រាជធានីភ្នំពេញ ៖ មន្ត្រីសមត្ថកិច្ចជំនាញ នៃស្នងការដ្ឋាននគរបាលរាជធានីភ្នំពេញ នៅល្ងាចថ្ងៃទី១២ វិច្ឆិកា ២០២១នេះ បានបដិសេធ ទាក់ទងទៅនឹងគណនីហ្វេសបុកមួយឈ្មោះថា Somaly…
រាជធានីភ្នំពេញ ៖ មន្ត្រីសមត្ថកិច្ចជំនាញ នៃស្នងការដ្ឋាននគរបាលរាជធានីភ្នំពេញ នៅល្ងាចថ្ងៃទី១២ វិច្ឆិកា ២០២១នេះ បានបដិសេធ ទាក់ទងទៅនឹងគណនីហ្វេសបុកមួយឈ្មោះថា Somaly Keo បានយករូបភាពតែមួយផ្នែក នៃការចូលរួមសហការអនុវត្តរឹងបន្តឹងច្បាប់ចរាចរណ៍ផ្លូវគោករបស់មន្ត្រីអន្តរាគមន៍ យកមកបង្ហោះលើបណ្តាញសង្គម ដោយមានចេតនាអាក្រក់ ធ្វើឲ្យប្រជាពលរដ្ឋទូទៅ មានការយល់ច្រឡំ ជាពិសេសក្នុងគោលបំណងអាក្រក់ ដើម្បីបង្ខូចកិត្តិយសដល់មន្ត្រីអនុវត្តច្បាប់ ។
ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានបំភ្លឺថា
តាមពិត ជាក់ស្តែងកាលពីវេលាម៉ោងប្រហែល ០៩និង០០នាទីព្រឹកថ្ងៃទី០៨ ខែវិច្ឆិកា ឆ្នាំ២០២១ កម្លាំងចម្រុះនៃអធិការដ្ឋាននគរបាលខណ្ឌទួលគោក រួមមានផ្នែកសណ្តាប់ធ្នាប់ ផ្នែកចរាចរណ៌ និងកម្លាំងអន្តរាគមន៌ បានចុះអនុវត្តរឹតបណ្តឹងច្បាប់ចរាចរណ៌ផ្លូវគោក នៅចំណុចផ្លូវលេខ៥៩២ កែងផ្លូវលេខ៣០៧ ស្ថិតនៅក្នុងមូលដ្ឋានសង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
ក្នុងពេលអនុវត្តនោះ មានអ្នកបើកបរមួយចំនួន បានប្រព្រឹត្តអំពើល្មើសចរាចរណ៌ផ្លូវគោក ដូចជាបើកបរមិនពាក់ខ្សែក្រវ៉ាត់, ប្រើទូរសព្ទក្នុងពេលបើកបរ និងជិះម៉ូតូគ្មានពាក់ស្លាកលេខ ហើយមន្ត្រីនគរបាលចរាចរណ៌ បានចេញឃាត់ តែពួកគាត់មិនឈប់ ទើបកម្លាំងផ្នែកអន្តរាគមន៌ នៅគោលដៅខាងមុខ ចេញមកជួយស្ទាក់ឃាត់ និងណែនាំពួកគាត់ឲ្យទៅជួបជាមួយផ្នែកជំនាញចរាចរណ៌ ដើម្បីធ្វើការផាកពិន័យតាមច្បាប់ ។
សមត្ថកិច្ចជំនាញ កំពុងតែស្រាវជ្រាវរកជន ដែលយករូបភាពតែមួយផ្នែក មកផុសធ្វើឲ្យប្រជាពលរដ្ឋមានការយល់ច្រឡំ ជាពិសេសធ្វើឲ្យប៉ះពាល់ដល់កិត្តិយសរបស់មន្ត្រីអនុវត្តច្បាប់ ៕
ចែករំលែកព័តមាននេះ