អ្នកបានធ្វើស្រែរួចលើដីព្រៃលិចទឹក អាចចូលបាចជីដាក់ទឹកថែទាំបាន តែសន្យាត្រូវប្រគល់រដ្ឋវិញ
- កំពង់ឆ្នាំង
ខេត្តកំពង់ឆ្នាំង ៖ ប្រជាពលរដ្ឋដែលបានបង្កបង្កើនផលលើផ្ទៃដីព្រៃលិចទឹក ដែលត្រូវបានរដ្ឋដកហូតមកវិញ អាចចូលបាចទឹក ដាក់ជី ថែរហូតចាំប្រមូលផលបាន តែត្រូវធ្វើកិច្ចសន្យាបញ្ឈប់ ក្រោយពេលប្រមូលផលរួច គឺមិនអនុញ្ញាតឱ្យចូលបង្កបង្កើនផលទៀតទេ។ នេះជាការបញ្ជាក់របស់ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានប្រាប់ភ្នាក់ងារកោះសន្តិភាពនៅម៉ោងប្រមាណ១១ព្រឹកថ្ងៃទី ៣ ខែធ្នូ ឆ្នាំ២០២១នេះ ។
ឯកឧត្តមអភិបាលខេត្តកំពង់ឆ្នាំងបានបញ្ជាក់ថា យោងតាមការឯកភាពពីថ្នាក់ជាតិ ដែលមានអន្តរក្រសួង គឺបានសម្រេច អនុញ្ញាតឲ្យប្រជាពលរដ្ឋ ដែលបានបង្កបង្កើនផលហើយ លើផ្ទៃដីដែលត្រូវបានដកហូតមកវិញ ក្នុងភូមិសាស្ត្រព្រៃលិចទឹក អាចចូលដាក់ជី ដាក់ទឹកថែទាំ និង រង់ចាំប្រមូលផលបាន តែត្រូវមានកិច្ចសន្យា គឺក្រោយពីប្រមូលផលស្រូវ ដែលបានធ្វើរួចហើយ ត្រូវបញ្ឈប់ និងប្រគល់មករដ្ឋវិញ ដើម្បីឈូសលប់ភ្លឺ ដោយមិនអនុញ្ញាតឲ្យចូលធ្វើបន្តទៀតទេ ។
ជាមួយគ្នានេះ ក៏មិនអនុញ្ញាតឱ្យមានការសង់រោងចូលទៅស្នាក់នៅនោះដែរ គឺគ្រាន់តែឲ្យទៅមើលថែប៉ុណ្ណោះ ល្ងាចឡើងត្រូវឱ្យត្រឡប់ទៅលំនៅឋានវិញ ហើយ ប្រជាពលរដ្ឋទាំងនោះក៏ត្រូវ តែមានកិច្ចសន្យាផ្តិតមេដៃជាលាយលក្ខណ៍អក្សរផងដែរ ដើម្បីឈានដល់ការគ្មានទន្ទ្រានដីព្រៃលិចទឹកជាបន្តទៀត ។ សម្រាប់ប្រជាពលរដ្ឋដែលមិនទាន់បានបង្កបង្កើនផល ព្រោះដីដែលខ្លួនកាន់កាប់នៅលិចទឹក នៅឡើយ គឺមិនអនុញ្ញាតឲ្យចូលបង្កបង្កើនផលជាដាច់ខាត ។និយាយជារួម គឺឱ្យតែអ្នកបានធ្វើស្រូវ ពង្រោះហើយតែប៉ុណ្ណោះ ។
ដោយឡែក តាមការបញ្ជាក់ពី លោក ចេង ចាន់ដូណា អភិបាលស្ដីទីស្រុកកំពង់លែង ក៏បានឲ្យដឹងដែរថាថ្ងៃនេះ អាជ្ញាធរខេត្ត ពិតជាបានទៅប្រកាសឲ្យប្រជាពលរដ្ឋដែលបានបង្កបង្កើតផលលើផ្ទៃដីត្រូវបានដកហូត គឺឲ្យចូលដាក់ទឹកបាចជីនឹងរង់ចាំប្រមូលផលពិតមែន ។ ដែលនេះជាការគិតគូដល់ប្រជាពលរដ្ឋ អាចនិយាយបានថាធូរស្រាលខ្លះ សម្រាប់ថ្លៃចំណាយ ទិញប្រេងបូមទឹក ដាក់ជី ក្នុងរយៈកាលកន្លងមក ។
សូមបញ្ជាក់ថា៖ ចាប់តាំងពីបទបញ្ជាយ៉ាងតឹងរឹង របស់សម្តេចនាយករដ្ឋមន្ត្រី ស្តីពីការដកហូតត្រឡប់មកវិញ នៅដីព្រៃលិចទឹក ដែលរុករានទន្ទ្រានដោយខុសច្បាប់ អាជ្ញាធរខេត្ត បានសហការជាមួយអន្តរក្រសួង និងមន្ទីរពាក់ពាក់ពន្ឋ័ បានដកដីព្រៃលិចទឹកមកវិញ ចំនួន២០៥៨ហិកតា ដែលមនុស្ស១៣នាក់ព្រមចេញមុខសារភាព ប្រគល់ដីទាំងនោះមករដ្ឋវិញដោយគ្មានលក្ខណ៕
ចែករំលែកព័តមាននេះ