ខេត្តពោធិ៍សាត់ ៖ ក្មេងស្រីម្នាក់បានស្លា.ប់ និង០៤នាក់ទៀតរងរបួសធ្ងន់ និងស្រាល ដោយសាររន្ទះបា.ញ់ ខណៈពេលកំពុងអង្គុយមើលទូរទស្សន៍ជុំគ្នានៅក្នុងផ្ទះពេលដែលមេឃកំពុងភ្លៀង។ករណីបាតុភូតធម្មជាតិនេះ
ខេត្តពោធិ៍សាត់ ៖ ក្មេងស្រីម្នាក់បានស្លាប់ និង០៤នាក់ទៀតរងរបួសធ្ងន់ និងស្រាល ដោយសាររន្ទះបាញ់ ខណៈពេលកំពុងអង្គុយមើលទូរទស្សន៍ជុំគ្នានៅក្នុងផ្ទះពេលដែលមេឃកំពុងភ្លៀង។ករណីបាតុភូតធម្មជាតិនេះ បានកើតឡើងកាលពីវេលាម៉ោង១៧និ៣០នាទីល្ងាច ថ្ងៃទី០៩ មេសា ២០១៦ នៅចំណុចវាលស្មៅក្រសាំងភ្នៅ ស្ថិតក្នុងភូមិសំឡាញ ឃុំក្រពើពីរ ស្រុកវាលវែង ខេត្តពោធិ៍សាត់។
លោកវរសេនីយ៍ត្រី ធាង ឡេង អធិការនគរបាលស្រុកវាលវែង ឲ្យដឹងថា នៅល្ងាចនោះនៅស្រុកវាលវែង មានភ្លៀងធ្លាក់តាមតំបន់ និងឃុំមួយចំនួនមិនមែនគ្រប់ដណ្ដប់ទាំងស្រុងនោះទេ ហើយនៅឃុំក្រពើពីរ ក៏ដូចគ្នាដែរ។ ខណៈពេលដែលមេឃកំពុងភ្លៀងរលឹមនោះ កូនម្ចាស់ផ្ទះ និកូនអ្នកជិតខាងដែលរស់នៅក្បែរគ្នាបានបើកទូរទស្សន៍នាំគ្នាមើលរឿង ស្រាប់តែត្រូវរន្ទះកំណាចបាញ់ឆក់យកជីវិតក្មេងស្រីម្នាក់ភ្លាមៗនៅនឹងកន្លែងកើតហេតុ ចំណែក០៤នាក់ទៀតរហែកខោអាវរលាកពេញខ្លួនរបួសធ្ងន់ និងស្រាល។ ជនរងគ្រោះដែលស្លាប់ឈ្មោះឌឿម សុភ័ស្ស ភេទស្រី អាយុ១៣ឆ្នាំ និងរបួស០៤នាក់ទៀត ១-ឈ្មោះឌឿម សុផា ភេទស្រី អាយុ០៧ឆ្នាំ (របួសស្រាល) ២-ឈ្មោះឌឿម ដាវ ភេទស្រី អាយុ០៤ឆ្នាំ (របួសធ្ងន់) ទាំងពីរនាក់ជាប្អូនរបស់ក្មេងស្រីរងគ្រោះដែលស្លាប់។ ៣-ឈ្មោះសៀន ចន្ធី ភេទស្រី អាយុ១៨ឆ្នាំ (របួសស្រាល) និង៤-ឈ្មោះផា ស្រីនិត ភេទស្រី អាយុទើបតែបាន០៨ខែប៉ុណ្ណោះ។
ជនរងគ្រោះដែលរងរបួសធ្ងន់ស្រាលបានបញ្ជូនទៅព្យាបាលនៅមណ្ឌលសុខភាពប្រមោយ ចំណែកជនរងគ្រោះដែលស្លាប់ក្រុមគ្រួសារបានធ្វើបុណ្យតាមប្រពៃណី។ នេះអាចចាត់ទុកថា ជាលើកដំបូងហើយក្នុងឆ្នាំ២០១៦ សម្រាប់ខេត្តពោធិ៍សាត់ ដែលទើបតែចាប់ផ្ដើមមានភ្លៀងមានករណីរន្ទះបាញ់ភ្លាម ខណៈពេលដែលតាមបណ្ដាស្រុកដទៃ ជួបការក្ដៅហែងមិនទាន់មានភ្លៀងធ្លាក់មួយដំណក់ផងនោះ៕
ចែករំលែកព័តមាននេះ