ខេត្តសៀមរាប ៖ កាន់តែមានការចោទសួរច្រើនឡើងៗ ករណីវិទ្បាដ៏ស្គឹមស្កៃមួយ ត្រូវបានគេសង់យ៉ាងរំភើយ ក្នុងតំបន់មួយនៃឧទ្យានអង្គរ រីឯពលរដ្ឋតូចតាចសុំច្បាប់ជួសជុលរបង និងរោងចាស់នៅតាមផ្លូវក្រវាត់ក្រុង ស្ថិតក្នុងសង្កាត់ទឹកវិល មិនបានផង…
ខេត្តសៀមរាប ៖ កាន់តែមានការចោទសួរច្រើនឡើងៗ ករណីវិទ្បាដ៏ស្គឹមស្កៃមួយ ត្រូវបានគេសង់យ៉ាងរំភើយ ក្នុងតំបន់មួយនៃឧទ្យានអង្គរ រីឯពលរដ្ឋតូចតាចសុំច្បាប់ជួសជុលរបង និងរោងចាស់នៅតាមផ្លូវក្រវាត់ក្រុង ស្ថិតក្នុងសង្កាត់ទឹកវិល មិនបានផង ។ តើបញ្ហាចោទសួរមិនចេះចប់នេះមានចម្លើយបែបណា ?
សូមបញ្ជាក់ថា ផ្ទះវិទ្បាដ៏ធំស្គឹមស្កៃមួយនោះ ស្ថិតនៅក្នុងភូមិទ្រាំង សង្កាត់ស្លក្រាម ក្រុង ខេត្តសៀមរាប ជាតំបន់ហាមឃាត់ពេញបន្ទុករបស់អាជ្ញាធរជាតិអប្សរាគេមានសំណាងសាងសង់បានដ៏មហាអស្ចារ្យ ។ ពលរដ្ឋបានរិះគន់ទៅលើចំណាត់ការរបស់អាជ្ញាធរជាតិអប្សរាថា ពួកគាត់សុំច្បាប់ ជួសជុលរបង រោងឬផ្ទះចាស់អស់រយៈពេលជាយូរខែ ទើបខាងមន្ត្រីអាជ្ញាធរ នៅច្រកចេញចូលតែមួយរបស់សាលាក្រុងឱ្យទៅយកឯកសារហើយប្រាប់យ៉ាងខ្លីថា ធ្វើមិនបានទេ…តើមួយហេតុអ្វី ? ព្រោះតំបន់នោះនៅដាច់ឆ្ងាយពីប្រាសាទបុរាណ ឬត្រពាំងបុរាណឯណោះ ។
ប្រភពពីពលរដ្ឋបានបន្តថា ពួកគាត់អស់ជម្រើសហើយ បើចង់ធ្វើរបងធ្វើរោង ឬផ្ទះចាស់ ត្រូវខាងអាជ្ញាធរអប្សរាឱ្យសុំច្បាប់ ប៉ុន្តែសុំច្បាប់ហើយខ្លះបាន ខ្លះនៅតែមិនបានធ្វើទៀត ។ បើពលរដ្ឋលួចធ្វើ មន្ត្រីខិលខូចខ្លះចុះមកយកលុយ ហើយទៅបាត់ ហើយបន្តមកក៏មានអ្នកផ្សេងមកយកលុយទៀត ។ បើមិនឱ្យទេគេព្រមានថាកម្ទេចចោលទាំងអស់ ។ តាមប្រភពថា ពលរដ្ឋនិងមន្ត្រីមួយចំនួនទឹកភ្នែក ដោយសារអាជ្ញាធរជាតិអប្សរាជាច្រើនគ្រួសារហើយ ដែលរស់នៅក្នុងតំបន់ឧទ្យានអង្គរ ដែលសម្អាងថានៅក្នុងតំបន់ហាមឃាត់ ។ ទោះបីអ្នកខ្លះនៅឆ្ងាយរហូតដល់ស្រុកក្រឡាញ់ក្បែរព្រលានយន្តហោះក្តី តែផ្ទុយទៅវិញ វិឡាដ៏ស្គឹមស្កៃមួយនេះសាងសង់ចំតំបន់១នៃឧទ្យានអង្គរ គេធ្វើដោយរលូនគ្មានមន្ត្រីអប្សរាណាម្នាក់ហ៊ានទៅក្អកក្បែរឡើយនេះហើយហៅថាគ្រប់គ្រងអង្គរមហាលោតផ្លោះ មហាអស្ចារ្យ…។
ជុំវិញករណីខាងលើនោះដែរ កោះសន្តិភាពមិនអាចសុំការពន្យល់បានទេនៅវេលាម៉ោង១១និង៥៧នាទីព្រឹកថ្ងៃទី៣០ ខែវិច្ឆិកា ឆ្នាំ២០២១ ពីលោក ហ៊ី សាយ ប្រធានមន្ទីររៀបចំដែនដីនគរូបនីយកម្មសំណង់ និងសុរិយោដីខេត្តសៀមរាប ព្រោះតែទូរស័ព្ទចូលហើយ គ្មានអ្នកទទួល ។ បើតាមប្រសាសន៍របស់លោក ឡុង កុសល អ្នកនាំពាក្យរបស់អាជ្ញាធរជាតិអប្សរាបានប្រាប់តាមទូរ ស័ព្ទនៅវេលាម៉ោង១១និង៣៩នាទីព្រឹកថ្ងៃដដែលនេះថា លោកមិនទាន់បានដឹងនៅឡើយទេ បើសង់ផ្ទះថ្មគ្មានច្បាប់អនុញ្ញាតទេ ចាំមើលឱ្យគេចុះទៅមើលសិន តើជាប់តំបន់អង្គរដែរឬទេ ?
ពលរដ្ឋកំពុងរង់ចាំមើលថា តើខាងអាជ្ញាធរជាតិអប្សរាអនុវត្តច្បាប់របស់រាជរដ្ឋាភិបាល ឬ ច្បាប់យូណេស្កូ បានកម្រិតណា ? បើអ្នកមានលុយនិងអ្នកមានអំណាច នាំគ្នាសំរុកទៅទិញដីធ្វើផ្ទះយ៉ាងរំភើយ រីឯពលរដ្ឋសុំច្បាប់ធ្វើការជួសជុលរបងចាស់ក៏មិនបានផង ? ការអនុវត្តស្តងដាបែបនេះកំពុងធ្វើឱ្យបក្សកាន់អំណាចត្រូវរងការរិះគន់មិនតិចឡើយ ដោយសារតែច្បាប់ដែលចាប់ បង្ខំឱ្យអនុវត្តនោះបានតែពលរដ្ឋតូចតាចប៉ុណ្ណោះ តែបើប៉ះអ្នកខ្លាំងជាមន្ត្រីគ្រាក់ៗវិញ សូម្បីតែក្អកក៏មិនហ៊ានផង កុំថាឡើយទៅហាម ។
ករណីខាងលើនេះមិនមានបំណងអ្វីក្រៅពីការទាមទារឱ្យមានការអនុវត្តច្បាប់ដូចៗគ្នា គ្មានអ្នកតូចអ្នកធំ គឺស្មើមុខគ្នា ចំពោះមុខច្បាប់ កុំប្រើច្បាប់ស្មើគ្នាដូចម្រាមដៃអីចឹង ? បើច្បាប់ចែងថា ផ្ទៃដីដែលបានចាត់ចូលជាតំបន់ឧទ្យានអង្គរ ហាមការសាង សង់អនាធិបតេយ្យ ត្រូវហាមឱ្យម៉ឺងម៉ាត់ មិនមែនហាមតែអ្នកតូចតាចបែបនេះទេ…លោកម្ចាស់…ហេ ! ហេ !
ចែករំលែកព័តមាននេះ