រាជធានីភ្នំពេញ ៖ មានរោងចក្រជាច្រើនបានផ្តើមសម្បូរការងារ តម្រូវឲ្យកម្មករកម្មការិនីធ្វើការថែមម៉ោង ។ លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានឲ្យដឹងថា…
រាជធានីភ្នំពេញ ៖ មានរោងចក្រជាច្រើនបានផ្តើមសម្បូរការងារ តម្រូវឲ្យកម្មករកម្មការិនីធ្វើការថែមម៉ោង ។ លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានឲ្យដឹងថា ដោយសារតម្រូវការទីផ្សារ រោងចក្រកាត់ដេររហូតដល់៧០% តម្រូវឲ្យកម្មករធ្វើការថែមម៉ោងនាពេលនេះ ។ ការថែមច្រើន គឺដោយសារតែការនាំចេញទៅសហរដ្ឋអាមេរិកពិសេសផលិតកាបូបយូរដៃ ហើយទីផ្សារសម្លៀកបំពាក់នៅភូមា និងវៀតណាមបានប្តូរយកមកផលិតនៅកម្ពុជាក្នុងចំនួនច្រើន ។
បញ្ហានយោបាយនៅប្រទេសភូមា មិនទាន់មានការដោះស្រាយ ចំណែកនៅវៀតណាមបញ្ហាកូវីដ ១៩ ដូច្នេះមានរោងចក្រមួយចំនួនបានងាកមកកម្ពុជា ។ ការបញ្ជាទិញផលិតផលម៉ាកដូចគ្នាដែលធ្លាប់ផលិតនៅប្រទេសភូមា និងវៀតណាម គេបានផ្ទេរមកស្រុកខ្មែរ ។ នេះបើតាមការបញ្ជាក់របស់លោក អាត់ ធន់ ។
ប្រធានសម្ព័ន្ធសហជីពប្រជាធិតេយ្យកម្មករកាត់ដេរកម្ពុជានិយាយថា ទោះជាមានតម្រូវការផលិតកម្មច្រើនយ៉ាងណាក្តី កម្មករនៅក្នុងប្រទេសកម្ពុជានៅតែអាចរ៉ាប់រងក្នុងការផលិតបាន ។ លោកថា កម្លាំងពលកម្មនៅកម្ពុជាមានច្រើនទោះបីជារោងចក្រកាត់ដេរថ្មីៗបានបើកទ្វារច្រើន ក៍មិនខ្វះកម្លាំងពលកម្មនោះឡើយ ។ ម៉ាងវិញទៀតលោកថា ការបន្ធូរបន្ធយវិធានការលើជំងឺកូវីដ ១៩ ក៍ជាផ្នែកសំខាន់ដែលអាចឲ្យរោងចក្រនីមួយៗមានលទ្ធភាពធានាបានផលិតកម្មរបស់ខ្លួន ។
ខ្ញុំគិតថា ការផលិតកម្មអាច និងឆ្លើយតបបាន ដោយសារបញ្ហាជំងឺកូវីដ ១៩ នៅកម្ពុជាមិនមានភាពធ្ងន់ធ្ងរដូចកាលពេលមុន ហើយនៅក្នុងរោងចក្រមានកម្មករកើតជំងឺ ជំងឺកូវីដ ១៩ រាជរដ្ឋាភិបាលតម្រូវឲ្យឈប់សម្រាក តែកម្មករដែលកើតជំងឺ ទៅព្យាបាល ។ ចំណែកកម្មករផ្សេងៗនៅបន្តធ្វើដដែល ។
ទោះយ៉ាងណា លោក អាត់ ធន់ សម្តែងការបារម្ភពីសុខុមាភាពរបស់កម្មករកាត់មួយចំនួនដែលពួកគាត់ចង់បានប្រាក់ចំណូលច្រើន ខំថែមម៉ោងហួសកម្លាំងដែរ ។ ជាការកត់សម្គាល់កម្មករនិយោជិត ទទួលបានប្រាក់ថ្លៃបាយសម្រាប់ការធ្វើការងារបន្ថែមម៉ោងដោយស្ម័គ្រចិត្តចំនួន ២,០០០ រៀលក្នុងមួយថ្ងៃ ឬការទទួលបានបាយមួយពេលដោយឥតគិតថ្លៃ ក្រៅពីការទទួលបានប្រាក់កម្រៃពលកម្មតាមម៉ោងដែលបានបំពេញនោះ ៕
ចែករំលែកព័តមាននេះ