ភ្នំពេញ៖ សម្តេចតេជោ នាយករដ្ឋមន្ត្រី ហ៊ុន សែន បានសម្រេចចេញលិខិត បង្កើតគណៈកម្មការរៀបចំបុណ្យព្រះសព សម្តេចក្រុមព្រះ នរោត្តម រណឫទ្ធិ។ គណៈកម្មការនេះ ដឹកនាំដោយសម្តេចចៅហ្វាវាំង គង់ សំអុល រដ្ឋមន្ត្រីក្រសួងព្រះបរមរាជវាំង និងមានសមាសភាព ២៨រូប។
តាមសេចក្តីសម្រេច ចុះថ្ងៃទី២ ខែធ្នូ ឆ្នាំ២០២១ សម្តេចតេជោ ហ៊ុន សែន បានកំណត់ថា គណៈកម្មការនេះ មានភារកិច្ចរៀបចំព្រះពិធីបុណ្យព្រះសព សម្តេចក្រុមព្រះ នរោត្តម រណឫទ្ធិ ប្រធានក្រុមឧត្តមប្រឹក្សាផ្ទាល់ ព្រះមហាក្សត្រ នៃព្រះរាជាណាចក្រកម្ពុជា ឲ្យប្រតិបត្តិបានល្អប្រសើរ សមស្របតាមប្រពៃណីព្រះពុទ្ធសាសនា និងព្រះរាជាវង្សានុវង្ស។
មានព្រះជន្ម ៧៧វស្សា សម្តេចក្រុមព្រះ នរោត្តម រណឫទ្ធិ បានយាងសោយព្រះទិវង្គត នៅថ្ងៃអាទិត្យ ទី២៨ ខែវិច្ឆិកា ឆ្នាំ២០២១ វេលាម៉ោង ៩ និង ៤០ព្រឹក នៅប្រទេសបារាំង ត្រូវនឹងម៉ោង ៣ និង ៤០នាទីរសៀល ម៉ោងនៅកម្ពុជា ដោយព្រះរោគាពាធ។ តាមគម្រោង ព្រះសពរបស់សម្តេចក្រុមព្រះ នឹងត្រូវយាងដង្ហែពីប្រទេសបារាំង មកកាន់ភ្នំពេញ នៅថ្ងៃអាទិត្យ ទី៥ ខែធ្នូ ឆ្នាំ២០២១៕
ចែករំលែកព័តមាននេះ