ខេត្តសៀមរាប ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ក្នុងពិធីបើកព្រឹត្តិការណ៍អង្គរសង្ក្រាន្ត ដើម្បីអបអរសាទរទទួលពរជ័យក្នុងពិធីបុណ្យចូលឆ្នាំថ្មីប្រពៃណីជាតិ ឆ្នាំវក អដ្ឋស័ក ពុទ្ធសករាជ២៥៦០ គ្រិស្តសករាជ២០១៦ នាព្រឹកថ្ងៃទី១៤ ខែមេសា ឆ្នាំ២០១៦ នៅបរិវេណប្រាសាទបាយ័ន ដែលតាមតួលេខពីក្រសួងទេសចរណ៍បានប្រកាសថា មានអ្នកទេសចរចូលរួមអង្គរសង្ក្រាន្ត១លាន៣សែននាក់ ។
សម្តេចតេជោ មានប្រសាសន៍ថា យើងគួរតែសង្កេតមើលថា តើហេតុអ្វីទៅដែលយើងអាចបង្កើតនូវព្រឹត្តិការណ៍អង្គរសង្ក្រាន្តបាននៅកន្លែងនេះ នៅទីនេះជារៀងរាល់ឆ្នាំ ហើយប្រជាពលរដ្ឋក៏ធ្វើដំណើរទៅគ្រប់ទីកន្លែងដើម្បីជួបជុំក្រុមគ្រួសារ និងដំណើរកម្សាន្តទៅកាន់តំបន់ទេសចរណ៍នៅគ្រប់ទីកន្លែងផ្សេងទៀត ។ មានមូលហេតុ៥យ៉ាង ដែលចាំបាច់យកមកគិតគូរជាមួយនឹងអ្វីដែលបាននិងកំពុងកើតមាននៅលើទឹកដីនៃព្រះរាជាណាចក្រកកម្ពុជា ។
ទី១-សុខសន្តិភាពមានពេញលេញនៅក្នុងផ្ទៃប្រទេសទាំងមូល ដែលអនុញ្ញាតឱ្យប្រជាពលរដ្ឋកម្ពុជាធ្វើដំណើរពីកន្លែងមួយទៅកន្លែងមួយដោយគ្មានការភ័យខ្លាច ។ នៅមុនឆ្នាំ១៩៩៨ ប្រទេសកម្ពុជាយើងបានខ័ណ្ឌជារបង ខ័ណ្ឌចែកជាតំបន់គ្រប់គ្រងខុសៗគ្នា ។ បើនិយាយពីមុនឆ្នាំ១៩៩៨ ប្រទេសរបស់យើងត្រូវបានបែងចែកជាតំបន់ត្រួតត្រា៤ មានកងកម្លាំងប្រដាប់អាវុធ៤ដែរ ដែលក្នុងនោះប្រជាពលរដ្ឋត្រូវមានព្រំដែនរស់នៅតំបន់ណា គឺស្ថិតនៅក្នុងតំបន់នោះ។ បើឆ្លងដែនត្រូវជួបប្រទះនូវការប៉ះគ្រាប់មីន ឬគ្រាប់មិនទាន់ផ្ទុះ ឬត្រូវទទួលរងនូវការបាញ់ប្រហារនានា ។
ប៉ុន្តែក្រោមនយោបាយឈ្នះ=ឈ្នះរបស់រាជរដ្ឋាភិបាលដែលខ្លួនខ្ញុំបានដាក់ចេញ និងដឹកនាំអនុវត្តផ្ទាល់ ធ្វើឱ្យប្រទេសកម្ពុជាយើងពីប្រទេសកម្ពុជាមួយដែលមានតំបន់ត្រួតត្រាច្រើនទៅជាប្រទេសមួយដែលមានតំបន់ត្រួតត្រាមួយ ហើយការធ្វើដំណើររបស់ប្រជាពលរដ្ឋកម្ពុជានៅពេលនេះ គឺគ្មានការខ្លាចអ្វីទាំងអស់ ។
សុខសន្តិភាពបាននាំមកនូវការរស់រានមានជីវិត សុខសន្តិភាពបាននាំមកឱ្យយើងបំបាត់នូវការភ័យខ្លាចនៃសង្គ្រាម សុខសន្តិភាព បាននាំមកឱ្យយើងសម្រាប់ការអភិវឌ្ឍ បង្កើនជីវភាព កាត់បន្ថយភាពក្រីក្ររបស់ប្រជាជន ដែលយើងទាំងអស់គ្នាចាំបាច់ត្រូវតែរក្សាឱ្យខាងតែបាន ។ យើងមិនអត់ឱនឱ្យអ្នកណាក៏ដោយ ដែលមានគំនិតញុះញង់ បំបែកបំបាក់ ធ្វើឱ្យមានចលាចលនៅក្នុងសង្គមជាតិយើង ទោះម្នាក់… ឬច្រើននាក់… កុំឱ្យមនុស្សរាប់ម៉ឺននាក់ រាប់លាននាក់ ត្រូវស្លាប់ដូចកាលឆ្នាំ១៩៧០-១៩៧៩ និងបន្ដរហូតដល់ឆ្នាំ១៩៩៨ ។
យើងមានវប្បធម៌នៃការអត់ឱន យើងមានវប្បធម៌នៃសន្ដិភាព ប៉ុន្ដែយើងក៏មិនលើកលែងចំពោះនរណាក៏ដោយដែលមានការប៉ុនប៉ងធ្វើឱ្យកម្ពុជាធ្លាក់ចូលទៅក្នុងអស្ថិភាព ដែលជាអតីតកាលដ៏ជូរចត់របស់កម្ពុជា ។ សង្ឃឹមថា ប្រជាជនកម្ពុជាទាំងអស់នឹងរួមជាមួយខ្ញុំ ដើម្បីថែរក្សានូវសុខសន្ដិភាពរបស់យើង ។ បញ្ហាសន្ដិភាព និងស្ថិភាពនេះ សង្ឃឹមថាមិត្តភក្ដិបរទេសនឹងមានការយោគយល់ដល់កម្ពុជាព្រោះថាអ្នកដែលវេទនាមិនមែនជាជនបរទេសទេ អ្នកដែលវេទនាគឺប្រជាជនកម្ពុជា ដែលទាមទារនូវមិត្តភក្ដិបរទេស បើទោះបីមានមុខនៅទីនេះក្ដី និងមិនមានមុខនៅទីនេះក្តី និងយោគយល់ទៅដល់វិធានការទាំងឡាយដែលរាជរដ្ឋាភិបាលបានចាត់ ដើម្បីទប់ស្ដាត់នូវចលាចលណាមួយនៅក្នុងសង្គមកម្ពុជា ។
ទី២-អ្វីដែលធ្វើឱ្យយើងរៀបចំបាន និងធ្វើឱ្យមានការធ្វើដំណើរទៅកាន់ទីជិតឆ្ងាយ ទៅជួបជុំក្រុមគ្រួសារនៅគ្រប់ទីកន្លែងបាន ក្រៅពីសន្ដិភាពនៅមានហេដ្ឋារចនាសម្ព័ន្ធតភ្ជាប់ទំនាក់ទំនងនិងការធ្វើដំណើររបស់ប្រជាពលរដ្ឋនៅទីនេះ។ ពីមុន ការធ្វើដំណើរពីទីក្រុងភ្នំពេញមកកាន់ក្រុងសៀមរាប គេមិនអាចធ្វើដំណើរតាមផ្លូវគោកបានទេ ព្រោះមានការលំបាកយ៉ាងខ្លាំង ដូច្នេះដំណើរតាមផ្លូវទឹកជាជម្រើសដល់ល្អរបស់ពួកគេ បន្ថែមទៅលើការដឹកជញ្ជូនផ្លូវអាកាស ដែលមានលទ្ធភាពតិចតួច ។ មានពេលខ្លះធ្វើដំណើរវាងតាមខេត្តកំពង់ធំ ខ្លះធ្វើដំណើរទៅតាមខេត្តបាត់ដំបង ។ ប៉ុន្ដែឥឡូវនេះ ហេដ្ឋារចនាសម្ព័នរបស់យើងបានតភ្ជាប់គ្រប់ទីកន្លែងទាំងអស់ នៅក្នុងក្របខណ្ឌពេញផ្ទៃប្រទេសរបស់យើង នោះហើយគឺជាលទ្ធផលដែលផ្ដើមចេញពីសន្ដិភាព និងស្ថិរភាពរបស់យើង ដែលផ្ដល់ឱ្យយើងនូវការអភិវឌ្ឍតភ្ជាប់ឱ្យយើង បន្ថែមទៅដោយការតភ្ជាប់ជាមួយនឹងប្រទេសជិតខាង ។
យន្ដការតភ្ជាប់ជាមួយនឹងប្រទេសជិតខាងនេះ នៅក្នុងឱកាសនៃសង្ក្រាន្តឆ្នាំថ្មីរបស់យើង ក៏នៅតែបន្ដទៀតកាន់តែច្រើនឡើងៗនូវអ្នកទេសចរមកពីប្រទេសជិតខាងផង និងអ្នកមកពីក្រៅតំបន់ផង ប៉ុន្តែមកតាមរយៈប្រទេសជិតខាងដែរ ។ ជាមួយនឹងបណ្តាញផ្លូវតភ្ជាប់ កម្ពុជា ក៏មានបណ្តាញហេដ្ឋារចនាសម័ន្ធក្នុងងវិស័យទេសចរណ៍ជាដើម។ ប្រជាជននៅខេត្តសៀមរាប ចាប់ផ្តើមមានសណ្ឋាគារថ្មីឬចាស់តែពីរប៉ុណ្ណោះ ឥឡូវខេត្តសៀមរាបមានសណ្ឋាគារជាង១០០ បន្ថែមជាមួយនោះប្រជាពលរដ្ឋនៅខេត្តសៀមរាប ក៏បានទទួលផលយ៉ាងច្រើន ពីការជួលបន្ទប់ផ្ទះស្នាក់នៅរបស់ខ្លួនឲ្យទៅភ្ញៀវទេសចរ មិនថាបរទេស ឬជនជាតិកម្ពុជានោះទេ ។
ទី៣-ដែលនាំទៅដល់ការជួបជុំគ្នាបែបនេះ និងការជួបជុំគ្នានៅកន្លែងដទៃទៀត ការធ្វើដំណើររបស់ប្រជាជនទៅកាន់តំបន់ឆ្ងាយៗ ដើម្បីទៅជួបជុំក្រុមគ្រួសារ ឬទស្សនកិច្ចនោះ គឺដោយសារប្រជាជនមានមធ្យោបាយធ្វើដំណើរ។ តាមរយៈនៃសន្តិភាព ប្រជាជនមានឱកាសអភិវឌ្ឍន៍ខ្លួន ដែលកាលពីឆ្នាំ១៩៧៩ សូម្បីតែកង់ក៏គ្មានជិះផង និងសូម្បីតែស្បែកជើងក៏គ្មានពាក់ដែរ។
ប៉ុន្តែឥឡូវនេះ ប្រជាពលរដ្ឋមានមធ្យោបាយធ្វើដំណើរដោយខ្លួនឯងយ៉ាងច្រើន បង្ហាញឲ្យឃើញថា ប្រាក់ចំណូលរបស់ប្រជាពលរដ្ឋមានលទ្ធភាពដើម្បីទិញមធ្យោបាយធ្វើដំណើរ។ ទោះបីជាយ៉ាងណាក៏ដោយ នោះហើយក៏បានផ្តល់ឱកាសដល់ប្រជាពលរដ្ឋបានទៅលេងទាំងក្រុមគ្រួសារតែម្តង ។ មានក្រុមគ្រួសារខ្លះបានដាក់ទាំងកន្ទេល ស្នាក់នៅក្រោមដើមឈើតាមរបៀបទេសចរពនេចរមួយបែប ។ ទី១-ការខ្វះផ្ទះសំណាក់ និងទី២-ចង់ដឹងថាការស្នាក់នៅតាមព្រៃបែបណា ។
ទី៤-ប្រជាពលរដ្ឋកម្ពុជាមានប្រាក់ចំណូល អាចដើរលេងបាន ពិតមែនតែគ្មានមធ្យោបាយធ្វើដំណើរខ្លួនឯង ក៏ប៉ុន្តែគាត់មានប្រាក់ចំណូលដែលផ្តល់ឱកាសដល់ពួកគាត់អាចធ្វើដំណើរបាន ។
ពិតមែនហើយ ពីទីនេះ សម្តេចនៅតែបន្តអំពាវនាវឲ្យរថយន្តធំៗទាំងឡាយ និងរថយន្តតាក់ស៊ីមេត្តាកុំដំឡើងថ្លៃ ។ ពិតមែនហើយ មានអ្នកឡើងថ្លៃ និងមានអ្នកមិនឡើងថ្លៃ ប៉ុន្តែបើទោះបីស្តាប់ ឬមិនស្តាប់ តែក្នុងឋានៈជាអ្នកដឹកនាំព្រះរាជាណាចក្រកម្ពុជា ខ្ញុំនៅតែសូមអំពាវនាវចំពោះអ្នករកស៊ីដឹកជញ្ជូន មេត្តាកុំដំឡើងថ្លៃ
ទាំងប្រជាជនមក និងប្រជាជនត្រឡប់ទៅវិញ ។
ទី៥-យើងអាចរៀបចំធ្វើបាននោះ គឺមានការរៀបចំដោយកម្លាំងយុវជនរបស់យើង និងបណ្តាស្ថាប័នដែលមានការពាក់ព័ន្ធ ។ គ្មានការរៀបចំណាមួយអាចធ្វើទៅបានដោយគ្មានការរៀបចំទេ ។ ដូច្នេះគឺជាការចាំបាច់ណាស់ដើម្បីប្រមូលផ្តុំធនធានមនុស្ស ជាពិសេសឆ្នាំនេះចំនួនយុវជនមានការកើនឡើងយ៉ាងច្រើន ក្នុងការចូលរួមនូវព្រឹត្តិការណ៍នេះ ដែលនាំមកនូវមនុស្សយ៉ាងច្រើនចូលរួមនៅក្រោមរលកកម្តៅដែលមិនធ្លាប់មានក្នុងប៉ុន្មានឆ្នាំកន្លងទៅ ។ មិនថាតែនៅប្រទេសកម្ពុជាទេ ប្រទេសជិតខាងយើងក៏រងនៅការវាយប្រហារពីអាកាសធាតុដែរ ប៉ុន្តែខ្ញុំជឿជាក់ថា អាកាសធាតុនេះនឹងមិនរំខានធ្ងន់ធ្ងរពេកចំពោះអ្នកដែលត្រូវធ្វើដំណើរនោះទេ ព្រោះថាឆ្នាំណាក៏ធាតុអាកាសក្តៅដែរ ប៉ុន្តែឆ្នាំនេះខ្ពស់ជាងឆ្នាំទៅ២អង្សា ។ ក៏ប៉ុន្តែតាមអ្នកព្យាករណ៍គេមិនព្រួយបារម្ភអំពីបញ្ហាការលំបាកដោយសាររលកកម្តៅទេ បែរជាព្រួយបារម្ភខ្លាចសឹកកែងជើង ។
សម្តេចតេជោមានប្រសាសន៍ថា នេះគ្រាន់តែជាការបង្ហាញ តើផ្តើមចេញពីអ្វី មិនមែនផ្តើមចេញពីអរិភាព មិនមែនផ្តើមចេញពីការញុះញង់ មិនមែនផ្តើមចេញពីសង្គ្រាមនោះទេ គឺផ្តើមចេញពីសាមគ្គីភាព ផ្តើមចេញពីការរួបរួម ទើបយើងមានថ្ងៃនេះ ។
ខ្ញុំមានមោទនភាពណាស់ ដោយសារប្រជាជនយើងយ៉ាងច្រើនកំពុងធ្វើដំណើរមកកាន់ទីនេះ ហើយកំពុងធ្វើដំណើរទៅកាន់កន្លែងផ្សេងៗទៀត ដើម្បីចូលរួមនៅក្នុងឱកាសចូលឆ្នាំថ្មីប្រពៃណីជាតិជាមួយនឹងក្រុមគ្រួសារ និងទៅកាន់តំបន់ទេសចរណ៍ដទៃៗទៀត ។
ប្រទេសយើងមានសន្តិភាព មានស្ថិរភាព ខាងនយោបាយ ហើយកម្ពុជាមិនមែនជាគោលដៅនៃការវាយប្រហារនៃពួកភេរវកម្មទេ ក៏ប៉ុន្តែយើងក៏មិនត្រូវភ្លេចខ្លួនបណ្តែតបណ្តោយឱ្យមានគ្រោះថ្នាក់ណាមួយនោះដែរ ។ សូមអំពាវនាវដល់ប្រជាពលរដ្ឋឱ្យមានការប្រុងប្រយ័ត្នគ្រប់ៗគ្នាចំពោះការធ្វើដំណើរ គោរពច្បាប់ចរាចរណ៍ ចៀសវាងនូវគ្រោះថ្នាក់ដែលកើតឡើងដោយការធ្វេសប្រហែសទាំងឡាយ ។ សូមកុំបើកបរនៅក្រោមឥទ្ធិពលនៃគ្រឿងស្រវឹង និងប្រយ័ត្នគ្រោះថ្នាក់ដោយអគ្គិភ័យ ។
លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានឱ្យដឹងថា កម្មវិធី និងទស្សនីយភាពសំខាន់ៗនៃព្រឹត្តិការណ៍អង្គរសង្ក្រាន្ត២០១៦ មានសរុបកម្មវិធីធំៗដែលក្នុងនោះរួមមាន៖
-កម្មវិធីសាសនាដូចជា ពិធីក្រុងពាលីបើកការដ្ឋាន ពិធីបួងសួងសុំសេចក្ដីសុខ ពិធីទទួលទេវតាឆ្នាំថ្មី ពិធីទៅវត្ត ពូនភ្នំខ្សាច់ និងពិធីស្រង់ព្រះ ។
-កម្មវិធីសិល្បៈវប្បធម៌ដូចជា ភូមិខ្ញុំ និម្មិតភូមិ របាំបុរាណ ប្រពៃណី និងប្រជាប្រិយ ល្បែងប្រជាប្រិយ គុនល្បុក្កតោ តំបន់ត្រជាក់ចិត្ត គោមបណ្ដែតទឹក មហោស្រពសិល្បៈវប្បធម៌បុរាណ តន្ត្រីសួស្ដីឆ្នាំថ្មី តន្ត្រីអង្គរសង្ក្រាន្ត ការប្រណាំងរទេះក្របី ។
-កម្មវិធីតាំងពិព័រណ៍ មានរូបសិប្បកម្ម វត្ថុអនុស្សាវរីយ៍ ស្រុកយើង ពិពណ៌នានិងប្រកួតប្រជែង …។
-ការទាញព្រ័ត្រមិត្តភាពអង្គរសង្ក្រាន្ត និងពិធីផ្សេងៗទៀត…។
ព្រឹត្តិការណ៍អង្គរសង្ក្រាន្ត ក៏ជាការអបអរសាទរដំណើរវិវឌ្ឍន័របស់កម្ពុជាប្រជាជាតិកម្ពុជា ទោះមានប្រវត្តិជូរចត់ប្រកបដោយសោកនាដកម្មយ៉ាងណាក៏ដោយ ប៉ុន្តែប្រជាជនកម្ពុជា ជាពិសេសយុវជនជំនាន់មុន ទោះស្ថិតក្នុងស្ថានភាពលំបាកបំផុត ក៏មិនបោះបង់ក្ដីសង្ឃឹម ហើយតស៊ូយកជោគជ័យ ក្នុងការដោះស្រាយ ការពារ ស្ដារ និងអភិវឌ្ឍន៍កម្ពុជាមកដល់ពេលបច្ចុប្បន្ន ៕
ចែករំលែកព័តមាននេះ