រាជធានីភ្នំពេញ ៖ ធនាគារជាតិនៃកម្ពុជាសហការជាមួយសាជីវកម្មហិរញ្ញវត្ថុអន្តរជាតិ (IFC)នៅព្រឹកថ្ងៃទី២៧ខែមេសាឆ្នាំ២០២៦បានសម្ពោធដាក់ឱ្យប្រើប្រាស់ជាផ្លូវការ ប្រព័ន្ធវដ្តករសាស្ត្រហិរញ្ញវត្ថុប្រកបដោយចីរភាពសម្រាប់វិស័យធនាគារនៅកម្ពុជានាសណ្ឋាគារហាយ៉ាតរីជែនស៊ីភ្នំពេញក្រោមអធិបតីភាពលោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជានិងលោកស្រី Elvira Morella នាយិកាគ្រប់គ្រងផ្នែកសេដ្ឋកិច្ច និងប្រឹក្សាយោបល់ នៃសាជីវកម្មហិរញ្ញវត្ថុអន្តរជាតិ (IFC)។
ថ្លែងក្នុងពិធីនាឱកាសនោះ លោកជំទាវបណ្ឌិត ជា សិរី បានមានប្រសាសន៍ថាប្រព័ន្ធវដ្តករសាស្ត្រគឺជាសមិទ្ធផលថ្មីមួយដែលបង្ហាញថា កម្ពុជាកំពុងផ្លាស់ប្តូរពីការកំណត់ទិសដៅទៅកាន់ សកម្មភាពជាក់ស្តែង និងមានរចនាសម្ព័ន្ធច្បាស់លាស់ក្នុងការតម្រង់ទិសវិស័យហិរញ្ញវត្ថុឱ្យស្របតាម អាទិភាពនៃការអភិវឌ្ឍប្រកបដោយចីរភាព។
ក្របខ័ណ្ឌដែលត្រៀមដាក់ចេញនាពេលនេះ ពិតជាមានសារៈសំខាន់សម្រាប់របៀបវារៈនៃ ការអភិវឌ្ឍប្រកបដោយចីរភាពនៅកម្ពុជា និងបានឆ្លុះបញ្ចាំងយ៉ាងច្បាស់ ពីការប្តេជ្ញាចិត្តដ៏រឹងមាំរបស់ ភាគីពាក់ព័ន្ធទាំងអស់ ដើម្បីឆ្ពោះទៅរកអនាគតប្រកបដោយចីរភាព។
លោកជំទាវបណ្ឌិត ជា សិរី បានបន្តថា«ការរៀបចំប្រព័ន្ធវដ្តករសាស្ត្រហិរញ្ញវត្ថុប្រកបដោយចីរភាពរបស់យើង មិនត្រឹមតែអាចចូលរួម ចំណែកក្នុងការដោះស្រាយផលប៉ះពាល់ដែលបណ្តាលមកពីការប្រែប្រួលអាកាសធាតុប៉ុណ្ណោះទេ ប៉ុន្តែ ថែមទាំងឆ្លើយតបនឹងតម្រូវការអនុលោមភាពតាមស្តង់ដាបរិស្ថានរបស់ដៃគូពាណិជ្ជកម្ម ដើម្បីរក្សា ការប្រកួតប្រជែងក្នុងទីផ្សារសកល»។
លោកជំទាវបណ្ឌិត ជា សិរី បានបន្តទៀតថា ការរៀបចំប្រព័ន្ធវដ្តករសាស្ត្ររបស់យើង មានលក្ខណៈ ស្របគ្នានឹងប្រព័ន្ធវដ្តករសាស្ត្រអាស៊ាន សហភាពអឺរ៉ុប និងប្រទេសសិង្ហបុរី ជាដើម ព្រមទាំងបានគិតគូរ ពីបរិបទប្រទេសកម្ពុជារបស់យើង។
នេះក៏ជាការចូលរួមចំណែកជាមួយរាជរដ្ឋាភិបាលកម្ពុជា ក្នុងការ ដាក់ចេញនូវគោលនយោបាយ និងគំនិតផ្តួចផ្តើមនានា ដើម្បីកាត់បន្ថយការប្រែប្រួលអាកាសធាតុ និង ការកសាងភាពធន់នៃសេដ្ឋកិច្ចជាតិ ស្របតាមយុទ្ធសាស្ត្របញ្ចកោណ ដំណាក់កាលទី១ ផែនការមេ សម្រាប់អភិវឌ្ឍវិស័យថាម ពលអគ្គិសនីឆ្នាំ២០២២-២០៤០ និងផែនការយុទ្ធសាស្ត្រឆ្លើយតបនឹងការប្រែប្រួល អាកាសធាតុកម្ពុជាឆ្នាំ២០២៤-២០៣៣ ជាដើម។
លោកជំទាវបណ្ឌិត ជា សិរី បានបន្ថែមថាស្របតាមទិសដៅនេះ យើងនឹងបន្តរួមចំណែកក្នុងការកាត់ បន្ថយការបំភាយឧស្ម័នផ្ទះកញ្ចក់រហូតដល់ ៥៥% ត្រឹមឆ្នាំ២០៣៥ ដូចដែលបានចែងនៅក្នុងផែនការជាតិរួម ចំណែកឆ្លើយតបនឹងការប្រែប្រួលអាកាសធាតុនៅកម្ពុជា ដំណាក់កាលទី៣ ហើយដើម្បីសម្រេចបាននូវគោលដៅនេះ នឹងត្រូវការការវិនិយោគទាំងពីផ្នែកសាធារណៈ និងផ្នែកឯកជន សម្រាប់ការកាត់បន្ថយការប្រែប្រួលអាកាសធាតុ ការបន្សំនឹងការប្រែប្រួលអាកាសធាតុ និងសកម្មភាព ជំរុញ នានាហើយថវិកាសាធារណៈតែមួយមុខគឺមិនទាន់គ្រប់គ្រាន់ទេ សម្រាប់តម្រូវការ ហិរញ្ញវត្ថុដ៏ច្រើនសន្ធឹកសន្ធាប់នេះ។ដូចនេះប្រទេសកម្ពុជាត្រូវតែកៀរគរមូលធនឯកជនទាំងក្នុងនិងក្រៅប្រទេសដើម្បីកាត់បន្ថយគម្លាតមូលនិធិនេះដែលនឹងជួយលើកទឹកចិត្តដល់គម្រោងវិនិយោគបៃតង និងការចូលរួមពីសំណាក់វិស័យឯកជន និងដៃគូអភិវឌ្ឍន៍ ដែលអាចផ្តល់មូលនិធិប្រកបដោយចីរភាពដល់ សកម្មភាពអាកាសធាតុដែលចាំបាច់។
លោកជំទាវបណ្ឌិត ជាសិរី បានបញ្ជាក់ថាទន្ទឹមនេះ ប្រព័ន្ធវដ្តករសាស្ត្រហិរញ្ញវត្ថុប្រកបដោយចីរភាព ក្នុងដំណាក់កាលដំបូងនេះគឺសម្រាប់ ប្រើប្រាស់ក្នុងវិស័យធនាគារ ប៉ុន្តែមិនមែនមានន័យថា វិស័យផ្សេងទៀតមិនមានសិទ្ធិប្រើប្រាស់ប្រព័ន្ធ វដ្តករសាស្ត្រនេះ ដើម្បីទទួលបានមូលនិធិ ឬការវិនិយោគបៃតងនោះទេ។
លោកជំទាវបណ្ឌិតសូមលើកទឹកចិត្តដល់គ្រប់ភាគីពាក់ព័ន្ធទាំងអស់ ទទួលយកប្រព័ន្ធវដ្តករសាស្ត្រនេះទៅប្រើប្រាស់ ដើម្បី ឈានទៅសម្រេចបាននូវគោលដៅរួម ក្នុងការលើកកម្ពស់សកម្មភាពសេដ្ឋកិច្ចប្រកបដោយចីរភាព នៅក្នុងប្រទេសកម្ពុជា។ លើសពីនេះ ធនាគារជាតិនៃកម្ពុជានឹងបន្តធ្វើបច្ចុប្បន្នកម្មនិងពង្រីកវិសាលភាព ដល់ការបន្សំនឹងការប្រែប្រួលអាកាសធាតុ និងសិក្សាបញ្ចូលវិស័យដទៃទៀត ដោយសហការជាមួយ ក្រសួង-ស្ថាប័នពាក់ព័ន្ធ ដើម្បីឱ្យប្រព័ន្ធវដ្តករសាស្ត្រហិរញ្ញវត្ថុនៅដំណាក់កាលទី២ អាចអនុវត្តបានកាន់តែ ទូលំទូលាយ។ព្រោះថាការប្រែប្រួលអាកាសធាតុកំពុងផ្លាស់ប្តូរនូវរបៀបធ្វើធុរកិច្ច និងការរស់នៅ ដែលទាមទារឱ្យ អាជីវកម្មត្រូវសម្របខ្លួនទៅនឹងការផ្លាស់ប្តូរ តាមរយៈការបង្កើនប្រសិទ្ធភាពថាមពល ខ្សែច្រវាក់ផ្គត់ផ្គង់ បៃតង ព្រមទាំងអនុវត្តគោលការណ៍អាជីវកម្មប្រកបដោយចីរភាព។
លោកជំទាវសង្ឃឹមយ៉ាងមុតមាំថា ប្រព័ន្ធវដ្តករសាស្ត្រហិរញ្ញវត្ថុប្រកបដោយចីរភាពនេះ នឹងក្លាយជាក្របខ័ណ្ឌមួយសម្រាប់កៀរគរទុន ដើម្បីសម្របសម្រួលការផ្លាស់ប្តូរនេះហើយតាមរយៈការដាក់ចេញនូវប្រព័ន្ធវដ្តករសាស្ត្រហិរញ្ញវត្ថុប្រកប ដោយចីរភាពនាថ្ងៃនេះ ប្រទេសកម្ពុជាកំពុងធ្វើសមាហរណកម្មយ៉ាងស៊ីជម្រៅទៅក្នុងប្រព័ន្ធអេកូឡូស៊ី ក្នុងតំបន់ និងការវិនិយោគអន្តរជាតិ ព្រមទាំងធានាបាននូវភាពសមស្រប និងអាចអនុវត្តបានសម្រាប់ បរិបទរបស់ប្រទេសកម្ពុជា ក្នុងនាមជាប្រទេសកំពុងអភិវឌ្ឍន។
លោកជំទាវ បណ្ឌិត ជាសិរី ស្នើឱ្យក្រសួងស្ថាបប័នពាក់ព័ន្ធទទួលយកប្រព័ន្ធ វដ្តករសាស្ត្រនេះទៅអនុវត្ត ដោយមិនត្រឹមតែដើម្បីកៀរគរហិរញ្ញវត្ថុបៃតង និងបំពេញគោលដៅអាកាសធាតុ របស់យើងប៉ុណ្ណោះទេ ថែមទាំងដើម្បីសហការបង្កើតគុណតម្លៃយូរអង្វែងសម្រាប់មនុស្សជំនាន់ក្រោយ និងរួមគ្នាកសាងអនាគតប្រកបដោយចីរភាពសម្រាប់ប្រទេសកម្ពុជា។
គួរបញ្ជាក់ថា វដ្តករសាស្ត្រគឺជាពាក្យថ្មីសំដៅទៅលើពាក្យចាត់ថ្នាក់មួយដែលកំណត់ជាសកម្មភាពមួយផ្តល់ផលល្អដល់អាកាសធាតុឬមានភាពបៃតងទិសដៅសំខាន់ជួយគាំទ្រចីរភាពផ្នែកបរិស្ថាន៕
ចែករំលែកព័តមាននេះ