ខេត្តកំពង់ឆ្នាំង ៖ ទំនប់កប់សេះ គឺជាទំនប់មួយកសាងឡើងដើម្បីស្ទាក់ទឹកទុកសម្រាប់បង្កបង្កើនផលរបស់ប្រជាកសិករ ។ ទំនប់នេះ មានតាំងពីសម័យខ្មែរក្រហម និងមកដល់រដ្ឋកម្ពុជាក៏នៅតែបន្តជួសជុលឡើងវិញ សម្រាប់ការងារកសិកម្ម ។…
ខេត្តកំពង់ឆ្នាំង ៖ ទំនប់កប់សេះ គឺជាទំនប់មួយកសាងឡើងដើម្បីស្ទាក់ទឹកទុកសម្រាប់បង្កបង្កើនផលរបស់ប្រជាកសិករ ។ ទំនប់នេះ មានតាំងពីសម័យខ្មែរក្រហម និងមកដល់រដ្ឋកម្ពុជាក៏នៅតែបន្តជួសជុលឡើងវិញ សម្រាប់ការងារកសិកម្ម ។ ទំនប់កប់សេះ បានក្លាយជាទីរមណីយដ្ឋានសម្រាប់ភ្ញៀវទេសចរទៅលេងកម្សាន្តនៅរដូវខែវស្សាផងដែរ ។ ទំនប់នេះ ស្ថិតនៅក្នុងឃុំចំនួន២ គឺឃុំឈូកស និងឃុំសែប ស្រុកកំពង់ត្រឡាច ខេត្តកំពង់ឆ្នាំង។
ជាក់ស្ដែង នៅថ្ងៃអាទិត្យទី៦ កញ្ញា ឆ្នាំ២០២៥ ដែលត្រូវនឹងថ្ងៃសែនក្បាលទឹក មានបងប្អូនប្រជាពលរដ្ឋទៅលេងយ៉ាងច្រើនរាប់រយនាក់ ដែលធ្វើឲ្យទីតាំងមួយនេះមានមនុស្សម្នាអ៊ូរអណែនណាន់តាន់តាប់ មានទាំងអ្នកលក់ដូរម្ហូបអាហារភេសជ្ជៈមានអ្នកលេងទឹក និងខ្លះជិះម៉ូតូកាត់ទឹកលើខ្នងទំនប់មួយនេះផងដែរ ។
លោក វន ស៊ីផា អភិបាលស្រុកកំពង់ត្រឡាចបានប្រាប់ភ្នាក់ងារកោះសន្តិភាពថា កាលពី ថ្ងៃអាទិត្យទី៦ ខែកញ្ញា ដែលត្រូវនឹងថ្ងៃសែនក្បាលទឹកម្សិលមិញនេះ មានភ្ញៀវទៅលេងយ៉ាងច្រើន លោកក៏បានចាត់ឱ្យកងកម្លាំងនគរបាលរួម និងប្រជាការពារចូលរួមថែរក្សាសន្តិសុខសណ្ដាប់ធ្នាប់ជូនបងប្អូនទៅលេងកម្សាន្តនៅទីនោះផងដែរ ។
ដោយឡែកលោក អឿ សារឿន ប្រធានស្ដីទីមន្ទីរធនធានទឹក និងឧតុនិយមខេត្តកំពង់ឆ្នាំងបានបញ្ជាក់ថា ទំនប់កប់សេះ ថ្វីបើបានកសាងពីសម័យខ្មែរក្រហមពិតមែន ប៉ុន្តែបានតិចតួចប៉ុណ្ណោះ ។ ក្រោយថ្ងៃរំដោះ៧ មករា ១៩៧៩ ក្នុងសម័យរដ្ឋកម្ពុជា ទំនប់នេះត្រូវបានជួសជុលឡើងវិញ ដោយដំណាក់កាលទីមួយ គឺកែនប្រជាពលរដ្ឋកូនសិស្សមន្ត្រីរាជការទៅលើកទំនប់នៅទីនោះ។
លុះដំណាក់កាលទី២ គឺសហគមន៍អឺរ៉ុបដែលជំនាន់នោះហៅថា ប្រាសាក់ ក៏បានជួសជុលកែលម្អឡើងវិញ និងក្រោយមកទៀត គឺបានកសាងជួសជុលបន្ថែមដោយស្បៀងពលកម្ម ដែលកាលនោះហៅថា ធ្វើពលកម្មដូរអង្ករ ។ បច្ចុប្បន្ន ខែវស្សានៅចំណុចនោះត្រង់ទំនប់ទឹកបង្ហៀរគឺមានទឹកហូរធ្លាក់ពីទំនប់ ដែលប្រជាពលរដ្ឋនាំគ្នាទៅលេងកម្សាន្ត និងមិនមានអ្វីទេនៅខែប្រាំង។ ប្រជាពលរដ្ឋអាចទៅលេងកម្សាន្តផ្លូវចូលត្រង់ផ្លូវបំបែកផ្លូវជាតិលេខ៥ត្រង់ចំណុចថ្នល់ទទឹង ក្នុងឃុំសែប ស្រុកកំពង់ត្រឡាច ៕
ចែករំលែកព័តមាននេះ