រាជធានីភ្នំពេញ ៖ ការធ្វើស្រែចម្ការនៅតំបន់មួយចំនួនចូលមកដល់ចុងខែវិច្ឆិកា ឆ្នាំ២០២១នេះបាន និងកំពុងប្រមូលផល និងនៅតំបន់ផ្សេងទៀតក៏ត្រៀមធ្វើស្រែម្តងទៀតសម្រាប់លក់ និងផ្គត់ផ្គង់គ្រួសារ តែការធ្វើនៅវគ្គបន្ទាប់ខាងមុខនេះ អាចប្រឈមមុខការខាតបង់ប្រាក់ច្រើនក៏អាចថា បើកសិករកាត់បន្ថយការប្រើប្រាស់ជី និងថ្នាំកសិកម្មតម្លៃនៅលើទីផ្សារនៅតែឡើងថ្លៃ ខណៈដែលតម្រូវស្រូវរបស់កសិករលក់សូវបានថ្លៃ ។
លោក ង៉ែត សំបូរ អាជីវករលក់ជី និងថ្នាំកសិកម្ម នៅក្នុងឃុំសំបួរ ស្រុកទាំងខេត្តតាកែវ បានឱ្យដឹងថា ស្ថិតក្នុងដំណាក់កាលតម្លៃស្រូវរបស់ប្រជាកសិករអាចលក់បានថ្លៃជាង៨០០រៀល ក្នុងមួយគីឡូក្រាម តម្លៃជីគីមី និងថ្នាំកសិកម្មនៅតែមានតម្លៃថ្លៃ ។
តួយ៉ាងតម្លៃជីមួយបាវឡើងថ្លៃដល់៧០%នៃតម្លៃ ។ មានន័យថាកាលពីមុនជីមួយបាវលក់ក្នុងតម្លៃប្រមាណ៩ម៉ឺនរៀល តែមកដល់សព្វថ្ងៃនេះលក់ក្នុងតម្លៃរហូតដល់១៨ម៉ឺនរៀល ហើយថ្នាំកសិកម្មក៏ឡើងដូចគ្នាដែរ ។
លោកលើកឡើងថា «ប្រសិនបើជី និងថ្នាំកសិកម្ម នៅតែបន្តឡើងថ្លៃបែបនេះអាចនឹងធ្វើឱ្យកសិករកាត់បន្ថយនូវការប្រើប្រាស់វា និងធ្វើទិន្នផលមានធ្លាក់ចុះ ។ ពិសេសនឹងធ្វើឱ្យកសិករប្រឈមការខាតបង់បើនៅបន្តធ្វើស្រែចំការនៅវគ្គបន្ទាប់ ព្រោះតម្លៃស្រូវមិនស្ទុះឡើង» ។ ការបន្តឡើងថ្លៃនូវជី និងថ្នាំកសិកម្មនេះ បើតាមអាជីវករខាងលើ អាចមកពីតម្លៃប្រែងឥន្ធៈឡើងថ្លៃ, ខ្វះខាតនូវវត្ថុធាតុដើមក្នុងការផលិតក្នុងកំឡុងពេលជួបវិបត្តិជំងឺកូវីដ១៩ និងការដឹកជញ្ជូនជួបបញ្ហា ។
នៅឆ្នាំបន្ទាប់តម្លៃជី និងថ្នាំកសិកម្មអាច និងធ្លាក់តម្លៃមកវិញខ្លះនៅពេលការផ្គត់ផ្គង់តម្រូវការនៅលើទីផ្សារឆ្លើយតប ។ ពាក់ព័ន្ធ និងតម្លៃជីនិងថ្នាំកសិកម្មនៅកម្ពុជាបន្តឡើងថ្លៃ ឯកឧត្តម វេងសាខុន រដ្ឋមន្ត្រីក្រសួងកសិម្ម រុក្ខាប្រមាញ់ និងនេសាទបកស្រាយថា មូលហេតុអ្វីបានជី និងថ្នាំកសិកម្មនៅកម្ពុជាបន្តឡើងថ្លៃ?
ទាក់ទងនឹងបញ្ហានេះ ក្រសួងកសិកម្ម រុក្ខាប្រមាញ់ និងនេសាទ សូមជម្របជ្រាបថា នៅបណ្តាប្រទេសផលិតថ្នាំកសិកម្ម និងជីកសិកម្មនាំចេញមានបញ្ហារអាក់រអួលផ្នែកផលិតកម្ម ។ វត្ថុធាតុដើមមានការខ្វះខាតក្នុងការផ្គត់ផ្គង់ពីប្រទេសផលិតធំៗ មានដូចជា ប្រទេសចិន ប្រទេសម៉ាឡេស៊ី និងប្រទេសអារ៉ាប់ ។ ផលិតកម្មជីកសិកម្មត្រូវបានកាត់បន្ថយដោយកម្លាំងពលកម្មថយចុះ ដោយបញ្ហានៃការរីករាលដាលជំងឺកូវីដ-១៩ ដូចជា នៅក្នុងប្រទេសចិន ប្រទេសថៃ និងប្រទេសវៀតណាម ។
ការដឹកជញ្ជូនប្រើពេលវេលាយូរ និងមានតម្លៃខ្ពស់ដោយមានបញ្ហារីករាលដាលជំងឺកូវីដ-១៩។ ក្រៅពីការបញ្ជាទិញពីប្រទេសកម្ពុជា នៅបណ្តាប្រទេសផ្សេងៗក៏បានបញ្ជាទិញដែរ ដូចនេះការផ្គត់ផ្គង់មិនគ្រប់តាមតម្រូវការ ។ ការចំណាយលើការរៀបចំវេចខ្ចប់ឡើងវិញ ក៏ជាបន្ទុកមួយទៀត ដែលត្រូវការសំបកវេចខ្ចប់បោះពុម្ពជាភាសាខ្មែរ ។
ក្រុមហ៊ុនផ្គត់ផ្គង់ជី-ថ្នាំកសិកម្ម មួយចំនួនធំមិនបានទៅទិញដល់រោងចក្រផលិតផ្ទាល់ ដោយទិញតាមរយៈឈ្មួញកណ្តាល ជាហេតុធ្វើឱ្យជី-ថ្នាំកសិកម្មថ្លៃជាងតម្លៃនៅរោងចក្រផលិត ។ ជាមួយគ្នានេះ តម្រូវការជីកសិកម្មក្នុងស្រុកមានក៏ការកើនឡើងច្រើនដែរ ៕
ចែករំលែកព័តមាននេះ