រាជធានីភ្នំពេញ ៖ កម្មវិធីប្រឡងប្រលោមលោកខ្នាតខ្លី និងកំណាព្យពានរង្វាន់ព្រះនាងឥន្ទ្រទេវីឆ្នាំ២០២១ បានធ្វើការប្រកាសលទ្ធផលរបស់ខ្លួនហើយនៅថ្ងៃទី២៩ ខែវិច្ឆិកា ឆ្នាំ២០២១នេះ ក្រោមវត្តមានរបស់លោកជំទាវ នេត ភូម៉ារី រដ្ឋលេខាធិការ ក្រសួងវប្បធម៌ និងវិចិត្រសិល្បៈ។
ស្នាដៃបេក្ខជន និងបេក្ខនារីដែលមកពីតាមបណ្តាលខេត្ត-រាជធានី ចំនួន១០រូប ត្រូវបានជ្រើសរើសឲ្យជាប់ជ័យលាភីក្នុងកម្មវិធីខាងលើនេះ ក្នុងចំណោមស្នាដៃដែលបានផ្ញើមកសម្រាប់ការប្រកួតប្រមាណ១៩០ស្នាដៃនៅទូទាំងប្រទេស ខណៈពេលចំនួននេះមានការកើនឡើងជាងឆ្នាំ២០២០។
សម្រាប់បេក្ខជនដែលបានជាប់ជ័យលាភីចំនួន៥រូបលើផ្នែកប្រលោមលោកខ្នាតខ្លី ដោយចំណាតថ្នាក់លេខ១ បានទៅលើបេក្ខជនមកពីរាជធានីភ្នំពេញ មានឈ្មោះ លឹម ដារ៉ា និពន្ធរឿង «គេនព្យូរជញ្ជាំង», ចំណាត់ថ្នាក់លេខ២ បានទៅលើបេក្ខនារីឈ្មោះ អ៊ុច ថាវី មកពីរាជធានីភ្នំពេញ និពន្ធរឿង «បូណ៌មី», ចំណាត់លេខ៣ បានទៅលើបេក្ខនារី ឈ្មោះ ឡុង លាបសុជាតា មកពីខេត្តកំពង់ចាម និពន្ធរឿង «ចិត្តប្រណី» និងចំណាត់ថ្នាក់លេខ៤ បានទៅលើបេក្ខជនឈ្មោះ ពៅ មករា មកពីរាជធានីភ្នំពេញ និពន្ធរឿង «ជំនោរជីវិត» ខណៈពេលចំណាត់ថ្នាក់លេខ៥ បានទៅលើបេក្ខជនឈ្មោះ ជា តុងហៃ មកពីខេត្តតាកែវ និពន្ធរឿង «ទឹកភ្នែកស្នេហា»។
ដោយឡែកសម្រាប់ម្ចាស់ជ័យលាភីផ្នែកកំណាព្យចំនួន៥រូប គឺមាន ជ័យលាភីលេខ១ បានទៅលើបេក្ខជន វណ្ណ សារ៉េត មកពីខេត្តព្រៃវែង និពន្ធកំណាព្យរឿង «និស្ស័យស្នេហ៍កុលាប.ស», ជ័យលាភីលេខ២ បានទៅលើបេក្ខជន វង្ស សុភាជ មកពីខេត្តព្រៃវែង និពន្ធកំណាព្យរឿង «លោហិតវិរនារី», ចំណាត់ថ្នាក់លេខ៣ បានទៅលើបេក្ខជន សែម ពណ្ណរាយ មកពីរាជធានីភ្នំពេញ និពន្ធកំណាព្យរឿង «កំណប់ស្នេហ៍», ចំណាត់ថ្នាក់លេខ៤ បានទៅលើបេក្ខជន កែវ សេងរដ្ឋា មកពីខេត្តកំពង់ឆ្នាំង និពន្ធកំណាព្យរឿង «សម្លេងសង្គម» ហើយនឹងចំណាត់ថ្នាក់លេខ៥ បានទៅលើបេក្ខជន មឿន សំណាង មកពីខេត្តឧត្តរមានជ័យ និពន្ធកំណាព្យរឿង «ម្តាយ»។
លោក កុក រស់ ប្រធាននាយកដ្ឋានសៀវភៅ និងការអាន នៃក្រសួងវប្បធម៌ បានឲ្យដឹងថា ការប្រឡងការតែងនិពន្ធប្រលោមលោកខ្នាតខ្លី និងកំណាព្យរឿង ពានរង្វាន់អន្ទ្រទេវីឆ្នាំ២០២១ នេះ យើងបានទទួលស្នាដៃប្រឡងពីបេក្ខជន និងបេក្ខនារីចំនួន១៩០ស្នាដៃ ដោយនៅក្នុងនោះ ផ្នែកប្រលោមលោកមានចំនួន១២៦ស្នាដៃ និងផ្នែកកំណាព្យរឿងចំនួន៦៤ស្នាដៃ។
លោកបញ្ជាក់ថា បើទោះបីជាស្ថិតក្នុងយុគសម័យកូវីដនេះ ការចូលរួមប្រកួតប្រជែងនាឆ្នាំនេះមានការកើនឡើងប្រមាណ២៤ស្នាដៃ បើប្រៀបធៀបជាមួយនឹងឆ្នាំ២០២០កន្លងទៅ ខណៈពេលស្នាដៃចូលរួមឆ្នាំនេះ គឺមានបេក្ខនារីចំនួន៧២ស្នាដៃ ស្មើនឹង៣៨% អ្នកនិពន្ធរៀមច្បងចំនួន៣៦% និងអ្នកនិពន្ធជំនាន់ថ្មីមានចំនួនប្រមាណ៦៤%។
លោកបន្ថែមថា ក្នុងការវិនិច្ឆ័យវាយតម្លៃដាក់ពិន្ទុដែលអាចទទួលបានពានរង្វាន់ គណៈកម្មការបានអនុវត្តទៅតាមលក្ខខណ្ឌ៣យ៉ាង គឺ ១-អត្ថន័យ ២- អត្ថរូប និង ៣- អត្ថរស ខណៈពេលឆ្នាំនេះ ក៏ដូចជាបណ្តាឆ្នាំកន្លងទៅដែរ គឺយើងបានដាក់ប្រធានបទដោយសេរីសម្រាប់ផ្តល់ឱកាសឲ្យអ្នកនិពន្ធទាំងអស់បញ្ចេញនូវទស្សនៈ និងទេពកោសល្យតាមចំណង់ចំណូលចិត្តខ្លួនមានជូនអ្នកអាន។
បើតាមលោក កុក រស់ ការប្រឡងតែងនិពន្ធប្រលោមលោកខ្នាតខ្លី និងកំណាព្យរឿង គឺជាចក្ខុវិស័យមួយក្នុងចំណោមចក្ខុវិស័យសំខាន់ៗរបស់ក្រសួងវប្បធម៌ និងវិចិត្រសិល្បៈ ដើម្បីលើកស្ទួយ ការពារ និងថែរក្សាអក្សរសិល្ប៍ អក្សរសាស្ត្រជាតិ។ ក្នុងន័យនេះ ដើម្បីធ្វើឲ្យសម្រេចនូវគោលបំណងខាងលើ ដោយមានការឯកភាពពីថ្នាក់ដឹកនាំក្រសួង នាយកដ្ឋានសៀវភៅ និងការអាន ជាសេនាធិការទទួលភារៈជាអ្នកចាត់ចែងរៀបចំការប្រឡងប្រជែងស្នាដៃតែងនិពន្ធប្រលោមលោកខ្នាតខ្លី និងកំណាព្យរឿងជារៀងរាល់ឆ្នាំ។ លោកក៏បានអំពាវនាវដល់អ្នកស្រឡាញ់តែងនិពន្ធទាំងអស់មកចូលរួមប្រកួតប្រជែងឲ្យបានច្រើនកុះករបន្តទៀត ដើម្បីលើកកម្ពស់ និងថែរក្សាអក្សរសិល្ប៍ អក្សរសាស្ត្រនៃយើងកុំឲ្យបាត់បង់ រួមចំណែកលើកកម្ពស់ និងថែរក្សាវិស័យវប្បធម៌ សង្គមធម៌ទៅរកភាពរីកចម្រើនរុងរឿង៕
ចែករំលែកព័តមាននេះ