រាជធានីភ្នំពេញ ៖ ក្នុងឱកាសព្រះរាជពិធីបុណ្យអុំទូក អកអំបុក និងសំពះព្រះខែ បីថ្ងៃមកនេះ ប្រតិបត្តិករទេសចរណ៍ ដែលបានទទួលភ្ញៀវទេសចរយ៉ាងច្រើននោះបានខិតខំបម្រើសេវាដល់ភ្ញៀវយ៉ាងយកចិត្តទុកដាក់ ក្រោយពីអាជីវកម្មរបស់ខ្លួនបានជូបវិបត្តិប្រមាណ ២ ឆ្នាំដោយសារកូវីដ ១៩ នោះ ។ លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានមានប្រសាសន៍ថា នៅក្នុងកំលុងពេលឈប់សម្រាក ៣ ថ្ងៃនៃព្រះរាជពិធីបុណ្យអុំទូកនេះ ភ្ញៀវទេសចរបានចេញដើរកម្សាន្ត បាចសាចពាសពេញប្រទេសទាំងតំបន់សមុទ្រ តំបន់អេកូទេសចរណ៍ និងតំបន់ទេសចរណ៍វប្បធម៌ ។
លោកស្រីបញ្ជាក់ថា នៅពេលនេះ អាជីវកម្មទេសចរណ៍ក៏បានខិតខំប្រឹងប្រែងស្ដារអាជីវកម្មដើម្បីបម្រើដល់ភ្ញៀវទេសចរក្នុងស្រុកដែលបានចេញធ្វើដំណើរកម្សាន្តពាសពេញប្រទេស ។ «ដោយសារភ្ញៀវទេសចរចេញធ្វើដំណើរកម្សាន្តច្រើន ប្រតិបត្តិករទេសចរណ៍ក៏បានហៅបុគ្គលិកបម្រើសេវាទេសចរណ៍មកចូលបម្រើការឡើងវិញក្រោយពីបានផ្អាកអស់មួយរយៈធំ ដូច្នេះសរុបមកការចេញដើរកម្សាន្តរបស់ភ្ញៀវទេសចរក្នុងស្រុងយើងនាពេលនេះ ក៏បានផ្ដល់ក្ដីសង្ឃឹមឡើងវិញដល់វិស័យទេសចរណ៍ផ្ដល់ឱកាសការងារ និងប្រាក់ចំណូលដល់ប្រជាពលរដ្ឋឡើងវិញផងដែរ» ។
លោក ថោង ខុន រដ្ឋមន្ត្រីក្រសួងទេសចរណ៍ ឲ្យដឹងថាថ្ងៃឈប់រយៈពល៣ថ្ងៃ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ត្រូវនឹងថ្ងៃទី ១៨-២០ ខែវិច្ឆិកា ឆ្នាំ ២០២១ ភ្ញៀវទេសចរដែលចេញដើរកម្សាន្តនៅទូទាំងប្រទេសមានចំនួនសរុប៩១០,១៥០ នាក់ ក្នុងនោះភ្ញៀវជាតិមានចំនួន ៨៩៩,៨៦៩ នាក់ និងភ្ញៀវបរទេសផ្ទៃក្នុង ១០,២៨១ នាក់ ។
ចលនាពលរដ្ឋដើរកម្សាន្តពេលអ៊ុទូកនេះ បានលោកស្រី ឆាយ ស៊ីវលីន ជឿជាក់ថា អំណេះតទៅ នៅពេលមានបុណ្យទាន ឬថ្ងៃឈប់សម្រាក អាជីវកម្មទេសចរណ៍ទាំងឡាយ នឹងអាចដំណើរការឡើងវិញ ហើយអាជីវកម្មដែលមិនទាន់បានបើកក៏បានខិតខំរកផែន ការក្នុងការស្ដារអាជីវកម្មរបស់ខ្លួន និងកំពុងមមាញឹកក្នុងការជួសជុលទីតាំង ជាមួយនឹងសេចក្ដីសោកស្ដាយដែលមិនអាចបើកដំណើរការ ដើម្បីទទួលភ្ញៀវនៅក្នុងថ្ងៃឈប់សម្រាកបុណ្យអុំទូកនេះ ។
លោកស្រីបន្តទៀតថា ការចេញដើរហើររបស់ភ្ញៀវទេសចរក្នុងស្រុកនាឱកាសប៉ុន្មានថ្ងៃកន្លងមកនេះ វាហាក់បីដូចជាអបអរដល់ការប្រកាសរបស់ប្រមុខរាជរដ្ឋាភិបាលក្នុងការបើកប្រទេស បើកឱ្យភ្ញៀវទេសចរចាក់វ៉ាក់សាំងរួចចូលមកទស្សនានៅក្នុងប្រទេសកម្ពុជាផងដែរ ៕
ចែករំលែកព័តមាននេះ