ស្ត្រីស្ថិតនៅក្នុងវ័យមករដូវ ដែលគេងតិចជាងប្រាំមួយម៉ោងក្នុងមួយយប់ មានទំនោររងនូវការមករដូវច្រើនជ្រុល និង មិនទៀង។ នេះគឺជាការសន្និដ្ឋានពីការសិក្សាថ្មី ដែលទើបត្រូវបានចុះផ្សាយក្នុង Journal of Sleep Research។
គេបានរកឃើញថា អ្នកដែលគេងតិចជាងប្រាំមួយម៉ោងជាមធ្យមក្នុងមួយយប់គឺ ៤៤% ទំនងជាមានរដូវមិនទៀងទាត់ ហើយ ៧០% ទំនងជាមានការហូរឈាមខ្លាំងអំឡុងពេលមករដូវ ជាងអ្នកគេងពី ៧ ទៅ ៩ ម៉ោង។
គេបានវិភាគទិន្នន័យស្ទង់មតិពីស្ត្រីដែលមករដូវចំនួន ៥៧៤ នាក់ដែលមានអាយុពី ២៤ ទៅ ៤០ ឆ្នាំ។ ពួកគេត្រូវបានសួរអំពីការហូរឈាមរដូវ និងភាពទៀងទាត់ ការគេង និងរបៀបដែលពួកគេធ្វើការនៅពេលថ្ងៃ។ គេបានរកឃើញថា អ្នកដែលធ្លាប់មានរដូវច្រើនជ្រុល ឬមកមិនទៀងទាត់ ទំនងជាមានបញ្ហាការគេងមិនលក់ និង គុណភាពគេងមិនល្អ អស់កម្លាំង ស្ត្រេស និងធ្លាក់ទឹកចិត្ត។
បើទោះបីជាការសិក្សាស្រាវជ្រាវនេះរកឃើញមកបែបនេះក៏ដោយ អ្នកស្រាវជ្រាវនៅតែមិនទាន់អាចសន្និដ្ឋានថា តើហេតុអ្វីបានជាការគេងមិនគ្រប់មានទំនាក់ទំនងលក្ខណៈនៃការមករដូវបែបនេះទេ។ នេះប្រហែលជាមានទំនាក់ទំនងនឹងកត្តាផ្លូវចិត្តនិងផ្លូវកាយ ដែលបង្កឱ្យបញ្ហាបែបនេះ៕
ចែករំលែកព័តមាននេះ