តារាចម្រៀងអ្នកនាង ឱក សុគន្ធកញ្ញា បានចាត់ទុកផ្ទាំងគំនូរក្រោមប្រធានបទ «សិល្បៈដើម្បីសន្តិភាព» ដែលបានគូរ និងដាក់បង្ហាញសាធារណៈជនទស្សនាក្នុងរាជធានីភ្នំពេញនាពេលនេះគឺជាការបង្ហាញពីការឈឺចាប់ និងទុក្ខវេទនារបស់ប្រជាជនកម្ពុជាដែលទទួលរងនូវវិបត្តិសង្គ្រាម ។ ការលើកឡើងពីតារាចម្រៀងរូបនេះធ្វើឡើង…
តារាចម្រៀងអ្នកនាង ឱក សុគន្ធកញ្ញា បានចាត់ទុកផ្ទាំងគំនូរក្រោមប្រធានបទ «សិល្បៈដើម្បីសន្តិភាព» ដែលបានគូរ និងដាក់បង្ហាញសាធារណៈជនទស្សនាក្នុងរាជធានីភ្នំពេញនាពេលនេះគឺជាការបង្ហាញពីការឈឺចាប់ និងទុក្ខវេទនារបស់ប្រជាជនកម្ពុជាដែលទទួលរងនូវវិបត្តិសង្គ្រាម ។
ការលើកឡើងពីតារាចម្រៀងរូបនេះធ្វើឡើង ក្នុងពេលដែលអ្នកនាងបាននាំកូនប្រុសទីពីររបស់នាងទៅមើលផ្ទាំងគំនូរដែលគូដោយវិចិត្រករជាច្រើនរូប និងបានដាក់តាំងបង្ហាញនៅសួនមុខវត្តបទុមវតី ដែលបង្ហាញពីសោកនាដកម្មនានាដែលបានកើតឡើងនាអំឡុងសង្គ្រាមឈ្លានពានរបស់យោធាសៀមមកលើកម្ពុជានៅតាមបន្ទាត់ព្រំដែន ។
ជាមួយរូបភាពជាមួយកូនប្រុសដែលកំពុងអង្គុយលើរទេះរុញសម្រាប់កុមារបង្ហោះលើបណ្តាញសង្គម តារាចម្រៀងអ្នកនាង ឱក សុគន្ធកញ្ញា បានភ្ជាប់ជាមួយនឹងសំណេរថា ម៉ាក់ៗនាំអូនមកមើលផ្ទាំងគំនូរ «សិល្បៈដើម្បីសន្តិភាព» ផ្ទាំងគំនូដ៏ធំនេះ ពោរពេញទៅដោយភាពឈឺចាប់ និងទុក្ខវេទនាដែលប្រជាជនកម្ពុជាបានឆ្លងកាត់ក្នុងអំឡុងពេលមានវិបត្ដិសង្គ្រាម។
ជាការកត់សម្គាល់នេះ មិនមែនជាលើកទីមួយទេ ដែលតារាចម្រៀងអ្នកនាង ឱក សុគន្ធកញ្ញា បានបង្ហាញការឈឺចាប់ និងចូលរួមសកម្មភាពនានាដោយបង្ហាញពីការឈ្លានពានរបស់យោធាថៃមកលើកដែនអធិបតេយ្យរបស់កម្ពុជាទាំងកម្រើល ។
ជាក់ស្តែង អ្នកនាងក៏បានចេញបទចម្រៀងមួយបទដែលបង្ហាញពីការឈឺចាប់របស់ប្រជាជនខ្មែរដែលបានរងគ្រោះពីការវាយប្រហារ និងទម្លាក់គ្រាប់បែកពីសំណាក់យោធាថៃនៅក្នុងសង្គ្រាមដែលបានកើតឡើងចំនួន២លើកមកនេះ ។
ជាមួយគ្នានេះ កាលពីថ្ងៃទី២៧ ខែកក្កដា ឆ្នាំ ២០២៥ កន្លងទៅ អ្នកនាង ឱក សុគន្ធកញ្ញា ក៏បានបង្ហាញវត្តមានចូលរួមជាមួយប្រជាពលរដ្ឋខ្មែរ ដែលកំពុងរស់នៅក្នុងទឹកដីនៃប្រទេសអូស្ត្រាលី ដោយបានប្រមូលផ្តុំគ្នានៅពីមុខរដ្ឋសភា Victoria ក្នុងទីក្រុងមែលប៊ឺន ដើម្បីធ្វើជាសារសំឡេងប្រាប់ដល់ពិភពលោកថា កម្ពុជាគឺជនរងគ្រោះនៅក្នុងហេតុការណ៍មួយនេះ។
ឱក សុគន្ធកញ្ញា ក៏ធ្លាប់លើកឡើងថា កម្ពុជាត្រូវការសន្តិភាព ហើយកម្ពុជានឹងប្រែក្លាយការឈឺចាប់ ទៅជាឱកាសផ្គុំចិត្តឲ្យរឹងមាំ ដាស់សតិឲ្យត្រង់ផ្លូវ រួមកម្លាំងសាមគ្គីមិនបែកបាក់ ។ជាមួយគ្នានេះ អ្នកនាង ឱក សុគន្ធកញ្ញា ក៏បានបង្កើតជាមូលនិធិផ្ទាល់ខ្លួនផងដែរ ដើម្បីស្វះស្វែងរកថវិកាពីសប្បុរសជននានា នៅក្នុងការជួយទៅដល់ជនភៀសសឹក និងវីរៈកងទ័ពជួរមុខដែលកំពុងឈរជើងការពារទឹកដីពីការឈ្លានពានរបស់យោធាសៀម ៕
ចែករំលែកព័តមាននេះ