ADផ្ទាំងផ្សព្វផ្សាយពាណិជ្ជកម្ម

កម្ពុជាបង្ហាញពិភពលោកពី «តម្លៃពិតនៃសន្តិភាព» តាមរយៈសៀវភៅ “The Father” ដែលកំពុងទទួលបានការកោតសរសើរពីអន្តរជាតិ

3 ម៉ោង មុន

២២ ខែ មេសា ឆ្នាំ ២០២៦ ម៉ោង ១៣:២៨

រាជធានីភ្នំពេញ ៖ ក្នុងនាមជាប្រជាជាតិមួយដែលធ្លាប់ឆ្លងកាត់ការឈឺចាប់បំផុតក្នុងប្រវត្តិសាស្ត្រ ថ្ងៃនេះកម្ពុជាបានបង្ហាញខ្លួនយ៉ាងរឹងមាំលើឆាកអន្តរជាតិ មិនមែនក្នុងរូបភាពនៃសង្គ្រាមទៀតឡើយ ប៉ុន្តែក្នុងនាមជា «ប្រទេសដែលស្រលាញ់សន្តិភាព» ។ ជោគជ័យដ៏អស្ចារ្យនេះត្រូវបានរំលេចឡើងតាមរយៈការចេញផ្សាយសៀវភៅ “The Father Who Shielded and Never Left” ដែលកំពុងដុតបញ្ឆេះសេចក្ដីរំភើប និងមោទនភាពជាតិដល់ពលរដ្ឋខ្មែរគ្រប់រូប បន្ទាប់ពីទទួលបានការចាប់អារម្មណ៍យ៉ាងខ្លាំងពីបណ្ដាញសារព័ត៌មានអន្តរជាតិធំៗ ។

អត្ថបទនៃសៀវភៅដែលនិពន្ធដោយលោកស្រី Fari មួយនេះ បានក្លាយជា «អាវុធការទូត» ដ៏ទន់ភ្លន់បំផុតរបស់កម្ពុជា ។ សារព័ត៌មានបរទេសបានចុះផ្សាយថា សៀវភៅនេះបាននាំយករឿងរ៉ាវរបស់សម្ដេចតេជោ ហ៊ុន សែន ទៅបង្ហាញពិភពលោកឱ្យយល់ច្បាស់ពីតម្លៃនៃការបង្រួបបង្រួមជាតិ ។ ក្នុងកាលៈទេសៈដែលតំបន់ជាច្រើនក្នុងលោកកំពុងប្រឈមនឹងអស្ថិរភាព អន្តរជាតិបានចាត់ទុកមេរៀននៃការដឹកនាំដែលប្រើប្រាស់ «មេត្តាធម៌ជាធំ» និង «យុទ្ធសាស្ត្រឈ្នះ-ឈ្នះ» គឺជាគំរូដឹកនាំដ៏ត្រឹមត្រូវបំផុតសម្រាប់មនុស្សជាតិ ។

សារព័ត៌មានបរទេសបានលើកឡើងថា ការដែលកម្ពុជាអាចងើបឡើងវិញ និងមានស្ថិរភាពរឹងមាំសព្វថ្ងៃ គឺដោយសារមានការលះបង់ដ៏អស្ចារ្យរបស់សម្ដេចតេជោ ដែលមិនដែលបោះបង់ពលរដ្ឋចោលក្នុងគ្រាគ្រោះថ្នាក់ ។ សន្តិភាពដ៏រឹងមាំនេះ ឥឡូវនេះកំពុងត្រូវបានបន្តរក្សាយ៉ាងខ្ជាប់ខ្ជួនដោយសម្ដេចធិបតី ហ៊ុន ម៉ាណែត ដែលបានបង្ហាញពិភពលោកពីភាពចាស់ទុំនយោបាយ និងការតម្កល់ជីវិតមនុស្សជាតិខ្ពស់ជាងជម្លោះ ដូចដែលបានបង្ហាញឱ្យឃើញក្នុងវិបត្តិព្រំដែនឆ្នាំ ២០២៥-២០២៦ កន្លងទៅ ។

នេះគឺជាមោទនភាពជាតិដ៏ធំធេងដែលប្រវត្តិសាស្ត្រពិត និងការដឹកនាំដ៏ប៉ិនប្រសប់របស់កម្ពុជាត្រូវបានពិភពលោកឱ្យតម្លៃ និងកោតសរសើរ ។ សៀវភៅ “The Father” មិនត្រឹមតែនាំសារសន្តិភាពទៅកាន់ឆាកអន្តរជាតិប៉ុណ្ណោះទេ ប៉ុន្តែថែមទាំងជាសក្ខីភាពបញ្ជាក់ថា «សន្តិភាពគឺជាទ្រព្យសម្បត្តិដ៏មានតម្លៃបំផុតរបស់ប្រជាជាតិ» ។ ការទទួលស្គាល់ពីបរទេសនាពេលនេះ គឺជាការលើកកម្ពស់កិត្តិយសជាតិឱ្យកាន់តែត្រចះត្រចង់ និងជាកម្លាំងចិត្តដល់ពលរដ្ឋខ្មែរគ្រប់រូបឱ្យកាន់តែសាមគ្គីគ្នាថែរក្សាមរតកសន្តិភាពជារៀងរហូត ៕ អត្ថបទពាណិជ្ជកម្ម