តម្លៃប្រេងឆៅបានធ្លាក់ចុះកាលពីថ្ងៃទី២ ឧសភា ដោយសារការបង្កើនផលិតកម្មរបស់អង្គការបណ្តាប្រទេសនាំប្រេងចេញ OPEC ក្នុងខែមេសា ។
OPEC បានបង្កើនផលិតកម្មប្រេងឆៅ៤៨៤.០០០ធុងថែមទៀតក្នុងមួយថ្ងៃ ដោយឡើងដល់៣៣,២១៧លានធុងក្នុងមួយថ្ងៃ កាលពីខែមេសា ។ អីុរ៉ង់ និងអីុរ៉ាក់ ជាសមាជិកសំខាន់២របស់ OPEC បានបង្កើនជាពិសេសផលិតកម្មប្រេងឆៅរបស់ពួកគេក្នុងខែមេសា ។
អ្នកនាំពាក្យក្រសួងប្រេងកាតអីុរ៉ាក់លោក ASSEM JIHAD ថ្លែងកាលពីថ្ងៃទី១ ឧសភា ថា ការនាំចេញប្រេងរបស់អីុរ៉ាក់បានបង្កើនប្រមាណជា២,៣%ក្នុងខែមេសា បើប្រៀបធៀបទៅនឹងខែមុននេះ ដែលដល់ជាមធ្យម៣,៣៦៤លានធុងក្នុងមួយថ្ងៃ។
បណ្តាប្រទេសផលិតប្រេងឆៅសំខាន់ៗដែលរួមប្រជុំគ្នាកាលពីថ្ងៃទី១៧ មេសា កន្លងមកនេះ នៅទីក្រុងដូហា ប្រទេសកាតា ពុំអាចសម្រេចបានកិច្ចព្រមព្រៀងស្តីពីការផ្អាកកូតាផលិតកម្មប្រេងជាសាកលរបស់ OPEC ឡើយ ដែលញ៉ាំងឱ្យតម្លៃប្រេងបន្តចុះថែមទៀត ។
នៅទីផ្សារប្រេងក្រុងញូវយ៉ក តម្លៃប្រេងឆៅបានចុះថយ១,១៤ដុល្លារទៀត មកនៅត្រឹម៤៤,៧៨ដុល្លារ ក្នុងមួយធុង ។ នៅទីផ្សារប្រេងក្រុងឡុងដ៍ប្រេងឆៅធ្លាក់ចុះ១,៥៤ដុល្លារមកនៅត្រឹម៤៥,៨៣ដុល្លារក្នុងមួយធុង ៕
ចែករំលែកព័តមាននេះ