ក្រសួងមហាផ្ទៃ អនុញ្ញាតឲ្យអតីតអ្នកតំណាងរាស្ត្របក្សប្រឆាំងម្នាក់ទៀត បង្កើតគណបក្សថ្មី
- ភ្នំពេញ
ភ្នំពេញ៖ សម្តេចក្រឡាហោម ស ខេង ឧបបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចេញលិខិត អនុញ្ញាតឲ្យលោក ឃឹម ឡាគី…
ភ្នំពេញ៖ សម្តេចក្រឡាហោម ស ខេង ឧបបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចេញលិខិត អនុញ្ញាតឲ្យលោក ឃឹម ឡាគី អតីតអ្នកតំណាងរាស្ត្រអតីតគណបក្សប្រឆាំង បង្កើតគណបក្សថ្មីមួយ ឈ្មោះថា គណបក្សអនាគតជាតិ។ លិខិតអនុញ្ញាតនេះ ចេញនៅថ្ងៃទី២៤ ខែវិច្ឆិកា ឆ្នាំ២០២១ បន្ទាប់ពីលោក ឃឹម ឡាគី តំណាងស្ថាបនិកគណបក្សអនាគតជាតិ បានដាក់លិខិតស្នើសុំបង្កើតគណបក្សថ្មីនេះ ទៅកាន់ក្រសួងមហាផ្ទៃ កាលពីថ្ងៃទី៨ ខែវិច្ឆិកា ឆ្នាំ២០២១។
ក្នុងលិខិតចុះថ្ងៃទី២៤ ខែវិច្ឆិកា ឆ្នាំ២០២១ សម្តេចក្រឡាហោម ស ខេង បានលើកឡើងថា «ផ្អែកតាមបញ្ញត្តិមាត្រា៩ នៃច្បាប់ស្តីពីគណបក្សនយោបាយ ក្រសួងមហាផ្ទៃ សម្រេចអនុញ្ញាតឲ្យបង្កើត «គណបក្សអនាគតជាតិ» សរសេរជាអក្សរកាត់ «គ.អ.ជ» និងមានអាសយដ្ឋាននៃទីស្នាក់ការកណ្តាល ស្ថិតនៅភូមិព្រែករុន ឃុំព្រែកគយ ស្រុកស្អាង ខេត្តកណ្តាល។ ដូច្នេះដើម្បីទទួលបានសុពលភាព និងអាចធ្វើសកម្មភាពបាន ដោយស្របច្បាប់ ក្នុងឋានៈជានីតិបុគ្គល នៅក្នុងរយៈពេល ១៨០ថ្ងៃ បន្ទាប់ពីបានបង្កើតរួចហើយ គណបក្សអនាគតជាតិ ត្រូវរៀបចំបែបបទ និងបំពេញលក្ខខណ្ឌស្នើសុំចុះបញ្ជីនៅក្រសួងមហាផ្ទៃ ស្របតាមបញ្ញត្តិមាត្រា៩ មាត្រា១៨ថ្មី មាត្រា១៩ថ្មី និងមាត្រា២០ នៃច្បាប់ស្តីពីគណបក្សនយោបាយ»។
សូមរម្លឹកថា គិតត្រឹមថ្ងៃទី២៤ ខែវិច្ឆិកា ឆ្នាំ២០២១ យ៉ាងហោចណាស់ មានអតីតតំណាងរាស្ត្រ និងអតីតថ្នាក់ដឹកនាំនៃអតីតគណបក្សសង្គ្រោះជាតិ ទទួលបានសិទ្ធិធ្វើនយោបាយឡើងវិញ ចំនួន ២៦នាក់ ក្នុងចំណោម ១១៨នាក់ រួមមាន៖ ១-លោក គង់ គាំ ២-លោក គង់ បូរ៉ា ៣-លោក ស៊ីម សុវណ្ណនី ៤-លោក ច័ន្ទ សិលា ៥-លោក រៀល ខេមរិន្ទ ៦-លោកស្រី ទេព សុទ្ធី ៧-លោក កង គឹមហាក់ ៨-លោក ជីវ កត្តា ៩-លោក សុន ឆ័យ ១០-លោក តាវ គឹមឈន ១១-លោក វ៉ា សាម៉ុន ១២-លោក ស៊ុន សុភ័ក្រ ១៣-លោកស្រី លី ស្រីវីណា ១៤-លោក អ៊ូ ច័ន្ទរ័ត្ន ១៥-លោក ថាច់ សេដ្ឋា ១៦-លោក យ៉ែម បុញ្ញឫទ្ធិ ១៧-លោក មុត ចន្ថា ១៨-លោក ជុំ ច័ន្ទដារិន ១៩-លោក ទួត យឿត ២០-លោក ឡាត់ លិតេយ្យ ២១-លោក ឡុង គឹមឃន ២២-លោកស្រី យង់ ផាន់ណេត ២៣-លោក ប៉ុល ហំម ២៤-លោក ផាន់ ច័ន្ទសាក់ ២៥-លោក ឃឹម ឡាគី និង២៦-លោក ម៉ៅ សុផល។
ក្រោយទទួលបានសិទ្ធិធ្វើនយោបាយឡើងវិញ អតីតថ្នាក់ដឹកនាំ និងអតីតតំណាងរាស្ត្រនៃអតីតគណបក្សសង្គ្រោះជាតិមួយចំនួន បានចូលរួម និងបង្កើតគណបក្សថ្មី យ៉ាងហោចណាស់ ៧គណបក្ស រួមមាន៖ ១-គណបក្សឆន្ទៈខ្មែរ ដែលលោកគង់គាំ ចូលរួមដឹកនាំជាមួយកូនប្រុសពៅរបស់លោក ២-គណបក្សខ្មែរអភិរក្ស របស់ក្រុមលោក រៀល ខេមរិន្ទ្រ ៣-គណបក្សខ្មែរស្រឡាញ់ជាតិ របស់លោក ជីវ កត្តា និងលោក កង គឹមហាក់ ៤-គណបក្សកែទម្រង់កម្ពុជា របស់លោក អ៊ូ ច័ន្ទរ័ត្ន និងលោក ប៉ុល ហំម ៥-គណបក្សកម្ពុជានិយម របស់លោក យ៉ែម បុញ្ញឫទ្ធិ ៦-គណបក្សបេះដូងជាតិ ដែលមានលោក សៀម ភ្លុក ជាតំណាង និង៧-គណបក្សអនាគតជាតិ របស់លោក ឃឹម ឡាគី។
ក៏ប៉ុន្តែកាលពីថ្ងៃទី១៦ ខែវិច្ឆិកា ឆ្នាំ២០២១ សម្តេចក្រឡាហោម ស ខេង បានចេញលិខិត ជម្រាបជូនលោក សៀម ភ្លុក តំណាងស្ថាបនិកគណបក្សបេះដូងជាតិ ដោយក្រសួងមហាផ្ទៃ សម្រេចបដិសេធក្នុងការសុំចុះបញ្ជីរបស់គណបក្សបេះដូងជាតិ។ មូលហេតុ ក្រសួងមហាផ្ទៃ លើកឡើងថា ដោយសារតែការផ្តិតស្នាមមេដៃរបស់សមាជិកគណបក្សបេះដូងជាតិ ដើម្បីគាំទ្រក្នុងការសុំចុះបញ្ជីមានចេតនាទុច្ចរិត ដោយមានការផ្តិតស្នាមមេដៃជំនួស ការក្លែងបន្លំអត្តសញ្ញាណបុគ្គល និងការផ្តិតធ្វើឲ្យខូចគុណភាព ដើម្បីបង្កើនបរិមាណចំនួនសមាជិក ព្រមទាំងខ្លឹមសារប្រការមួយចំនួន នៃលក្ខន្តិកៈគណបក្សផ្ទុយនឹងបទប្បញ្ញត្តិ នៃច្បាប់ស្តីពីគណបក្សនយោបាយផងដែរ៕
ចែករំលែកព័តមាននេះ