ទស្សនិកជនដែលបានទស្សនាខ្សែភាពយន្តភាគរឿង «នគរមាស» ដែលកំពុងចាក់ផ្សាយតាមកញ្ចក់ទូរទស្សន៍ CTN ប្រាកដជាមួយស្គាល់នូវតួអង្គនាង អមរា ទេវី ដែលជាភរិយារបស់រៀមដែលមានឈ្មោះពិតថា
រាជធានីភ្នំពេញ ៖ ទស្សនិកជនដែលបានទស្សនាខ្សែភាពយន្តភាគរឿង «នគរមាស» ដែលកំពុងចាក់ផ្សាយតាមកញ្ចក់ទូរទស្សន៍ CTN ប្រាកដជាមួយស្គាល់នូវតួអង្គនាង អមរា ទេវី ដែលជាភរិយារបស់រៀមដែលមានឈ្មោះពិតថា ពៅ សុវណ្ណម៉ារីតា ដែលជាតារាជើងថ្មីមួយកំពុងសម្លឹងមើលការសម្តែងថ្មីម្តងទៀត បន្ទាប់ពីខកខានដោយសារផ្តោតលើការសិក្សា។
ជាអ្នកស្រុកកំពង់ត្របែក ខេត្តព្រៃវែង ពៅ សុវណ្ណម៉ារីតា ធ្លាប់បានចូលប្រឡូកក្នុងវិស័យសិល្បៈតាមរយៈការចូលរួមប្រឡងបវរកញ្ញាកម្ពុជាកាលពីអំឡុងឆ្នាំ២០១៤ ប៉ុន្តែដោយសារជាប់ភារកិច្ចនៅក្នុងការសិក្សា ទើបធ្វើឲ្យតារារូបនេះសម្រេចផ្ចឹបអាជីពសិល្បៈចោលមួយរយៈ។
យ៉ាងណានាពេលនេះ តារាស្រីដែលមានវ័យ២៥ឆ្នាំរូបនេះ បានវិលមករកការសម្តែងជាថ្មីឡើងវិញតាមរយៈរឿងភាគដំបូង «នគរមាស» ដែលកំពុងចាក់ផ្សាយ ខណៈពេលនាងរំពឹងថា ក្រោយពីការបង្ហាញខ្លួនក្នុងភាពយន្តជាលើកដំបូងនេះ នាងនឹងអាចមានឱកាសបញ្ចេញសមត្ថភាពសម្តែងនៅក្នុងរឿងថ្មីៗបន្ថែមទៀត។
ពៅ សុវណ្ណម៉ារីតា បានអះអាងប្រាប់កោះសន្តិភាពថា រឿង «នគរមាស» គឺជារឿងដំបូងក្នុងអាជីពសិល្បៈដែលនាងបានចូលសម្តែង បន្ទាប់ពីនាងបញ្ចប់ការសិក្សា និងកំពុងបំពេញការងារជាអ្នកបម្រើតាមយន្តហោះអោយក្រុមអាកាសចរណ៍ឯកជនមួយ។
នាងបញ្ជាក់ថា កន្លងមក ក្រោយពីនាងបានប្រឡងបវរកញ្ញាកម្ពុជាចប់ នាងមានការចេញសម្តែងខ្លះៗដូចជាការដើរម៉ូត និងថតជាលក្ខណៈ Fashion ជាដើម ប៉ុន្តែដោយសារនាងមិនអាចបោះបង់ចោលការសិក្សាបាន ទើបនាងសម្រេចបោះបង់អាជីពសិល្បៈនេះមួយរយៈសិន។
នាងបន្តថា ក្រោយពីបញ្ចប់ការសិក្សា នាងក៏បានចូលបម្រើការងារនៅក្រុមហ៊ុនអាកាសចរណ៍នេះ ប៉ុន្តែអំឡុងពេលនោះមានអ្នកស្គាល់រូបនាងបានមកទាក់ទងនាងឲ្យសាកល្បងចូលធ្វើតេស្តសម្តែងនៅក្នុងភាពយន្តបុរាណមួយ ដោយសារពួកគាត់បានស្គាល់ និងដឹងពីទេពកោលស្យសិល្បៈដែលនាងមានពីកំណើត។
ក្រោយមក នាងក៏មានការចាប់អារម្មណ៍ខ្លះៗលើការសម្តែងនេះ ព្រោះតាមចំណង់ចំណូលចិត្ត គឺនាងស្រឡាញ់ការងារដើរម៉ូតជាងការសម្តែង ប៉ុន្តែដោយសារមានការជម្រុញ នាងក៏បានមកធ្វើតេស្ត ហើយក៏បានជាប់តួអង្គមួយរូបនៅក្នុងរឿង «នគរមាស» នេះតែម្តង។
យ៉ាងណា បើតាម ពៅ សុវណ្ណម៉ារីតា ថា បន្ទាប់ពីនាងបានថតបញ្ចប់រឿង «នគរមាស« នេះនាងក៏កំពុងបន្តថតរឿងភាគថ្មីមួយទៀត ហើយរឿងភាគថ្មីដែលនាងចូលរួមសម្តែងនេះ គ្រោងនឹងចាក់ផ្សាយនៅលើកញ្ចក់ទូរទស្សន៍ CTN ដូចគ្នា ប៉ុន្តែនាងសុំលាក់ចំណងជើងសិន។
ពៅ សុវណ្ណម៉ារីតា បានលើកឡើងទៀតថា ការងារសិល្បៈ គឺនាងមានការស្រឡាញ់ចូលចិត្តតាំងពីដើម ប៉ុន្តែសម្រាប់ការងារដែលនាងកំពុងបម្រើការសព្វថ្ងៃក៏នាងចូលចិត្តដូចគ្នា ហេតុនេះទាំងសិល្បៈ និងការងារនាងមិនអាចចោលមួយណាបានឡើយ ពោលគឺនាងចងចាប់យកទាំងពីរ។
នាងបញ្ជាក់ថា ប្រសិនបើក្នុងករណីការងារមានការមមាញឹកខ្លាំង នោះនាងអាចនឹងដកឃ្លាពីសិល្បៈ ប៉ុន្តែប្រសិនបើអាចនាងនៅតែព្យាយាមឆ្លៀតពេលសម្រាប់ទទួលយកការសម្តែងថ្មីៗបន្ថែម ព្រោះការងារសិល្បៈនេះ ក៏នាងមានការចូលចិត្តខ្លាំងណាស់ដែរ។
ដោយឡែកពាក់ព័ន្ធបញ្ហាស្នេហាវិញ បច្ចុប្បន្ន ពៅ សុវណ្ណម៉ារីតា នៅមិនអាចជ្រើសរើសបាននូវបុរសដែលត្រូវចិត្តនាងនៅឡើយទេ ខណៈពេលនាងក៏មិនទាន់បានគិតគូពីជីវិតគូនៅពេលនេះនៅឡើយទេ ដោយសារនាងចង់អោយទាំងការងារ និងអាជីពសិល្បៈទទួលបានជោគជ័យតាមគោលដៅដែលនាងចង់បានជាមុនសិន៕
ចែករំលែកព័តមាននេះ