នៅពេលដែលសត្វជ្រូកកណ្តុរកំពុងតែមានហាងឆេង ក្រុមឈ្មួញក៏នាំចូលកូនជ្រូកសាច់អាយុ៣ទៅ៤សប្តាហ៍មកបន្លំ ហើយក្លាស្សេដែលមានចំនួន១៦០ក្បាលនាំចូលពីថៃមកកម្ពុជា ហើយក៏ត្រូវ
ខេត្តបន្ទាយមានជ័យ ៖ នៅពេលដែលសត្វជ្រូកកណ្តុរកំពុងតែមានហាងឆេង ក្រុមឈ្មួញក៏នាំចូលកូនជ្រូកសាច់អាយុ៣ទៅ៤សប្តាហ៍មកបន្លំ ហើយក្លាស្សេដែលមានចំនួន១៦០ក្បាលនាំចូលពីថៃមកកម្ពុជា ហើយក៏ត្រូវមន្ត្រីចម្រុះបង្ក្រាបបាន រួចយកទៅដុតកំទេចចោលនៅរសៀលថ្ងៃទី០៤ ខែវិច្ឆិកា ឆ្នាំ២០២១នៅទីលានភូមិខ្លាកូន សង្កាត់កំពង់ស្វាយ ក្រុងសិរីសោភ័ណ។
លោក ហ៊ុយ ទូច ប្រធានការិយាល័យផលិតកម្ម និងបសុព្យាបាលខេត្តបន្ទាយមានជ័យ បានប្រាប់ថានៅពេលជ្រូកកណ្តុរមានហាងឆេងទីផ្សារអាំងលក់ ឈ្មួញក៏បានបន្លំនាំចូលកូនជ្រូកសាច់ដែលមានអាយុ៣ទៅ៤សប្តាហ៍ពីប្រទេសថៃតាមច្រករបៀងខុសច្បាប់មកកម្ពុជា តែត្រូវបានក្រុមអន្តរាគមន៍បង្ក្រាបបទល្មើសចលនាសត្វ និងផលិតផលសត្វ មន្ទីរកសិកម្មរុក្ខាប្រមាញ់ និងនេសាទខេត្តបន្ទាយមានជ័យ បានសហការជាមួយកម្លាំងការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តបន្ទាយមានជ័យ បានឃាត់រថយន្តសង្ស័យ១គ្រឿង ម៉ាកសាំងយ៉ុង ហើយធ្វើការឆែកឆេរ ស្រាប់តែរកឃើញកូនជ្រូកងា.ប់ដាក់ក្លាស្សេចំនួន១៦០ក្បាល និងអ្នកបើកបរចំនួន២នាក់ នៅវេលាម៉ោង១០និង៤៦នាទី ថ្ងៃទី០៣ ខែវិច្ឆិកា ឆ្នាំ២០២១ នៅតាមផ្លូវ ស្ថិតក្នុងភូមិខ្លែងពណ៌ ឃុំស្លរក្រាម ស្រុកស្វាយចេក។
លោកបានបញ្ជាក់ថា ក្រោយពេលឃាត់រថយន្តដឹកកូនជ្រូកក្លាស្សេហើយ ក៏ត្រូវបានបញ្ជូនទៅការិយាល័យផលិតកម្ម និងបសុព្យាបាលខេត្ត ដើម្បីធ្វើការត្រួតពិនិត្យ ហើយក៏រកឃើញថា ដឹកគ្មានច្បាប់អនុញ្ញាតិ និងដឹកគ្មានលក្ខណៈបច្ចេកទេសត្រឹមត្រូវ ខូចគុណភាណ ដែលជាហេតុធ្វើឱ្យបារម្ភមានជំងឺប៉េស្តជ្រូកអាហ្វ្រិក ដែលឈ្មួញលួចនាំចូលតាមច្រករបៀងខុសច្បាប់ពីប្រទេសថៃ ហើយនាំចេញទៅលក់ចែកចាយតាមបណ្តាខេត្ត និងភ្នំពេញ ដែលឈ្មួញយកទៅលក់បន្ត ហើយក្លែងបន្លំជាជ្រូកកណ្តុរសម្រាប់អាំងលក់។
លោក ហ៊ុយ ទូច បានបញ្ជាក់ថា ចំពោះរថយន្ត និងអ្នកបើកបរចំនួន២នាក់ ក្នុងនោះព្រូម្នាក់ ត្រូវបានកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យ ដើម្បីចាត់ការតាមច្បាប់ហើយ ចំណែកកូនជ្រូកក្លាស្សេខូចគុណភាពចំនួន១៦០ក្បាលវិញ ជាការសម្របសម្រួលពីឯឧត្តម កើត សុវណ្ណរ៉េត ព្រះរាជអាជ្ញាងយ្យការអមសាលាដំបូងខេត្តបន្ទាយមានជ័យ ត្រូវបានយកទៅដុតកំទេចចោល ស្របតាមខ្លឹមសារច្បាប់ស្តីពីសុខភាពសត្វ និងផលិតកម្មសត្វ ត្រង់មាត្រា១០៤ ជំពូកទី១៩ នៃច្បាប់ ដែលដុតកប់ចោល៕
ចែករំលែកព័តមាននេះ