជោ ហ៊ុន សែន នាយករដ្ឋមន្ត្រី បានបង្ហាញក្តីរីករាយនៅពេលលោកឯកអគ្គរដ្ឋទូតចិន លើកឡើងដូច្នេះ ។ សម្តេចបញ្ជាក់ថា «ខ្ញុំសប្បាយរីករាយហើយក៏ប្រហែលជាប្រជាជនកម្ពុជាក៏សប្បាយរីករាយដូចគ្នាទៅលើអ្វីដែលឯកឧត្តមលើកឡើងខាងលើនេះ គឺជាចំណុចដែលខ្ញុំបានស្នើជាមួយនិងការជួបដោយផ្ទាល់ជាមួយនិងថ្នាក់ដឹកនាំចិន ។ ពេលនោះយើងស្នើសុំអាទិភាពតែទៅលើផ្លែមៀន ឥឡូវគាត់ផ្តល់ការត្រួតពិនិត្យត្រីប្រា ។ ត្រីប្រា នេះកម្ពុជាសម្បូរណាស់ បើសិនជាមានទីផ្សារចិន ដ៏ធំមួយនេះនឹងមានការជំរុញលើកទឹកចិត្តឱ្យមានការចិញ្ចឹមត្រីប្រានៅក្នុងប្រទេសកម្ពុជា រួចហើយដឹកជញ្ជូនទៅប្រទេសចិន ដោយវាបង្កើតបាននូវប្រាក់ចំណូលរបស់ពលរដ្ឋចិញ្ចឹមត្រីនៅកម្ពុជា» ។
នៅឆ្នាំនេះផ្លែមៀនប៉ៃលិន របស់សហគមន៍កសិកម្មមៀនប៉ៃលិន នៅខេត្តប៉ៃលិន បាត់ដំបង និងបន្ទាយមានជ័យ មិនតិចជាងចំនួន ៥ ម៉ឺនតោននោះទេបានកកស្ទះមិនអាចនាំចេញទៅប្រទេសថៃ បានដូចរាល់ឆ្នាំ ។ ចំណែកត្រីប្រា និងត្រីមួយចំនួនទៀងដែលកសិករខ្មែរចិញ្ចឹមក៍បាត់បង់ទីផ្សារនៅពេលកូវីដ ១៩ រាតត្បាត ដែលរដ្ឋមិនអនុញ្ញាតឲ្យមានការជូបជុំ និងរៀបចំបុណ្យទា មង្គលការជាដើមនោះ ៕
ចែករំលែកព័តមាននេះ