ត្រឹមពាក្យសម្តីក្លាយជាជម្លោះ បុរសម្នាក់ត្រូវចាប់ខ្លួន
- តាកែវ
នគរបាលស្រុកបាទី បានឃាត់ខ្លួនបុរសម្នាក់ និងកសាងសំណុំរឿងបញ្ជូន ទៅកាន់ការិយាល័យព្រហ្មទណ្ទកម្រិតធ្ងន់ខេត្ត ដើម្បីចាត់ការបន្ត ក្រោយពីជននេះ
ខេត្តតាកែវ ៖ នគរបាលស្រុកបាទី បានឃាត់ខ្លួនបុរសម្នាក់ និងកសាងសំណុំរឿងបញ្ជូន ទៅកាន់ការិយាល័យព្រហ្មទណ្ទកម្រិតធ្ងន់ខេត្ត ដើម្បីចាត់ការបន្ត ក្រោយពីជននេះបានយកកាំបិតកា.ប់ជនរងគ្រោះ ខណៈពេលមានទំនាស់ពាក្យសម្ដីគ្នាបន្តិចបន្តួច កាលពីថ្ងៃទី២១ ខែវិច្ឆិកា ឆ្នាំ២០២១កន្លងទៅ វេលាម៉ោងប្រហែល៧និង៥០នាទីយប់ ស្ថិតនៅភូមិតាស៊ូ ឃុំត្រពាំងសាប ស្រុកបាទី ។
លោក ឆាយ កែវមុន្នី អធិការនគរបាលស្រុកបាទីបានឱ្យដឹងថា បុរសខាងលើឈ្មោះ តេម ណុប ហៅប៉ុយ អាយុ២៧ឆ្នាំ មុខរបរមិនពិតប្រាកដ មានទីលំនៅក្នុងភូមិ ឃុំខាងលើ ។ រីឯអ្នកដែលត្រូវជននេះកា.ប់ឈ្មោះ ខឹម សួន ភេទស្រី អាយុ៧៧ឆ្នាំ ជាកសិករ រស់នៅក្នុងភូមិ-ឃុំជាមួយគ្នា បានរងរបួសកដៃឆ្វេងរហូតប្រេះឆ្អឹងកដៃ ។
លោកអធិការបន្តថា មូលហេតុដែលនាំឲ្យមានអំពើហិង្សានេះកើតឡើង គឺដោយសារជនសង្ស័យ និងជនរងគ្រោះស្រវឹងស្រាដូចគ្នា ហើយទាស់ពាក្យសម្តីគ្នា ។ ក្រោយកើតហេតុ ជនសង្ស័យបានគេចខ្លួនបាត់ស្រមោល លុះមកដល់ថ្ងៃទី២២ ខែវិច្ឆិកា ឆ្នាំ២០២១ វេលាម៉ោងប្រមាណ១១ព្រឹក ក៏ត្រូវនគរបាលស្រុកស្រាវជ្រាវរកឃើញ និងឃាត់ខ្លួននៅភូមិតាស៊ូ ឃុំត្រពាំងសាប ។ បន្ទាប់ពីឃាត់ខ្លួន សមត្ថកិច្ចក៏បានដកហូតវត្ថុតាងកាំបិតចែតដងឈេី១ រួចបញ្ជូនមកអធិការដ្ឋាននគរបាលស្រុក និងកសាងសំណុំរឿងបញ្ជូនបន្តទៅស្នងការដ្ឋាននគរបាលខេត្តទៀត ។
នៅចំពោះមុខសមត្ថកិច្ច ជនសង្ស័យសារភាពថា រូបគេពិតជាបានកាប់ជនរងគ្រោះប្រាកដមែន ហើយក៏បានបញ្ជូនទៅសាលាដំបូងនៅថ្ងៃទី២២ ខែវិច្ឆិកា ឆ្នាំ២០២១ ៕
ចែករំលែកព័តមាននេះ