ADផ្ទាំងផ្សព្វផ្សាយពាណិជ្ជកម្ម

Picture

Aguero អាច​នឹង​បង្ខំចិត្ត​ចូល​និវត្តន៍​ពី​បាល់ទាត់ ដោយសារ​បញ្ហា​ជំងឺ​បេះដូង?

2 អាទិត្យ មុន

អេ​ស្ប៉ា​ញ ៖ Sergio Aguero ទំនងជា​ត្រូវ​បង្ខំចិត្ត​ចូល​និវត្តន៍​ពី​វិស័យ​បាល់ទាត់ បន្ទាប់​ពី​គ្រូពេទ្យ​រក​ឃើញ​ថា ខ្សែប្រយុទ្ធ​ក្រុម

អេ​ស្ប៉ា​ញ ៖ Sergio Aguero ទំនងជា​ត្រូវ​បង្ខំចិត្ត​ចូល​និវត្តន៍​ពី​វិស័យ​បាល់ទាត់ បន្ទាប់​ពី​គ្រូពេទ្យ​រក​ឃើញ​ថា ខ្សែប្រយុទ្ធ​ក្រុម Barcelona រូប​នេះ មាន​បញ្ហា​បេះដូង (​បេះដូង​លោត​ខុស​ប្រក្រតី​)​។

Sergio Aguero ដែល​ឈាន​ដល់​វ័យ​៣៣​ឆាំ្ន ត្រូវ​បាន​ប្តូរ​ចេញពី​ទីលាន​ប្រកួត និង​ត្រូវ​បញ្ជូន​ទៅ​កាន់​មន្ទីរពេទ្យ​ភ្លាម​ៗ ដើម្បី​ពិនិត្យ​បញ្ហា​បេះដូង បន្ទាប់​ពី​បង្ហាញ​អាកា​រៈ​ចុក​ទ្រូង​ខ្លាំង អំឡុង​ការ​ប្រកួត​នៅ​ក្រប​ខណ្ឌ​លី​គ​កំពូល​អេ​ស្ប៉ា​ញ La Liga ដែល​ក្រុម Barcelona បាន​ត្រឹម​ស្មើ​ក្រុម​ភ្ញៀវ Alaves ដោយ​លទ្ធផល ១-១ នៅ​កីឡដ្ឋាន Camp Nou កាលពី​ថ្ងៃ​ទី​៣០ ខែតុលា កន្លង​ទៅ​។ ហើយ​ក្រោយ​ឆ្លងកាត់​ការ​ត្រួតពិនិត្យ​ពី​សំណាក់​ក្រុម​គ្រូពេទ្យ​រួច​មក ខាង​ក្លិប​ក៏​បាន​ប្រកាស​ថា Aguero នឹង​ត្រូវ​អវត្តមាន​រយៈពេល​៣​ខែ ដើម្បី​ទទួល​ការ​ព្យាបាល​។

ប៉ុន្តែ​កាលពី​ពេល​ថ្មី​ៗ​នេះ បើ​តាម​ការ​ចេញផ្សាយ​ពី​វិទ្យុ​អេ​ស្ប៉ា​ញ Catalunya បានឱ្យ​ដឹង​ថា បញ្ហា​សុខភាព​របស់ Aguero អាច​បង្ខំ​រូបគេ​ត្រូវ​ចូល​និវត្តន៍​ពី​បាល់ទាត់ ហើយ​គេ​ក៏​បានដឹង​ច្បាស់​រួច​ហើយ អំពី​ស្ថានភាព​បញ្ហា​បេះដូង​របស់​ខ្លួន​។

ទោះ​យ៉ាងណា Aguero បាន​ធ្វើការ​បង្ហោះ​សា​រលើ​បណ្តាញ Twitter ដើម្បី​ផ្តល់​អ្នកគាំទ្រ​នូវ​បច្ចុប្បន្នភាព​ដ៏​សំខាន់​អំពី​ស្ថានភាព​សុខភាព​របស់​ខ្លួន ក៏​ដូច​ជា​ឆ្លើយ​តប និង​បញ្ឈប់​រាល់​ពាក្យ​ចចាមអារ៉ាម​ថ្មី​ៗ​នេះ​ផង​ដែរ ៖ «​ដោយសារ​តែ​ពាក្យ​ចចាមអារ៉ាម​ថ្មី​ៗ​នេះ ដូច្នេះ​ខ្ញុំ​ប្រាប់​ពួក​គេ​ថា ខ្ញុំ​កំពុង​ធ្វើ​តាម​ការ​ណែនាំ​របស់​វេជ្ជបណ្ឌិត​ក្លិប ដោយ​ធ្វើតេស្ដ និង​ព្យាបាល ហើយ​ឃើញ​ថា កា​រវិ​វត្ត​របស់ខ្ញុំ​សម្រាប់​រយៈពេល​៩០​ថ្ងៃ​គឺ​តែងតែ​វិជ្ជមាន​»​។ នេះ​បើ​តាម​ការ​បង្ហោះ​សារ​របស់​ខ្សែប្រយុទ្ធ​រូប​នេះ​។

គួរ​រំលឹក​ថា Sergio Aguero បាន​សម្រេច​ចុះហត្ថលេខា​លើ​កិច្ចសន្យា​រយៈពេល​២​ឆ្នាំ​ជាមួយ​ក្លិប Barcelona កាលពី​ចុងខែ​ឧសភា​កន្លង​ទៅ ក្រោយ​ផុត​កុងត្រា​ជាមួយ​ក្លិប Manchester City​។ ប៉ុន្តែ​ដោយសារ​តែ​បញ្ហា​របួស​នៅ​ដើមរដូវ​កាល​នេះ Aguero ពុំ​សូវ​បាន​បង្ហាញខ្លួន​សម្រាប់ Barcelona ឡើយ ដោយ​ចូល​លេង​បាន​ត្រឹមតែ​៥​ប្រកួត និង​រកបាន​តែ​១​គ្រាប់​ប៉ុណ្ណោះ​៕ (​ដកស្រង់​ចេញពី Marca និង Republic World)

Picture
Picture
Picture
Picture
Picture