ចិញ្ចៀនពេជ្រធំ រថយន្តស៊េរីថ្មីទំនើបៗ ផ្ទះវីឡាធំស្កឹមស្កៃ ជាក្តីស្រម៉ៃរបស់មនុស្សជាច្រើន ។ ពួកគេត្រូវការប្រណីតភាព ដោយគិតថា វានឹងធ្វើឱ្យជីវិតមានន័យ និងទទួលការស្ញប់ស្ញែង ។
ចិញ្ចៀនពេជ្រធំ រថយន្តស៊េរីថ្មីទំនើបៗ ផ្ទះវីឡាធំស្កឹមស្កៃ ជាក្តីស្រម៉ៃរបស់មនុស្សជាច្រើន ។ ពួកគេត្រូវការប្រណីតភាព ដោយគិតថា វានឹងធ្វើឱ្យជីវិតមានន័យ និងទទួលការស្ញប់ស្ញែង ។
តម្រូវការនូវវត្ថុទំនើបៗ នៅក្នុងជីវិតរស់នៅគ្មានអ្វីខុសឆ្គងនោះទេ ។ ប៉ុន្តែជាអកុសល មនុស្សត្រូវបានដឹកនាំឱ្យដើរផ្លូវខុស ដើម្បីសម្រេចក្តីប្រាថ្នានៃជីវិតមួយ ដែលពោរពេញដោយប្រណីតភាព នៅក្នុងប្រទេសមួយដែលស្ថិតក្នុងភាពក្រីក្រនៅឡើយ ។
ប្រាក់ខែទាប នៅក្នុងស្ថាប័នរដ្ឋមិនអាចឱ្យពួកមន្ត្រីស្វែងរកប្រណីតភាព តាមរយ:ប្រាក់ខែនោះឡើយ ។ ការងារទៅរកផ្លូវងងឹត ឬអំពើពុករលួយ ក៏កើតមាន ដើម្បីសម្រេចបំណងប្រាថ្នានៃជីវិតប្រកបដោយប្រណីតភាពនេះ ។ ការងប់ងល់ខ្លាំងនឹងប្រណីតភាពនឹងធ្វើឱ្យមនុស្ស ហ៊ានធ្វើគ្រប់យ៉ាង ដើម្បីបានចិញ្ចៀនពេជ្រគ្រាប់ធំ រថយន្តតម្លៃរាប់សែន និងវិមានស្កឹមស្កៃជាដើម។
ដរាបណា មនុស្សនៅតែប្រណាំងប្រជែងមិនចេះចប់មិនចេះហើយ ដើម្បីសម្រេចប្រណីតភាព នៅក្នុងជីវិតតាមមធ្យោបាយគ្រប់វិធី ពេលនោះបញ្ហាពុករលួយនឹងនៅតែតាមញាំញីក្នុងសង្គម ដោយធ្វើឱ្យពិបាកដល់ការអភិវឌ្ឍន៍ប្រទេសកម្ពុជា ឱ្យបានលឿនជាង
នេះ។
គេមិនគួរគិតថា ប្រណីតភាព គឺជាតម្លៃតែមួយគត់នៃជីវិតឡើយ ។ សេចក្តីថ្លៃថ្នូរសីលធម៌ ចំណេះដឹង កិត្តិយស និងការស្រឡាញ់រាប់អានរបស់មនុស្ស គឺជាតម្លៃសំខាន់ៗផ្សេងទៀតនៅក្នុងជីវិត ។
វាពិតជារឿងគួរឱ្យសរសើរ សម្រាប់មនុស្សប្រកបរបរសុចរិត ដែលអាចធ្វើអោយជីវិតមានប្រណីតភាព ។ ប៉ុន្តែផ្ទុយទៅវិញ វាពិតជាគួរឱ្យខ្មាសអៀនណាស់ ដែលមនុស្សត្រូវលះបង់តម្លៃជាមនុស្សដូចជាសីលធម៌ និងសេចក្តីថ្លៃថ្នូរ ដោយបង្កើតជាអំពើពុករលួយនិងអយុត្តិធម៌សង្គម ដោយគ្រាន់តែដើម្បីទិញរបស់ប្រណីតៗ ដើម្បីអួតមនុស្សនៅក្នុងសង្គម។
ដូច្នេះ សង្គមនឹងកាន់តែប្រសើរជាងនេះ កាលបើមនុស្សអាចទប់ចិត្តពីប្រណីតភាព ៕
ចែករំលែកព័តមាននេះ