រាជធានីភ្នំពេញ ៖ ក្រសួងធនធានទឹក និងឧតុនិយមបានបញ្ជាក់ថាចាប់ពីថ្ងៃទី១៧ ដល់២៣ វិច្ឆិកា ប្រទេសកម្ពុជាបានរងឥទ្ធិពលជ្រលងសម្ពាធទាបមកពីសមុទ្រចិនធ្វើឲ្យមានភ្លៀងពីតិចទៅបង្គួរលាយឡំនឹងផ្តរ រន្ទះ ។
យោងតាមសេចក្តីជូនដំណឹងរបស់ក្រសួងធនធានទឹក នៅថ្ងៃទី១៦វិច្ឆិកា ស្តីពីស្ថានភាពធាតុអាកាស ចាប់ពីថ្ងៃទី១៧-២៣ ខែវិច្ឆិកា ឆ្នាំ២០២១ បានឲ្យដឹងថា ក្នុងសប្ដាហ៍ចាប់ពីថ្ងៃទី១៧-២៣ ខែវិច្ឆិកា ខាងមុខនេះព្រះរាជាណាចក្រកម្ពុជាបន្តទទួលរងនូវឥទ្ធិពល ជ្រលងសម្ពាធទាបមកពីសមុទ្រចិនខាងត្បូងរុញទូលមកលើតំបន់វាលទំនាបភាគខាងក្រោមប្រទេស ។
ក្រសួងថា ទ្រនុងសម្ពាធខ្ពស់ពីភាគខាងជើង (ចិន) បន្តធ្លាក់ចុះគ្របដណ្តប់លើភាគខាងលើ, ខ្ពង់រាបភាគឦសានប្រទេស ។
ក្រសួងលើកឡើងថា ស្ថានភាពបែបនេះនឹងធ្វើឲ្យបណ្តាខេត្តនៅតំបន់វាលទំនាបកណ្ដាលមានសីតុណ្ហភាពអប្បបរមាមានពី២៣-២៥ អង្សសេនឹងសីតុណ្ហភាពអតិបរមាមានពី៣០-៣២អង្សាសេ ។អាចនឹងមានភ្លៀងក្នុងកម្រិតពីខ្សោយទៅបង្គួរលាយឡំដោយផ្គរ រន្ទះ ។
ក្នុងនោះក៏មានបណ្តាផ្នែកខ្លះនៃរាជធានី-ខត្ត នៅភាគខាងក្រោម និងខេត្តដែលមានព្រំប្រទល់ជាប់វៀតណាមអាចនឹងមានភ្លៀងធ្លាក់ច្រើន ។ ចំណែកបណ្តាខេត្តជាប់ជួរភ្នំដងរែក និងខ្ពង់រាបឦសានមានសីតុណ្ហភាពអប្បបរមា មានពី២២-២៤អង្សាសេនឹងសីតុណ្ហភាពអតិបរមាមានពី ២៩-៣១ អង្សាសេអាចនឹងមានភ្លៀងធ្លាក់តិចតួច ។
ចំណែកតំបន់មាត់សមុទ្រមនាសីតុណ្ហភាពអប្បបរមា មានពី២៣-២៥ អង្សាសេនឹងសីតុណ្ហភាពអតិបរមា មានពី៣០-៣២ អង្សាសេអាចនឹងមានភ្លៀងក្នុងកម្រិតពីតិចទៅបង្គួរលាយឡំទៅដោយផ្គរ រន្ទះ ។
ក្រសួងថា យោងលើស្ថានភាពធាតុអាកាសដូចបានជម្រាបជូនខាងលើ សូមសាធារណជនជ្រាបជាព័ត៌មាន ៕
ចែករំលែកព័តមាននេះ