ចៅក្រមសាលាដំបូង ខេត្ត បានកោះហៅប្រជាពលរដ្ឋចំនួន៦គ្រួសារ ដែលជាប់ចោទពីបទចូលទៅកាន់កា.ប់ដីសហគមន៍ព្រៃឈើចម្ការកូនគគីរ ស្ថិតក្នុងភូមិ
ខេត្តស្វាយរៀង ៖ ចៅក្រមសាលាដំបូង ខេត្ត បានកោះហៅប្រជាពលរដ្ឋចំនួន៦គ្រួសារ ដែលជាប់ចោទពីបទចូលទៅកាន់កាប់ដីសហគមន៍ព្រៃឈើចម្ការកូនគគីរ ស្ថិតក្នុងភូមិត្រពាំងផ្លុង សង្កាត់បាទី ក្រុងបាវិត ដើម្បីបើកសវនាការនៅព្រឹកថ្ងៃទី២៣ ខែវិច្ឆិកា ឆ្នាំ២០២១ ។
ក្រោយពីធ្វើការសាកសួរដេញដោលប្រមាណ២ម៉ោង តុលាការក៏លើកពេលសវនាការ ហើយបានជំរុញឲ្យអាជ្ញាធរ និងស្ថាប័នពាក់ព័ន្ធសម្របសម្រួលដោះស្រាយក្រៅប្រព័ន្ធតុលាការ តាមសំណើរបស់លោកមេធាវីការពារក្តី ដើម្បីឲ្យប្រជាពលរដ្ឋ៦គ្រួសារនោះបានរស់នៅលើដីលំនៅឋាន ដែលពួកគាត់កំពុងរស់នៅសព្វថ្ងៃដោយស្របច្បាប់ ។
ទាក់ទិននឹងករណីនេះ លោក សេង សិលា អភិបាលរងខេត្ត បានថ្លែងប្រាប់អ្នកសារព័ត៌មានថា តុលាការបានលើកពេលសវនាការ ហើយរុញករណីនេះមកឲ្យអាជ្ញាធរខេត្តសម្របសម្រួលដោះស្រាយក្រៅប្រព័ន្ធតុលាការ ដោយលោកមេធាវីការពារក្តីឲ្យប្រជាពលរដ្ឋបានដាក់ពាក្យស្នើសុំឲ្យសាលាខេត្តសម្របសម្រួលដោះស្រាយ ឆ្វៀលដីឲ្យប្រជាពលរដ្ឋ៥-៦គ្រួសារបានកាន់កាប់រស់នៅស្របច្បាប់ ។ ឯការសម្រេចថាឲ្យឬមិនឲ្យ ពុំមែនជាសមត្ថកិច្ចរបស់អាជ្ញាធរខេត្តទេ គឺដីនេះជាដីព្រៃឈើត្រូវអភិរក្ស គ្រប់គ្រងដោយក្រសួងកសិកម្ម រុក្ខាប្រមាញ់ និងនេសាទ ។ករណីនេះដែរ រដ្ឋបាលខេត្តបានធ្វើរបាយការណ៍សុំគោលការណ៍ទៅក្រសួងកសិកម្ម ដូច្នេះការសម្រេចឲ្យឬមិនឲ្យគឺលើក្រសួងជាអ្នកសម្រេច ។ រដ្ឋបាលខេត្តគ្រាន់តែសម្របសម្រួលមើលច្បាប់ និងការចូលកាន់កាប់របស់ប្រជាពលរដ្ឋត្រូវតាមលក្ខខណ្ឌនៃច្បាប់ឬយ៉ាងណា ?
កាលពីដើមឆ្នាំ២០២១ រដ្ឋបាលខេត្តបានបង្កើតក្រុមការងារ សហការជាមួយអាជ្ញាធរមូលដ្ឋាន និងស្ថាប័នពាក់ព័ន្ធចុះសិក្សាស្រាវជ្រាវឃើញថា ពុំមែនមានតែ៦គ្រួសារទេ គឺមានប្រជាពលរដ្ឋជាច្រើនគ្រួសារផ្សេងទៀត បានកាន់កាប់ដីលើសចូលទៅក្នុងដីព្រៃសហគមន៍ ។ ក្រសួងកសិកម្មបានស្នើឲ្យខេត្តចុះវាស់វែងព្រំប្រទល់ដីព្រៃ ដើម្បីចុះបញ្ជី«ដីព្រៃសហគមន៍ចម្ការកូនគគីរ» ហើយក្រុមការងារបានរៀបចំចុះវាស់វែងកំណត់ព្រំដីព្រៃ ក៏ប៉ុន្តែដោយមានភ្លៀងធ្លាក់ទឹកច្រើនទើបផ្អាក ។
លោក សេង សិលា បន្តទៀតថា នៅតាមបណ្តោយផ្លូវជាតិលេខ១ តាមអនុក្រឹត្យកំណត់១៣០ម៉ែត្រពីអក្សផ្លូវ គឺជាដីសហគមន៍ព្រៃឈើចម្ការកូនគគីរ ដែលមានទំហំ៤០៤ហិកតា ។ ចំពោះប្រជាពលរដ្ឋដែលរស់នៅតាមដងផ្លូវជាតិលេខ១ជាច្រើនគ្រួសារ បានកាន់កាប់ដីលើសចូលទៅក្នុងដីព្រៃអភិរក្ស ។ ចំណែកប្រជាពលរដ្ឋចំនួន៦គ្រួសារ គឺពិនិត្យឃើញថា ពិតជាមានការខ្វះខាតមែន គ្មានដីសង់លំនៅឋាននិងគ្មានដីស្រែទេ ហើយរដ្ឋបាលខេត្តបានសម្របសម្រួលផ្តល់ដីសម្បទានសង្គមកិច្ចនៅកន្លែងផ្សេង ក៏ប៉ុន្តែពួកគាត់មិនព្រម ពួកគាត់សុំចង់រស់នៅលើដីដែលពួកគាត់រស់នៅសព្វថ្ងៃ ចង់នៅដីក្នុងក្រុង ។ ចំណែកនៅស្រុករមាសហែក ប្រជាពលរដ្ឋបានរស់នៅកាន់កាប់អាស្រ័យផលលើដីរបស់រដ្ឋ អាជ្ញាធរខេត្តបានសុំគោលការណ៍ទៅក្រសួងផ្តល់ដីសម្បទានសង្គមកិច្ច កាត់ឆ្វៀលផ្តល់ជូនប្រជាពលរដ្ឋរួចហើយ ។
ចំពោះប្រជាពលរដ្ឋ៦គ្រួសារនេះ គឺនៅពេលទឹកស្រក ក្រុមការងារមន្ទីរជំនាញពាក់ព័ន្ធនឹងចុះវាស់វែងកំណត់ព្រំដីព្រៃសហគមន៍ដើម្បីចុះបញ្ជី និងធ្វើរបាយការណ៍រៀបចំគោលការណ៍ស្នើសុំទៅក្រសួងកសិកម្ម សម្របសម្រួលដោះស្រាយបញ្ចប់វិវាទប្រជាពលរដ្ឋពាក់ព័ន្ធឲ្យចប់ជាមួយគ្នា ហើយលទ្ធផលយ៉ាងណានោះ គឺជាការសម្រេចរបស់ក្រសួងកសិកម្ម ។
ចំណែកប្រជាពលរដ្ឋវិញបានឲ្យដឹងថា ពួកគាត់៦គ្រួសារ បានកាន់កាប់ដីសង់លំនៅឋានសព្វថ្ងៃនេះ គឺ១គ្រួសារទំហំ១០ម៉ែត្រគុណ២០ម៉ែត្រ ខ្លះ១០ម៉ែត្រគុណ៣០ម៉ែត្រ សម្រាប់សង់ផ្ទះខ្ទមរស់នៅ និងដាំបន្លែផ្គត់ផ្គង់ជីវភាព ។ មុខរបររដូវប្រាំងគោះពងអង្ក្រងលក់ ដើមខែវស្សាដកផ្សិតផ្ចាក់ ពេលមានទឹករកត្រី កូនៗធ្វើការនៅរោងចក្រ គ្រាន់បានប្រាក់ផ្គត់ផ្គង់ជីវភាពប្រចាំថ្ងៃប៉ុណ្ណោះ ៕
ចែករំលែកព័តមាននេះ