រាជធានីភ្នំពេញ ៖ កម្ពុជារំពឹងថា នឹងទទួលបានកំណើនសេដ្ឋកិច្ចជាង ៥% នៅឆ្នាំក្រោយ បន្ទាប់ពីវិបត្តិកូវីដ ១៩ ធ្ងន់ធ្ងរក្នុងរយៈពេលជាងពីរឆ្នាំ ដែលធ្វើឲ្យកំណើនសេដ្ឋកិច្ចដែលធ្លាប់ឡើងដល់ ៧% បានធ្លាក់មកនៅក្រោមដកសូន្យនោះ ។ ក្នុងពិធីសម្ពោធដាក់ឲ្យប្រើប្រាស់ស្ពានឆ្លងកាត់ទន្លេមេគង្គរវាងនៅខេត្តកំពង់ចាម និងខេត្តត្បូងឃ្មុំ នាព្រឹកថ្ងៃទី ២៣ ខែវិច្ឆិកាឆ្នាំ ២០២១ នេះ សម្តេចនាយករដ្ឋមន្ត្រីថា មានការព្យាករណ៍ខ្លះថា កំណើនសេដ្ឋកិច្ចកម្ពុជាមានដល់ជាង ៦% ប៉ុន្តែសម្តេចរំពឹងត្រឹមជាង ៥% ។
ការរំពឹងរបស់ប្រមុខរដ្ឋាភិបាលដោយសារសកម្មភាពសេដ្ឋកិច្ចកម្ពុជានៅមានលក្ខណៈល្អប្រសើរ ។ ក្នុងនោះវិស័យកសិកម្ម មិនត្រឹមមិនប៉ះពាល់ដោយសារកូវីដ ១៩ នោះទេ ថែមទាំងមានសន្ទុះក្នុងការនាំចេញកសិផលទៀត ។ ចំណែកស្រូវនៅឆ្នាំនេះបានដាំដុះបានជាង ១១០% ។ ចំពោះវិស័យឧស្សាហកម្ម ទោះបីមានការប៉ះពាល់ ប៉ុន្តែក៍មានគម្រោងវិនិយោគថ្មីបានចូលកជំនួស ហើយវិស័យសេវាដែលប៉ះពាល់ពីកូវីដ ១៩ ខ្លាំងជាងគេនោះ គឺវិស័យទេចរណ៍នោះ ។ ទេសចរណ៍បានរស់ឡើងវិញ នៅពេលបុណ្យអុំទូកកន្លងទៅនេះ ដោយសារសកម្មភាពដើរកម្សាន្តរបស់ពលរដ្ឋក្នុងស្រុក និងជនបរទេសដែលកំពុងស្នាក់នៅកម្ពុជា ១ ម៉ឺននាក់នោះ ។
តាមពិតទៅកន្លងមកស្ថាប័នហិរញ្ញវត្ថុធំៗ ក្នុងនោះមានធនាគារពិភពលោក មូលនិធិរូបិយវត្ថុអន្តរជាតិ រួមនឹងធនាគារអភីវឌ្ឍន៍អាស៊ី ក៍បានព្យាការណ៍ពីកំណើនសេដ្ឋកិច្ចកម្ពុជានៅឆ្នាំ ២០២២ នោះដែរ ។ សម្រាប់ ADB រំពឹងថា កំណើនសេដ្ឋកិច្ចកម្ពុជា នឹងងើបឡើងវិញក្នុងកម្រិត ៥,៥% នៅឆ្នាំ ២០២២ ប្រហាក់ប្រហែលនឹង IMF ដែរ ។
មុនផ្ទុះកូវីដ ១៩ នៅចុងឆ្នាំ ២០១៩ កម្ពុជាទទួលបានកំណើនសេដ្ឋកិច្ចរង្វង់ ៧% ជាប់គ្នាការរំពឹងថា នឹងមានកំណើនជាង ៥% នៅឆ្នាំ ២០២២ ជាសញ្ញាមួយបង្ហាញពីការឆ្ពោះទៅរកអត្រា ៧% វិញនៅពេលខាងមុខ ។ ជាមួយក្តីរំពឹងថា កំណើនសេដ្ឋកិច្ចខ្មែរនឹងងើបវិញនៅឆ្នាំ ២០២២ ក្នុងរង្វង់ប្រមាណ ៥% សម្រាប់ IMF ដោយសារការរំពឹងទុកការបន្តងើបឡើងនៃតម្រូវការសកល ការបន្តសក្តានុពលកំណើន នៃវិស័យកាត់ដេរ និងវិស័យកម្មន្តសាលមិនមែនកាត់ដេរ និងការកើនឡើងសន្សឹមៗ នៃវិស័យគាំទ្រផ្សេងទៀត ព្រមទាំងប្រសិទ្ធភាព នៃការដាក់ចេញវិធានការគោលនយោបាយរបស់រាជរដ្ឋាភិបាល ជាពិសេស «ផែនការស្តារសេដ្ឋកិច្ចឡើងវិញក្រោយវិបត្តិជំងឺកូវីដ-១៩» ។
ជាការកត់សម្គាល់ថា ការនាំកសិផលនៅ ៩ ខែ ឆ្នាំ ២០២១ នេះមានការនាំចេញអង្ករមានចំនួន ៣៤៩ លានដុល្លារ ការនាំចេញស្រូវមានចំនួន ៤២៨ លានដុល្លារ និងការនាំចេញកសិផលក្រៅពីស្រូវ-អង្ករ មានចំនួន ២ ៧១០ លានដុល្លារអាមេរិក ។ ក្រសួងកសិកម្មបញ្ជាក់ថា ការនាំចេញកសិផលសរុបក្នុងរយៈពេល ៩ ខែ ឆ្នាំ ២០២១ មានកំណើនចំនួន ៨៨,៤៨% ក្នុងនោះកសិផល ក្រៅពីអង្ករមានការកើនឡើងចំនួន ១០៧,៦៩% រីឯការនាំចេញអង្ករមានការថយចុះចំនួន -១៥,៩៧% ដោយសារ កម្ពុជាជួបបញ្ហាប្រឈមនឹងកង្វះប្រភេទទូរកុងតេន័រដែលមានទំហំ ២០ ហ្វីតសម្រាប់ផ្ទុកអង្ករ និងតម្លៃដឹកជញ្ជូនកើនឡើង ៕
ចែករំលែកព័តមាននេះ