រាជធានីភ្នំពេញ ៖ ក្រោយការសាកសួរអស់ជាច្រើនម៉ោងនៅសាលាដំបូងរាជធានីភ្នំពញ ទីបំផុតលោក ប៊ុន រស្មី ដែលគេស្គាល់នាម ប៊ុន ផាក ជាអ្នកជំនួញមួយរូបកំពុងល្បីលើបណ្តាញសង្គមរឿងទំនាក់ទំនងសេ្នហាជាមួយស្រីស្រស់ថៅកែហាងលក់សំលៀកបំពាក់តាមអនឡាញត្រូវបានតំណាងអយ្យការ…
រាជធានីភ្នំពេញ ៖ ក្រោយការសាកសួរអស់ជាច្រើនម៉ោងនៅសាលាដំបូងរាជធានីភ្នំពញ ទីបំផុតលោក ប៊ុន រស្មី ដែលគេស្គាល់នាម ប៊ុន ផាក ជាអ្នកជំនួញមួយរូបកំពុងល្បីលើបណ្តាញសង្គមរឿងទំនាក់ទំនងសេ្នហាជាមួយស្រីស្រស់ថៅកែហាងលក់សំលៀកបំពាក់តាមអនឡាញត្រូវបានតំណាងអយ្យការ ឱ្យត្រឡប់ទៅផ្ទះវិញហើយ ក្រោយរកពុំឃើញមានបទល្មើស ។
លោក គឹម ហុងសាន ព្រះរាជអាជ្ញារងតំណាងអយ្យការអមសាលាដំបូងរាជធានីភ្នំពេញ ដែលប្រចាំថ្ងៃសៅរ៍-អាទិត្យ និងជាអ្នកបានកាន់សំណុំរឿងលោក ប៊ុន រស្មី ហៅប៊ុន ផាក នារសៀលថ្ងៃទី៤ ខែធ្នូ បានដំណើរការបើកការស៊ើបសួរលើជនសង្ស័យ អស់រយៈពេលជាច្រើនម៉ោង រហូតដល់ល្ងាចបន្តិចទើបត្រូវបានបញ្ចប់ ។
តែក្រោយបញ្ចប់ការសាកសួរអស់ជាច្រើនម៉ោង នៅសាលាដំបូងរាជធានីភ្នំពេញរួចមក ដោយរកពុំឃើញមានបទល្មើស តំណាងអយ្យការក៏បានអនុញ្ញាតិឲ្យលោកគ្រូជោគជ័យ ប៊ុន ផាក មានសេរីភាពបានវិលទៅផ្ទះវិញ តែសំណុំរឿងនៅបន្តនីតិវិធី ពោល គឺនឹងបើកការស៊ើបអង្កេត រួចចាត់បញ្ជូនទៅចៅក្រមស៊ើបសួរ ។ នេះបើតាមលោក គឹម ហុងសាន ព្រះរាជអាជ្ញារងឲ្យដឹងក្រោយពីអនុញ្ញាតិឲ្យគ្រូជោគជ័យបានវិលទៅផ្ទះវិញ ។
សូមរម្លឹកថា ជនជាប់សង្ស័យឈ្មោះ ប៊ុន រស្មី ហៅ ប៊ុន ផាក (Bun Park) ភេទប្រុស អាយុ២៩ ឆ្នាំ ដែលគេស្គាល់គ្រប់គ្នាថា ជាអ្នកជំនួញវ័យក្មេងនិងជោគជ័យមួយរូប ស្នាក់នៅសង្កាត់បឹងកក់២ ខណ្ឌទួលគោក រាជធានីភ្នំពេញ ត្រូវបានកម្លាំងសមត្តកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ ឃាត់ខ្លួនពាក់ពន្ធនឹងអំពើឆបោក និងក្លែងខ្លួនបន្លំធ្វើជាមេធាវី ដោយគ្មានការអនុញ្ញាតិ ។ សមត្ថកិច្ចចាប់ឃាត់ខ្លួនលោក ប៊ុន ផាក តាមពាក្យបណ្ដឹងរបស់ឈ្មោះ ជា ចាន់តុលា ភេទប្រុស អាយុ២៩ ឆ្នាំ ស្នាក់នៅផ្ទះលេខ៩១ សេអ៊ឺ២ ផ្លូវ១៣៨ ភូមិ២ សង្កាត់ផ្សារដេប៉ូ ២ ខណ្ឌទួលគោក រាជធានីភ្នំពេញមុខរបរលក់ដូរ ។
តាមពាក្យបណ្ដឹងបានចោទប្រកាន់ ឈ្មោះ ប៊ុន រស្មី ហៅ ប៊ុន ផាក( លោកគ្រូជោគជ័យ រងនូវបណ្តឹងរបស់ឈ្មោះ ជា ចាន់តុលា) ថា តាំងខ្លួនបន្លំធ្វើជាមេធាវី ទៅធ្វើសកម្មភាពរារាំង និងញុះញង់ឈ្មោះ ស៊ាន ធាវី ដែលត្រូវជាប្រពន្ធដើមបណ្តឹង (អនីតិសង្វាស) និងបុគ្គលិករបស់ហាងឈ្មោះ V SHOP CAMBODIA យកសំលៀកបំពាក់ក្នុងហាងទូដែក នឹងវេរប្រាក់ចេញពីគណនីធនាគារ ព្រមទាំងផ្ទេរកម្មសិទ្ធិផ្ទះរបស់ខ្លួន(ជា ចាន់តុលា)និងឈ្មោះ ស៊ាន ធារី ។ ពាក្យបណ្ដឹងបានព្ជាក់ថា កាលពីអំឡុងខែវិច្ឆិកា ឆ្នាំ២០២១ ឈ្មោះ ប៊ុន រស្មី ហៅ ប៊ុន ផាក បានលួចមានទំនាក់ ទំនងជាមួយ ឈ្មោះ ស៊ាន ធារី ដែលត្រូវជាប្រពន្ធរបស់(ជា ចាន់តុលា) ដោយបង្គាប់ឱ្យឈ្មោះ ស៊ាន ធារី យកទូដែក ចេញពីផ្ទះ ផ្ទេរប្រាក់ចេញពីគណនីធនាគាររបស់ឈ្មោះ ស៊ាន ធារី ដែលប្រាក់នោះ គឺជាប្រាក់បានមកពីការរកស៊ីជាមួយគ្នា និងឱ្យឈ្មោះ ស៊ាន ធាវី ផ្ទេរកម្មសិទ្ធិផ្ទះដែលឈ្មោះ ជា ចាន់តុលា និងឈ្មោះ ស៊ាន ធាវី បានទិញរួមគ្នា និងបានផ្ញើរសារបង្គាប់ឲ្យឈ្មោះ ស៊ាន ធាវី ដកឈ្មោះ ជា ចាន់តុលា ចេញពីគ្រុបការងារ និងបណ្ដេញចេញលែងឲ្យធ្វើការងារបន្តទៀត ហើយថែមទាំងប្រាប់ឲ្យ ស៊ាន ធារី ផ្លាស់ប្តូរសោរទ្វារផ្ទះលែ្វងមិនឲ្យខ្ញុំ(ជា ចាន់តុលា)ចូលស្នាក់នៅ នឹងពុំបានផ្ដល់ដំណឹងឲ្យដឹងឡើយ ។
នៅថ្ងៃទី២៨ ខែវិច្ឆិកា ឆ្នាំ២០២១ ពេលដែលឈ្មោះ ជា ចាន់តុលា (ដើមបណ្តឹង) ទៅហាងលក់សំលៀកបំពាក់ឈ្មោះ V SHOP CAMBODIA ដែលមានទីតាំងស្ថិតនៅផ្ទះលេខC13 C15 ភូមិ១ សង្កាត់ស្រះចក ខណ្ឌដូនពេញ រាជធានីភ្នំពេញ ដើម្បីប្រាប់បុគ្គលិកហាង កុំឱ្យយកសំលៀកបំពាក់ទាំងអស់នោះចេញពីហាង ដោយមានសមត្ថកិច្ចជួយសម្របសម្រួល និងណែ នាំដល់បុគ្គលិកផងនោះ ស្រាប់តែឈ្មោះ ស៊ាន ធារ៉ា ជាបុគ្គលិកហាង បានហៅ វីដេអូខលទៅឈ្មោះ ស៊ាន ធាវី ដើម្បីបញ្ជាក់ និងទាមទារយកអីវ៉ាន់ចេញ ។
ពេលដែលកំពុងនិយាយគ្នាស្រាប់តែ ឈ្មោះ ប៊ុន រស្មី ហៅ ប៊ុន ផាក បានចូលមកដល់និយាយទៅកាន់សមត្ថកិច្ចដែលកំពុងណែនាំ ដោយបង្ហាញឯកសារមួយចំនួនផងដែរ ហើយត្រូវបានសមត្ថកិច្ចសួរទៅឈ្មោះ ប៊ុន រស្មី ហៅ ប៊ុន ផាក ថាមានតួនាទីជាអ្វីនៅក្នុងរឿងនេះ បានជាអ្នកហ៊ានអះអាង និងសួរសមត្ថកិច្ចយ៉ាងដូច្នេះ ពេលនោះ ឈ្មោះ ប៊ុន រស្មី ហៅ ប៊ុន ផាក បានឆ្លើយថាខ្លួនគឺជាមេធាវីតំណាងឱ្យឈ្មោះ ស៊ាន ធារី ។
បន្ទាប់មកសមត្ថកិច្ចក៏ស្នើសុំឱ្យឈ្មោះ ប៊ុន រស្មី ហៅ ប៊ុន ផាក និងឈ្មោះ ស៊ាន ធារី មកជួបគ្នានៅហាង ដើម្បីធ្វើការសម្របសូម្រួល តែឈ្មោះ ស៊ាន ធារី និងឈ្មោះ ប៊ុន រស្មី ហៅ ប៊ុន ផាក មិនមកជួបដោះស្រាយឡើយ ។ ដើមបណ្តឹងសំណូមពរ ឲ្យសមត្ថកិច្ចមានវិធានការទៅលើឈ្មោះ ប៊ុន រស្មី ហៅ ប៊ុន ផាក តាមនីតិវិធី ៕
ចែករំលែកព័តមាននេះ