ដើម្បីស្គាល់បុគ្គលជោគជ័យ មកស្តាប់អ្នកជំនាញបកស្រាយពាក្យ «ជោគជ័យ» !
- ភ្នំពេញ
រាជធានីភ្នំពេញ ៖ លោកឧកញ៉ាវេជ្ជបណ្ឌិត គួច ម៉េងលី ដែលជាប្រធានក្រុមប្រឹក្សាភិបាលនៃក្រុមហ៊ុន Mengly J. Quach Education…
រាជធានីភ្នំពេញ ៖ លោកឧកញ៉ាវេជ្ជបណ្ឌិត គួច ម៉េងលី ដែលជាប្រធានក្រុមប្រឹក្សាភិបាលនៃក្រុមហ៊ុន Mengly J. Quach Education បានថ្លែងនៅបណ្តាញសង្គមហ្វេសប៊ុក របស់លោកផ្ទាល់ជាសាធារណៈនៅថ្ងៃទី ០៦ ខែធ្នូ ឆ្នាំ ២០២១ ដូចនេះថា ៖ «ខ្ញុំចង់ចែករំលែកដល់យុវជន និងសាធារណៈជនទាំងអស់ឱ្យច្បាស់ម្តងទៀតថា សព្វថ្ងៃនេះមនុស្សយើងខ្លះកំពុងតែឱ្យនិយមន័យនៃភាពជោគជ័យ ខុសសឹងតែ ១៨០ ដឺក្រេទៅហើយ ។ អ្វីបន្តិចជោគជ័យៗឡើងវ៉ល់ពេញហ្នឹង ។ ហើយការយល់ខុសបែបនេះ គឺកំពុងតែបំផ្លាញបញ្ញវន្តភាពរបស់យើងយ៉ាងប្រាកដជាក់ ដែលអាចនឹងប៉ះទង្គិចដល់អនាគតប្រទេសជាតិយើងទាំងមូល ។
លោកឧកញ៉ាវេជ្ជបណ្ឌិត គួច ម៉េងលី បានបន្តថា មែនទែនទៅ បើគេនិយាយពីជោគជ័យ គេគួរគិតពីអនាគតវែងឆ្ងាយ ដោយចាប់ផ្តើមដំបូង គឺធ្វើឱ្យជោគជ័យលើសុខភាពផ្លូវកាយ ។ យើងត្រូវធ្វើយ៉ាងណាថែរក្សាខ្លួនឱ្យចាកផុតពីជំងឺព្យាធិផ្សេងៗ ។ យើងត្រូវយល់ពីរបបអាហារ យល់ពីសុខភាពខ្លួន អនុវត្តហូបស្អាត ផឹកស្អាត និងរស់នៅស្អាត ដោយព្យាយាមបំពេញឱ្យបាននូវតម្រូវការបឋម (ជម្រក អាហារ ថ្នាំសង្កូវ និងសម្លៀកបំពាក់) បន្ទាប់មកទៀតយើងត្រូវចូលរួមជួយកិច្ចការសង្គមក្នុងនាមជាពលរដ្ឋល្អមួយរួប ។ ជោគជ័យបន្ទាប់ គឺសុខភាពផ្លូវចិត្ត និងផ្លូវអារម្មណ៍ល្អ ដែលអាចជាកត្តារួមផ្សំដ៏សំខាន់ជួយយើងឱ្យអាចបដិបត្តិដំណើរជីវិតទៅមុខបានដោយមានគុណភាព ។ ក្រៅពីនោះ យើងត្រូវពុះពាររកជោគជ័យលើបញ្ញាញាណ ។ ពោលយើងត្រូវទទូចរៀនសូត្រឱ្យមានចំណេះដឹងក្នុងខ្លួនច្បាស់លាស់ មិនខ្លោច ឬឆៅ ។ ចំណេះជួយរំដោះខ្លួនយើងពីគ្រោះក្រៅខ្លួន និងក្នុងខ្លួន ។
មិនត្រឹមតែប៉ុណ្ណោះ លោកឧកញ៉ាវេជ្ជបណ្ឌិត ក៏បានឱ្យដឹងថា ចំណេះដឹងធ្វើឱ្យយើងចេះគិតវិភាគថ្លឹងថ្លែងដោយមានសុភនិច្ឆ័យខ្ពស់ ។ យើងនឹងក្លាយជាមនុស្សយល់ដឹងខុសត្រូវ និងមានហេតុផល ។ ពុំមែនជោគជ័យក្នុងនាមអ្នកដើរផ្លូវកាត់ គ្មានចំណេះអ្វីជាដុំកំភួន ឬថាជោគជ័យតាមរយៈការអានសៀវភៅជោគជ័យ ហើយអនុវត្តតាមយ៉ាងទទឹងទិសនោះទេ ឬថាជោគជ័យដោយបោកប្រាស់ ធ្វើខ្លួនជាអ្នកមាន ។ ជោគជ័យបែបនេះ ពុំមែនជោគជ័យល្អជាទេ ។ តែជាជោគជ័យខ្មៅងងឹត និងបំផ្លាញសង្គមជាតិទៅវិញ ។
លោកឧកញ៉ាវេជ្ជបណ្ឌិត បានបន្តថា ៖ «ខ្ញុំស្គាល់អ្នកជោគជ័យខ្លះ ប្រើទឹស្តីបង្អើលអ្នកតាមគាត់ដដែលៗ ។ ដោយសារទង្វើប្រាសចាកសច្ចៈ ជនខ្លះទទួលបានចំណាត់ការផ្លូវច្បាប់អ៊ីចឹងទៅ ។ ដូច្នេះហើយ និយមន័យនៃភាពជោគជ័យចំពោះប្រជាជនក្នុងប្រទេសអភិវឌ្ឍ ដំបូងបំផុតគេច្រើនផ្តោតលើជោគជ័យសុខភាពផ្លូវកាយ ផ្លូវចិត្ត និងបញ្ញាញាណ ។ ជោគជ័យទាំងបីនេះហើយ ជួយឱ្យយើងឈានដល់ជោគជ័យធំធេងក្នុងដំណើរជីវិតដ៏វែងឆ្ងាយ» ៕
ចែករំលែកព័តមាននេះ