ស្ត្រីម្នាក់បានមកស៊ីឈ្នួលធ្វើជាកូនឈ្នួលឱ្យគេជាងមួយខែ ក៏បានខ្ចីលុយមុនជិត៤លានរៀលដោយធ្វើការកាត់ប្រាក់ខែ តែមិនទាន់បានប៉ុន្មានផង ក៏ស្រាប់តែ
ខេត្តតាកែវ ៖ បើតាមសេចក្តីរាយការណ៍បានឱ្យដឹងថា ស្ត្រីម្នាក់បានមកស៊ីឈ្នួលធ្វើជាកូនឈ្នួលឱ្យគេជាងមួយខែ ក៏បានខ្ចីលុយមុនជិត៤លានរៀលដោយធ្វើការកាត់ប្រាក់ខែ តែមិនទាន់បានប៉ុន្មានផង ក៏ស្រាប់តែស្ត្រីរូបនេះមានដៃមានជើងលួចយករបស់របរម្ចាស់ផ្ទះទៅបាត់ឈឹងតែម្តង ក្រោយមកម្ចាស់ផ្ទះក៏បានទៅដាក់ពាក្យបណ្តឹង ដើម្បីស្វែងរកនារីជាកូនឈ្នួលរូបនេះឱ្យមកចូលខ្លួនដោះស្រាយ ។
សេចក្តីរាយការណ៍បានឱ្យដឹងថា ស្ត្រីជាកូនឈ្នួលខាងលើនេះ មានឈ្មោះ ឆាន ណប អាយុ២៦ឆ្នាំ មានទីលំនៅឃុំព្រែកផ្ទោល ស្រុកអង្គរបូរី ខេត្តតាកែវ ។
បើតាមសម្តីម្ចាស់ផ្ទះឈ្មោះ ស៊ីវ ជីងលីង បានឱ្យដឹងថា កូនឈ្នួលឈ្មោះ ឆាន ណប ខាងលើនេះ បានមករស់នៅក្នុងផ្ទះរបស់ខ្លួន ដោយសុំខ្ចីលុយមុនចំនួនជិត៤លានរៀល ជាថ្នូរនឹងការរស់នៅធ្វើជាកូនឈ្នួល តែមិនទាន់បាន១ខែស្រួលបួលផង ស្រាប់តែមានដៃមានជើងលួចយករបស់របរមួយចំនួនចេញពីក្នុងផ្ទះរបស់គាត់ រួចក៏រត់គេចខ្លួនបាត់ស្រមោលសូន្យឈឹងតែម្តង ។
ក្រោយពេលកើតហេតុ ម្ចាស់ផ្ទះរងគ្រោះខាងលើ ក៏បានទៅដាក់ពាក្យបណ្តឹងនៅសមត្ថកិច្ច ដើម្បីស្វែងរកនារីជាកូនឈ្នួលរូបនេះ ឱ្យមកចូលខ្លួនដោះស្រាយផងដែរ ។
គួរបញ្ជាក់ថា នេះជាសកម្មភាពឆបោកថ្មីមួយទៀត ដែលក្រុមកូនឈ្នួលប្រើល្បិចជាមួយនឹងម្ចាស់ផ្ទះ មិនទទួលខុសត្រូវលើកិច្ចសន្យា ដូច្នេះសូមម្ចាស់ផ្ទះដែលមានកូនឈ្នួលមួយចំនួន សូមមេត្តាមានការប្រុងប្រយ័ត្នទៅលើសកម្មភាពបោកប្រាស់របស់កូនឈ្នួលខាងលើ ។
ជាក់ស្តែងថ្មីៗនេះ កូនឈ្នួលមួយចំនួនតូចដែលមករស់នៅតាមផ្ទះ នៅក្នុងក្រុងដូនកែវ កំពុងតែកើតមាននូវសកម្មភាពនៃគំរូអាក្រក់ ដែលកូនឈ្នួលខ្លះបានខ្ចីលុយម្ចាស់ផ្ទះជាមុន ដើម្បីធ្វើការកាត់ប្រាក់ខែ ប៉ុន្តែមិនទាន់បានប៉ុន្មានក្នុងការសងជាសំណងផង ក៏ប្រើល្បិចរត់គេចខ្លួនបាត់ ដោយមិនមានដំណឹងអ្វីទាំងអស់ ។
ចែករំលែកព័តមាននេះ