រាជធានីភ្នំពេញ ៖ ប្រធានសមាគមអ្នកអភិវឌ្ឍន៍លំនៅឋានកម្ពុជា បានប្រជុំជាមួយរដ្ឋាករទឹកកម្ពុជាដើម្បីបង្កើនកិច្ចសហការគ្នាក្នុងការផ្តល់ទឹកស្អាតដល់លំនៅដ្ឋានពលរដ្ឋតាមបុរីនានា ។ កិច្ចសហការនេះបានធ្វើឡើងក្នុងគ្រាដែលពលរដ្ឋជាច្រើនដែលបានទិញផ្ទះនៅតាមបុរីមួយចំនួននៅជាយៗរាជធានីភ្នំពេញ គ្មានទឹកស្អាតប្រើប្រាស់ ខណៈបុរីទាំងនោះហាក់មិនអាចដោះស្រាយបញ្ហានេះ ដល់អតិថជនរបស់ខ្លួននោះឡើយ ក្រោយពីបានលក់ផ្ទះដល់ពលរដ្ឋហើយនោះ ។
អ្នកស្រី មុំ ដែលបានទិញផ្ទះបង់រំលោះពីបុរីមួយនៅក្នុងសង្កាត់កំបូលនិយាយថា ជាង ៣ ឆ្នាំហើយដែលការរស់នៅរបស់អ្នកស្រី និងពលរដ្ឋផ្សេងទៀតនៅក្នុងបុរីបានជូបការលំបាកគ្មានទឹកប្រើប្រាស់ ។ អ្នកស្រីនិយាយថា រៀងរាល់ថ្ងៃអ្នកស្រីត្រូវទិញទឹកពីគេដឹកលក់តាមឡានមកប្រើ ។ ពលរដ្ឋអ្នកទិញផ្ទះពីបុរី បានស្នើទៅម្ចាស់បុរីឲ្យមានទំនួលខុសត្រូវក្នុងរឿងនេះ និងបានទទួចដល់ពលរដ្ឋដែលមានបំណងទិញផ្ទះតាមបុរី គួរពិនិត្យលើបញ្ហានេះឲ្យច្បាស់មុខសម្រេចចិត្តទិញ ។
«យើងលំបាកណាស់ ទិញផ្ទះតែគ្មានទឹកប្រើ ។ ទឹកស្រក់តក់ៗ នៅរៀងរាល់ថ្ងៃខ្ញុំខំក្រោកពីយប់ដើម្បីត្រង់ទឹកទុកប្រើ ថ្ងៃខ្លះបានមួយធុងថ្ងៃខ្លះបានកន្លះធុង រងលាងចានមិនគ្រាន់ផង ។ កាលពីពេលទិញសុទ្ធតែអះអាងថា មានទឹកមានភ្លើងរដ្ឋ ។ ពលរដ្ឋបានសូមឲ្យម្ចាស់បុរីដោះស្រាយបញ្ហានេះតែគ្មានលទ្ធផលទេ នៅពេលពលរដ្ឋតវ៉ាខ្លាំងបានដឹកទឹកមួយឡាន ពីរឡានមកចែកឲ្យពលរដ្ឋហើយក៍ស្ងាត់ទៅទៀត» អ្នកស្រី មុំ ត្អូញ ។
អ្នកដែលបានទិញផ្ទះពីបុរី ខាងលើនិយាយបន្តថា ថាមិនមែនមានតែមួយ ឬពីរបុរីនោះទេដែលគ្មានទឹកស្អាតឲ្យពលរដ្ឋប្រើប្រាស់ តាមអ្នកស្រីដឹងមានបុរីច្រើន ពិសេសបុរីនៅជាយក្រុងៗ តែងតែជួបបញ្ហាទឹកភ្លើងនេះ ។ ពលរដ្ឋដែលបានរងគ្រោះពីបញ្ហានេះសំណូមពរឲ្យពលរដ្ឋដែលមានបំណងទិញផ្ទះពីបុរីទាំងឡាយគួរសួរនាំនិងឲ្យខាងបុរីបញ្ជាក់ឲ្យច្បាស់ពីបញ្ហាទឹក និងភ្លើងនេះជាមុន មុនសម្រេចចិត្តទិញដើម្បីកុំឲ្យចាញ់ថោកគេ ពីព្រោះនៅពេលបានទិញ បានផ្តល់លុយឲ្យគេហើយ ការដំណោះស្រាយបញ្ហានានា វាមានការលំបាកណាស់ ។
តាមជំនួបពិភាក្សារវាងអ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា ដែលមានសមាជិកមិនតិចជាង ៥០ក្រុមហ៊ុន ជាមួយលោក ឡុង ណារ៉ូ អគ្គនាយករដ្ឋាករទឹកស្វយ័តក្រុងភ្នំពេញ នៅព្រឹកថ្ងៃទី ២៦ ខែវិច្ឆិកា កិច្ចប្រជុំនេះតាមរយៈប្រព័ន្ធអនឡាញនោះ (Zoom) នោះភាគីទាំងពីរបានឯកភាពបង្កើតយន្ដការកិច្ចសហប្រតិបត្តិការយ៉ាងជិតស្និទ្ធរវាងវិស័យឯកជន និងស្ថាប័នរដ្ឋ ក្នុងការបន្ដលើកកម្ពស់ខ្ពស់ការផ្គត់ផ្គង់សេវាទឹកស្អាតតាមបណ្ដាលគម្រោងអភិវឌ្ឍន៍សំណង់នីមួយៗ ។
រាជធានីភ្នំពេញប្រឈមនឹងកង្វះទឹកស្អាត ខណៈដែលតម្រូវការទឹកស្អាតមានចំនួន ៧៥៦,០០០ ម៉ែត្រគូបក្នុងមួយថ្ងៃ ហើយរោងចក្រប្រព្រឹត្តិកម្មទឹកអាចផ្គត់ផ្គង់បានតែ ៦៥០ ០០០ ម៉ែត្រគូបប៉ុណ្ណោះ ។ តាមរដ្ឋាករទឹកស្វយ័តក្រុងភ្នំពេញ នៅរោងចក្រប្រព្រឹត្តកម្មទឹកស្អាតបាក់ខែងសាងសង់រួចដែលអាចផ្គត់ផ្គង់ទឹកស្អាតបានចំនួន ១៩៥,០០០ ម៉ែត្រគូបក្នុងមួយថ្ងៃនោះបញ្ហាខ្វះទឹកស្អាតប្រើប្រាស់របស់ពលរដ្ឋនៅភ្នំពេញនឹងអាចដោះស្រាយបានច្រើន ៕
ចែករំលែកព័តមាននេះ