ខេត្តក្រចេះ ៖ អាជីវកម្មខារ៉ាអូខេ ក្លិបកម្សាន្ត រង្គសាល ឌីស្កូតែក ម៉ាស្សា និងអាជីវកម្មកម្សាន្តមនុស្សពេញវ័យ ស្ថិតក្នុងភូមិសាស្ត្រខេត្តក្រចេះ ត្រូវបានអនុញ្ញាតឲ្យបើកដំណើរការឡើងវិញហើយ គិតចាប់តាំងពីថ្ងៃទី១ ធ្នូ ២០២១ ។
លោក ចាន់ សុគន្ធី ប្រធានមន្ទីរទេសចរណ៍ខេត្តក្រចេះបានឲ្យដឹងនៅទី២ ខែធ្នូ ថា ចំពោះការចេញលិខិតរបស់រដ្ឋបាលខេត្តនេះ គឺស្របគ្នាជាមួយនឹងរាជរដ្ឋាភិបាល និងក្រសួងទេសចរណ៍បានចេញលិខិតឲ្យបើកដំណើរការឡើងវិញនូវអាជីវកម្ម ខារ៉ាអូខេ ក្លិប កម្សាន្ត រង្គសាល ឌីស្កូ កន្លែងម៉ាស្សា និងអាជីវកម្មកម្សាន្តនានា ។
លោកបន្តថា រហូតមកដល់ម៉ោងនេះ មន្ទីរទេសចរណ៍ខេត្តក្រចេះ បានចុះពិនិត្យផ្សព្វផ្សាយនិងវាយតម្លៃអាជីវកម្មខារ៉ាអូខេ អាជីវកម្មកម្សាន្តសម្រាប់មនុស្សពេញវ័យ ត្រូវរៀបចំទីតាំងអាជីវកម្មរបស់ខ្លួនឱ្យបានស្អាតសមរម្យ មានអនាម័យ ព្រមជាមួយគ្នានោះ ត្រូវមានបិទផ្សាយសេចក្ដីណែនាំស្ដីពីការ ការពារពីជំងឺកូវីដ19 នៅទីតាំងមុខច្រកចេញចូលឱ្យបានច្បាស់ និងត្រូវមានកាតព្វកិច្ចចាត់តាំងបុគ្គលិកប្រចាំនៅមុខច្រកចេញចូល ដើម្បីត្រួតពិនិត្យបណ្ណ័ចាក់វ៉ាក់សាំង ត្រូវប្រកាន់ភ្ជាប់នូវវិធានការ 3ការពារ 3កុំ របស់ប្រមុខរាជរដ្ឋាភិបាល និងអនុវត្តតាមស្តង់ដារអប្បបរមា (SOP) របស់ក្រសួងទេសចរណ៍និងក្រសួងសុខាភិបាល។
លោកប្រធានមន្ទីរបានបញ្ជាក់ថា គោលដៅដែលមន្ទីរទេសចរណ៍មានចុះផ្សព្វផ្សាយពិនិត្យនិងវាយតម្លៃមូលដ្ឋានអាជីវកម្មខារ៉ាអូខេក្នុងស្រុក/ក្រុងចំនួន៤ ដែលមានអាជីវកម្មខារ៉ាអូខេ រួមមាន ក្រុងក្រចេះ ស្រុកឆ្លូង ស្រុកស្នួល និងស្រុកព្រែកប្រសព្វ។
ចែករំលែកព័តមាននេះ