រាជធានីភ្នំពេញ ៖ ប្រទេសជប៉ុនគ្រោងផ្តល់ឥណទានសម្បទានចំនួន ២០ ពាន់លានយ៉េនជប៉ុន ឬស្មើជាង ១៧៦ លានដុល្លារអាមេរិក ដល់កម្ពុជាដើម្បីស្ដារសេដ្ឋកិច្ចក្រោយពីវិបត្តិកូវីដ ១៩…
រាជធានីភ្នំពេញ ៖ ប្រទេសជប៉ុនគ្រោងផ្តល់ឥណទានសម្បទានចំនួន ២០ ពាន់លានយ៉េនជប៉ុន ឬស្មើជាង ១៧៦ លានដុល្លារអាមេរិក ដល់កម្ពុជាដើម្បីស្ដារសេដ្ឋកិច្ចក្រោយពីវិបត្តិកូវីដ ១៩ ។ ក្រសួងសេដ្ឋកិច្ច និងហិរញ្ញវត្ថុ ឱ្យដឹងថា ជប៉ុនបានប្រកាសពីកញ្ចប់ថវិកានេះនៅក្នុងជំនួបពិភាក្សាការងារជាមួយលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោក ម៉ាសាហិរ៉ូ មីកាមិ ឯកអគ្គរាជទូតជប៉ុនប្រចាំប្រទេសកម្ពុជាកាលពីពេលថ្មីនេះ ។
លោក អូន ព័ន្ធមុនីរ័ត្ន បានឱ្យដឹងថា រដ្ឋាភិបាលជប៉ុនតែងតែជួយគាំទ្រទាំងសម្ភារៈ បច្ចេកទេស និងហិរញ្ញវត្ថុ ចូលរួមចំណែកស្ទើរគ្រប់វិស័យលើកស្ទួយសុខមាលភាពសង្គម និងការអភិវឌ្ឍកម្ពុជា ។ ថ្មីៗនេះរដ្ឋាភិបាលជប៉ុនបានបន្តជួយគាំទ្រជាហិរញ្ញប្បទានបន្ថែមទៀតដល់ការអភិវឌ្ឍសេដ្ឋកិច្ចសង្គមកម្ពុជា រួមមានវិស័យសុខាភិបាល និងទឹកស្អាតជាដើម ។
កម្ពុជាបានស្វាគមន៍ចំពោះការពិចារណារបស់ភាគីជប៉ុនចំពោះផែនការផ្ដល់ឥណទានសម្បទាន ដំណាក់កាលទី ២ សម្រាប់កម្មវិធីគាំទ្របន្ទាន់ដើម្បីឆ្លើយតបទៅនឹងវិបត្តិនៃការរីករាលដាលនៃជំងឺកូវីដ ១៩ ដែលមានទឹកប្រាក់ ២០ ពាន់លានយ៉េនជប៉ុន ឬប្រមាណ ១៧៦ លានដុល្លារអាមេរិកដល់កម្ពុជា ដើម្បីគាំទ្រការអនុវត្តវិធានការស្ដារសេដ្ឋកិច្ច និងវិធានការត្រួតពិនិត្យការប្រយុទ្ធប្រឆាំងនឹងជំងឺកូវីដ ១៩ ។
កិច្ចព្រមព្រៀងឥណទានសម្បទាននេះ គ្រោងនឹងចុះហត្ថលេខាក្នុងខែធ្នូ ឆ្នាំ ២០២១ ខាងមុខឆាប់ៗនេះ ។ លោក អូន ព័ន្ធមុនីរត្ន បញ្ជាក់ថា ការផ្តល់ហិរញ្ញប្បទានរបស់ជប៉ុនេះ បានឆ្លុះបញ្ចាំងអំពីតួនាទីជប៉ុន ដែលជាដៃគូអភិវឌ្ឍន៍ជាយុទ្ធសាស្ត្រ ដ៏សំខាន់មួយក្នុងការចូលរួមចំណែកដល់កិច្ចខិតខំប្រឹងប្រែងរបស់រាជរដ្ឋាភិបាល ក្នុងការជំរុញការអភិវឌ្ឍកម្ពុជា ៕
ចែករំលែកព័តមាននេះ