អ្នកភូមិឮសូរដូចផ្ទុះកង់ឡាន លុះមកមើល ឃើញភ្លើងឆេះអគារប្រៃសណីយ៍ផ្អើ.ល
- ព្រះសីហនុ
ខេត្តព្រះសីហនុ ៖ អគារប្រៃសណីយ៍ចាស់ទុកចោលមួយកន្លែង គ្មានមនុស្សរស់នៅ ត្រូវបានអគ្គីភ័យឆាបឆេះ បើតាមសមត្ថកិច្ច
ខេត្តព្រះសីហនុ ៖ អគារប្រៃសណីយ៍ចាស់ទុកចោលមួយកន្លែង គ្មានមនុស្សរស់នៅ ត្រូវបានអគ្គីភ័យឆាបឆេះ បើតាមសមត្ថកិច្ចអះអាងថា មូលហេតុបណ្តាលមកពីផ្ទុះលូបង្គន់ ។
លោកវរសេនីយ៍ទោ អ៊ួង វុទ្ធី អធិការនគរបាលស្រុកព្រៃនប់ បានឱ្យដឹងថា ហេតុការណ៍ខាងលើនេះបានកើតឡើងកាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី៥ ខែធ្នូ ឆ្នាំ២០២១ នៅចំណុចទីតាំងអគារប្រៃសណីយ៍កម្ពុជាចាស់ ស្ថិតនៅភូមិបឹងវែង ឃុំវាលរេញ ស្រុកព្រៃនប់ ខេត្តព្រះសីហនុ ។
លោកអធិការនបានបន្តថា ករណីអគ្គីភ័យខាងលើនេះបានឆាបឆេះអគារប្រៃសណីយ៍ចាស់ទ្រុតទ្រមទុកចោលគ្មានមនុស្សស្នាក់នៅ សង់អំពីថ្ម ប្រក់ក្បឿង មានបណ្តោយ១៥ម៉ែត្រ និងទទឹង៥ម៉ែត្រ ជាកម្មសិទ្ធិរបស់រដ្ឋ រីឯមូលហេតុគឺបណ្តាលពីផ្ទុះលូបង្គន់អគារទុកចោល ទើបបង្កឱ្យមានអគ្គិភ័យឆាបឆេះកើតឡើងបែបនេះតែម្តង ។
លោកអធិការបានបន្ថែមថា តាមការបំភ្លឺរបស់ប្រជាពលរដ្ឋឈ្មោះ សុខ ភីលីន បានបញ្ជាក់ថា មុនពេលកើតហេតុ គាត់ឮសូរសំឡេងផ្ទុះដូចផ្ទុះកង់ឡាន ហើយគាត់ដើរមកមើល បានឃើញមានអណ្ដាតភ្លើងឆេះដំបូលអគារប្រៃសណីយ៍ចាស់របស់រដ្ឋ ហើយគាត់បានរាយការណ៍មកសមត្ថកិច្ចតែម្ដង ។
ក្រោយពីទទួលព័ត៌មានខាងលើនេះភ្លាម កម្លាំងអធិការដ្ឋាននគរបាលស្រុកព្រៃនប់ បានយករថយន្ដពន្លត់អគ្គីភ័យមកជួយ ពន្លត់ភា្លមៗ អស់ទឹកចំនួន២រថយន្ដ ទើបរលត់ទាំងស្រុង ។
ករណីអគ្គីភ័យខាងលើ បណ្តាលអោយឆេះឈើពិដាន និងក្បឿងមួយចំនួន ហើយក៏មិនមានបណ្តាលអោយមនុស្សណាម្នាក់រងរបួសនោះដែរ ។
សូមបញ្ជាក់ថា អគារប្រៃសណីយ៍ខាងលើនេះមានសភាពចាស់ទ្រុឌទ្រោម គ្មានមនុស្សនៅនោះទេ គឺទុកចោល ព្រោះតែអគារប្រៃសណីយ៍ថ្មីបានសង់នៅក្បែរគ្នានោះហើយដែរ តែយ៉ាងណាមិញ មិនមានរងផលប៉ះពាល់អ្វីឡើយ ៕
ចែករំលែកព័តមាននេះ