រាជធានីភ្នំពេញ ៖ អឺរ៉ុបនៅតែជាទីផ្សារសំខាន់សម្រាប់ម្រេចកំពតដែលមានគុណភាពល្អ តម្លៃខ្ពស់ ខណៈដែលប្រទេសចិនទោះជាបានទទួលទិញកសិផលខ្មែរជាច្រើនមុខក្តី តែចិននៅមិនទានហ៊ានទិញម្រេចកំពតទទួលទាននោះទេ ។ លោក ងួន ឡាយ ប្រធានសមាគមលើកកម្ពស់ម្រេចកំពត បានឲ្យដឹងថា សម្រាប់ប្រទេសចិន ភាគច្រើនទទួលទិញម្រេចដែលដាំដុះនៅខេត្តផ្សេងៗប៉ុណ្ណោះ ប៉ុន្តែសម្រាប់ទីផ្សារម្រេចកំពត បន្ទាប់ពីលោកបានជួបក្រុមហ៊ុនជាច្រើន ដើម្បីសិក្សានាំចេញ គឺមិនមានទេ ពីព្រោះពួកគាត់មិនហ៊ានទទួលដោយសារម្រេចកំពតមានតម្លៃថ្លៃ ដែលខុសពីម្រេចមកពីខេត្តដទៃ ដូចជា ៖ មេមត់ រតនគិរី មណ្ឌលគិរី នោះ ។
ម្រេចខេត្តផ្សេងក្រៅពីខេត្តកំពត មានតម្លៃពី ២ ទៅ ៤ ដុល្លារ ក្នុង ១ គីឡូក្រាម ចំណែកម្រេចកំពត គ្រាន់តែម្រេចខ្មៅតម្លៃ ១៥ដុល្លារ ម្រេចក្រហម ២៥ដុ ល្លារ និងម្រេចស ២៨ ដុល្លារក្នុងមួយគីឡូក្រាម ។ ម្រេចកំពតជាផលិតផលសម្គាល់ភូមិសាស្ត្រ និងទទួលស្គាល់គុណភាពដោយសហគមន៍អឺរ៉ុប ។ លោក ងួន ឡាយ និយាយថា ម្រេចកំពតដែលនាំចេញទៅចិន បើសម្រាប់ជាបញ្ជើរ មានប្រមាណពី ៤ ទៅ ១០ គីឡូក្រាម តែបើសម្រាប់ធ្វើពាណិជ្ជកម្ម គឺមិនមានទេ ដោយសារតម្លៃថ្លៃ ។ «ទីផ្សារដែលយើងធ្វើបានកន្លងមក មានតែទៅខាងប៉ែកអឺរ៉ុប មាន ៖ អង់គ្លេស អាល្លឺម៉ង់ និងអាម៉េរិក ហុងកុង តៃវ៉ាន់ ជប៉ុន ជាដើម ។ បច្ចុប្បន្នកម្ពុជាកំពុងសិក្សាបន្ថែមទៀតទីផ្សារនៅអ៊ុយក្រែន» ។
នៅក្នុងបរិបទកូវីដ ១៩ ម្រេចកំពតនៅតែមានទីផ្សារល្អដដែល ដោយសារម្រេចកំពតនៅតែរក្សាបាននូវគុណភាពល្អ ហើយមានការទទួលស្គាល់ជាលក្ខណៈអន្តរជាតិ ។ ទាក់ទិននឹងគោលនយោបាយរវាងរដ្ឋាភិបាលកម្ពុជា និងចិន ជាពិសេសរាល់អ្វីដែលជាកិច្ចសន្យាពាណិជ្ជកម្មប្រទេសទាំងពីរនោះ ប្រធានសមាគមលើកកម្ពស់ម្រេចកំពត បានស្វាគមន៍និងគាំទ្រលើទស្សនវិស័យអនាម័យ និងភូតគាមអនាម័យ ដើម្បីរៀបចំផលិតផលនាំចេញទៅចិន ។
លោក អុន ប៊ុត អ្នកដាំម្រេចកំពតមួយរូបបានឱ្យដឹងថា កាលមួយរយៈពេលមុនទីផ្សារម្រេចកំពតហាក់មានបញ្ហាបន្តិច ធ្វើឱ្យកសិករត្រូវរកទីផ្សារសម្រាប់លក់ដោយខ្លួនឯង តែក្រោយមកក៏មានក្រុមហ៊ុនមួយឈ្មោះថា EU Land បានសន្យាជួយទិញម្រេចពីកសិករក្នុងខេត្តកំពត ដែលធ្វើឱ្យទីផ្សារម្រេចកំពតមានទីផ្សារឡើងវិញ ។ លោកបន្តថា ក្រុមហ៊ុននេះ នឹងទិញម្រេចពីកសិករទៅកាន់ទីផ្សារអឺរ៉ុបដោយផ្ទាល់ ហើយឆ្នាំដំបូងៗពួកគេទិញក្នុងបរិមានតិចតួចបន្ទាប់មកគេនឹងបង្កើនបរិមាណទំនិញកាន់តែច្រើនឡើងៗថែមទៀត ។
លោក អុន ប៊ុត ជឿជាក់ថា ទីផ្សារម្រេចកំពត ជាពិសេសម្រេចកំពត នឹងមានទីផ្សារឡើងវិញបន្ទាប់ពីស្ងប់ស្ងាត់អស់មួយរយៈ ពេលកន្លងមកដែលបណ្តាលមកពីជំងឺកូវីដ ១៩ ផងនោះ ៕
ចែករំលែកព័តមាននេះ