រាជធានីភ្នំពេញ ៖ ខណៈការប្រកួតនៅថ្ងៃសៅរ៍កាន់តែកៀកមកដល់នោះ គេកត់សម្គាល់ថា កីឡាករកម្ពុជា២រូបគឺ ឃីម បូរ៉ា និងសុខ សុវណ្ណ ដែលសុទ្ធតែជាជើងខ្លាំងនៅក្នុងពិភពប្រដាល់នៃប្រទេសកម្ពុជា ហាក់មានការប្រុងប្រយ័ត្នយ៉ាងខ្លាំង ។
រាជធានីភ្នំពេញ ៖ ខណៈការប្រកួតនៅថ្ងៃសៅរ៍កាន់តែកៀកមកដល់នោះ គេកត់សម្គាល់ថា កីឡាករកម្ពុជា២រូបគឺ ឃីម បូរ៉ា និងសុខ សុវណ្ណ ដែលសុទ្ធតែជាជើងខ្លាំងនៅក្នុងពិភពប្រដាល់នៃប្រទេសកម្ពុជា ហាក់មានការប្រុងប្រយ័ត្នយ៉ាងខ្លាំង ។ បើយោងតាមការអះអាងរបស់គ្រូបង្វឹក និងអ្នករៀបចំកម្មវិធី គឺកីឡាករទាំងពីរហាក់មានទំនុកចិត្តជាងមុនសម្រាប់ស្វាគមន៍កីឡាករថៃជាគូប្រកួត ។
លោក ហេង ប៊ុនឃីម ជាគ្រូបង្វឹកប្រចាំក្លិបរស្មីភូមិគាបខេត្តបន្ទាយមានជ័យបានអះអាងថា កូនសិស្សរបស់ខ្លួនគឺឃីម បូរ៉ា មិនដែលបានដើរទៅណាឱ្យឆ្ងាយពីការហ្វឹកហាត់នោះទេ ដោយលោកបញ្ជាក់ថាបើទោះជាកីឡាករវ័យក្មេងរូបនេះ មានសមត្ថភាពនិងមានកម្លាំងពេញខ្លួនប្រកបដោយភាពជឿជាក់ក៏គេនៅតែមានការប្រយ័ត្នប្រយែងខ្ពស់សម្រាប់ការចូលក្លិបហ្វឹកហាត់មុនថ្ងៃប្រកួតចាប់ផ្ដើមដែរ ។ លោកថា នៅថ្ងៃសៅរ៍ទី៣០ មេសា នេះ កីឡាករ ឃីម បូរ៉ា នឹងប៉ះជាមួយកីឡាករថៃនៅលើសង្វៀនទូរទស្សន៍អាស៊ីអាគ្នេយ៍(SEA-TV)ក្នុងពេលរសៀលដែលមានឈ្មោះថា យ៉ត ស៊ីង ដែលជាជើងខ្លាំងម្នាក់ ។ ការប្រឹងប្រែងរបស់កូនសិស្សលោកគឺដើម្បីកុំឱ្យស្ពឹកស្រពន់ដៃជើង និងដើម្បីបំប៉នកម្លាំងឲ្យកាន់តែមានសមត្ថភាពក្រោយការរំលឹកក្បាច់គុនបានល្អ។ យ៉ាងណាក៏ដោយ លោកហាក់មិនហ៊ានរំពឹងណាស់ណានោះទេ ចំពោះជ័យជម្នះរបស់កីឡាករ ឃីម បូរ៉ា ដោយសារតែគូប្រកួតរបស់គេក៏ល្អមិនធម្មតាដែលមិនអាចមើលស្រាលដោយគ្រាន់តែមានទំនុកចិត្តចំពោះការប្រុងប្រយ័ត្នរបស់កូនសិស្សជាងមុនបន្តិចនោះ ។
លោកនៅតែយល់ឃើញការប្រកួតចាញ់ឈ្នះស្ថិតនៅលើសំណាងហេងស៊យ គឺមិនអាចកំណត់ថាការហ្វឹកហាត់ដែលបានត្រៀមខ្លួនរបស់កូនសិស្ស នឹងអាចឱ្យកីឡាកររូបនេះ មានជ័យជម្នះនោះទេ ដោយសារតែកីឡាករថៃក៏ពិតជាបានត្រៀមខ្លួនក្នុងរយៈពេលមុនប្រកួតបែបនេះដូចគ្នា ។ លោកថា កីឡាករឃីម បូរ៉ា និងកីឡាករ យ៉ត ស៊ីង ស្ថិតនៅផ្លូវឆ្ងាយក្នុងការធ្វើដំណើរមិនខុសគ្នានោះទេ ដោយសារតែកូនសិស្សរបស់លោកត្រូវធ្វើដំណើរចុះពីខេត្តបន្ទាយមានជ័យដែលជាប់នឹងព្រំដែនថៃ ហើយកីឡាករថៃក៏ត្រូវធ្វើដំណើរចេញពីថៃមកកាន់រាជធានីភ្នំពេញ។ ប៉ុន្តែបញ្ហាសុខភាពថាអ្នកណានឹងអាចធ្វើដំណើរផ្លូវឆ្ងាយបានល្អជាងក៏ជារឿងចម្បងដែលនឹងផ្ដល់លទ្ធផលខុសគ្នាផងដែរ ។ មិនខុសគ្នាពីការអះអាងរបស់ប្រធានក្លិបល្បីឈ្មោះមួយនេះ លោកញាណ សុធី អ្នករៀបចំកម្មវិធីប្រដាល់ប្រចាំនៅប៉ុស្ដិ៍អាស៊ីអាគ្នេយ៍ក៏យល់ឃើញស្រដៀងគ្នានោះដែរ ។ លោកនិយាយថា បញ្ហាធ្វើដំណើររបស់កីឡាករឃីម បូរ៉ា និងកីឡាករថៃមិនសូវខុសគ្នានោះទេ ប៉ុន្តែអ្វីដែលខុសគ្នាគឺត្រង់ការហ្វឹកហាត់ដិតដល់ និងបញ្ហាកម្លាំងថាមពលក្នុងពេលមកដល់ភ្នំពេញប៉ុណ្ណោះ ។
លោកនិយាយថា៖«ការពិត កីឡាករពីរនាក់ហ្នឹងកម្លាំងក៏ប្រហែលគ្នា ការធ្វើដំណើរផ្លូវឆ្ងាយក៏មិនខុសគ្នា ហើយការហ្វឹកហាត់ត្រៀមទុកក៏មើលទៅមិនខុសគ្នានោះដែរប្រសិនបើបូរ៉ាពិតជាបានហ្វឹកហាត់ច្រើនមែន ។ សម្រាប់ខ្ញុំពីរនាក់ហ្នឹងគឺសមត្ថភាពប្រហែលគ្នា លើកលែងតែសុខភាពរបស់អ្នកណាម្នាក់ដែលធ្វើដំណើរផ្លូវឆ្ងាយមានបញ្ហាប៉ះពាល់ចាញ់អាកាសធាតុប៉ុណ្ណោះទើបនឹងធ្វើឱ្យអ្នកមានសុខភាពល្អមានប្រៀប!» ។ លោកថា កីឡាករទាំងពីរបើមានសុខភាពប្រក្រតីដូចគ្នា គឺមានន័យថា ការប្រកួតរបស់ពួកគេគឺពិតជាអាចប្រកួតអស់ពីសមត្ថភាព ហើយធ្វើឱ្យការប្រដាល់នៅរសៀលថ្ងៃសៅរ៍កក្រើក ។ លោកមានប្រសាសន៍ថា ឃីម បូរ៉ា គឺជាកីឡាករពេញកម្លាំង ហើយកីឡាករថៃ ក៏មានស្នាដៃរាប់មិនអស់មិនអន់ផងដែរនៅក្នុងអាជីពប្រដាល់កន្លងមក ។
យោងតាមកំណត់ត្រា កីឡាករថៃ យ៉ត ស៊ីង ធ្លាប់ប្រកួតបាន៧៥លើក ឈ្នះ៦៥លើក ចាញ់៨លើក និងស្មើ២លើក ខណៈដែលឃីម បូរ៉ា ធ្លាប់ប្រកួតបាន៨៥លើក ឈ្នះ៧២លើក ចាញ់១១លើក និងស្មើ២លើក។
នៅក្នុងព្រឹត្តិការណ៍នោះដែរ កីឡាករសុខ សុវណ្ណ មកពីសមាគមកីឡាប្រដាល់ក្រសួងការពារជាតិ ក៏ត្រូវគេអះអាងថាបានត្រៀមជាងមុនសម្រាប់ស្វាគមន៍កីឡាករថៃនោះដែរ។ គូប្រកួតរបស់កីឡាកររូបនេះគឺកីឡាករថៃឈ្មោះ ណុំ សាតឹក ដែលមានប្រវត្តិប្រកួតបាន៧៩លើក ឈ្នះ៦២លើក ចាញ់១៦លើក និងស្មើ១លើក។ លោកតឹក ឡៃ និងឡុង ស៊ីលីន សុទ្ធតែបង្ហាញអារម្មណ៍ជឿជាក់ចំពោះកីឡាកររូបនេះ បន្ទាប់ពីកីឡាករសុខ សុវណ្ណ ក៏ត្រូវបានហ្វឹកហាត់ដិតដល់។ យ៉ាងណាក៏ដោយ គេនៅតែមើលឃើញថាកីឡាករថៃដែលគេត្រូវប៉ះជាមួយមិនមែនស្រួលស៊ីនោះទេ ដោយសារតែកីឡាករសុខ សុវណ្ណ ហាក់មិនសូវនឹងដៃសម្រាប់ការប្រកួតប៉ុន្មានលើកចុងក្រោយ។ ក្រុមអ្នកគាំទ្រនៅតែមើលឃើញពីចំណុចខ្វះចន្លោះរបស់កីឡាករកម្ពុជាគូនេះច្រើនជាងចំណុចខ្លាំង ប៉ុន្តែមួយក្រុមផ្សេងទៀតក៏យល់ថាអ្វីដែលកីឡាករសុខ សុវណ្ណ មាននៅក្នុងខ្លួននឹងអាចធ្វើឲ្យកីឡាករថៃបាក់មុខដោយមិនពិបាកនោះដែរ ថ្វីដ្បិតតែគេទើបប្រកួតបាន៦៩លើក ឈ្នះ៥៦លើក ចាញ់១១លើក និងស្មើ២លើក តិចជាងកីឡាករថៃក្ដី៕
ចែករំលែកព័តមាននេះ