វិបត្តិអន្តោប្រវេសន៍នៅព្រំដែនប៉ូឡូញ កំពុងក្លាយជាក្ដីកង្វល់យ៉ាងខ្លាំង របស់សហភាពអឺរ៉ុប។ ពួកអន្តោប្រវេសន៍ច្រើនពាន់នាក់ដែលប្រើទិដ្ឋាការបេឡារុស សង្ឃឹមថា
ប្រទេសប៉ូឡូញ ៖ វិបត្តិអន្តោប្រវេសន៍នៅព្រំដែនប៉ូឡូញ កំពុងក្លាយជាក្ដីកង្វល់យ៉ាងខ្លាំង របស់សហភាពអឺរ៉ុប។ ពួកអន្តោប្រវេសន៍ច្រើនពាន់នាក់ដែលប្រើទិដ្ឋាការបេឡារុស សង្ឃឹមថា បានចូលក្នុងសហភាពអឺរ៉ុប នាថ្ងៃទី៩ ខែវិច្ឆិកា ឆ្នាំ២០២១ បានប្រមូលផ្ដុំគ្នានៅព្រំដែនប៉ូឡូ្ញញ។ ក្រុងវ៉ាសូវី បានបរិហារថា នោះជាការវាយប្រហារមួយ រៀបចំឡើងដោយបេឡារុស និងរុស្ស៊ី។
មកដល់តំបន់ព្រៃនៃព្រំដែនខាងកើតរបស់សហភាពអឺរ៉ុប ពួកអន្តោប្រវេសន៍ប្រមាណពី៣.០០០ទៅ៤.០០០នាក់ ភាគច្រើនជាពួកឃើតតំបន់មជ្ឈឹមបូព៌ា ស្ថិតនៅជាប់នឹងរបងលួសបន្លាហើយប្រឈមមុខ ជាមួយកងកម្លាំងយោធាប៉ូឡូញដែលដាក់ពង្រាយ ដោយប្ដេជ្ញាឃាំងពួកគេមិនឲ្យចូលប៉ូឡូញបាន។
យោងតាមពួកឆ្មាំព្រំដែនបេឡារុសថា ពួកអន្តោប្រវេសន៍ទាំងនេះ ដែលបោះជំរំនៅទឹកដីបេឡារុស ជិតប៉ុស្តិព្រំដែនប៉ូឡូញKUZNICA ពួកគេមានរូបរាងកាយ និងទឹកមុខយ៉ាប់យ៉ឺនបំផុត ព្រោះខ្វះទឹក និងស្បៀង។ ច្រកចូលមគកាន់ទីនោះត្រូវរារាំងមិនឲ្យបណ្ដាអ្នកកាសែតចូលឡើយ តែបណ្ដារូបភាពផ្សាយដោយអាជ្ញាធរប្រទេសទាំង២ បង្ហាញបុរសនារីនិងកុមារច្រើនរយនាក់ រស់ក្រោមដំបូលតង់ ឬនៅផ្ទាល់នឹងដីប៉ុនប៉ងកម្ដៅខ្លួន ទប់ភាពរងានៅជុំវិញភ្នក់ភ្លើង ព្រោះសីតុណ្ហភាពមានដល់ជិតសូន្យអង្សាសេ។
កងឆ្មាំព្រំដែនបេឡារុសចោទប្រកាន់កងកម្លាំងប៉ូឡូ្ថញថា ប្រើឧស្ម័នបង្ហូរទឹកភ្នែក និងធ្វើការគាបសង្កត់ខាងផ្លូវចិត្ត លើពួកអន្តោប្រវេសន៍ ដោយដាក់ប្រដាប់បំពងសំឡេង បើកក្នុងសំឡេងខ្លាំងៗ ព្រមទាំងដាក់ភ្លើងហ្វាខ្លាំងជះមកលើពួកគេ។
ពួកអន្តោប្រវេសន៍មួយចំនួននិយាយថា ពួកយើងនឹងមិនវិលត្រឡប់ទៅអ៊ីរ៉ាក់វិញឡើយ និងក្រាញននៀលនៅទីនេះរហូតដល់ស្លា.ប់។ នៅមាត់ទ្វារសហភាពអឺរ៉ុបត្រង់ព្រំដែនរវាងប៉ូឡូញ និងបេឡារុស សភាពការណ៍កំពុងតានតឹងខ្លាំងបំផុត ហើយកំពុងឈានទៅរកគ្រោះមហន្តរាយមនុស្សធម៌។
គេពិបាកក្នុងការទទួលព័ត៌មានពីអត្តសញ្ញាណ នៃជនអន្តោប្រវេសន៍ទាំងនេះ ដោយបណ្ដាអ្នកកាសែតហាមមិនឲ្យចូល តែសាក្សីជាច្រើននិយាយថា អ្នកទាំងនោះជាជនជាតិអាហ្វហ្គានីស្ថាន អ៊ីរ៉ាក់ ឬស៊ីរី។
គួររំលឹកថា ៖ ប៉ូឡូញប្រកាសអាសន្ន ព្រោះតែពួកអន្តោប្រវេសន៍ច្រើនពាន់នាក់នៅព្រំដែន៕
ចែករំលែកព័តមាននេះ