ខេត្តតាកែវ ៖ លោកវរសេនីយ៍ឯក ឆាយ កែវមុន្នី អធិការនគរបាលស្រុកបាទី បានឱ្យដឹងថា កាលពីវេលាម៉ោងប្រមាណ១រំលងអធ្រាត្រឈានចូលថ្ងៃទី១ ខែវិច្ឆិកា ឆ្នាំ២០២១ មានហេតុការណ៍ជនសង្ស័យជិះម៉ូតូដេញកា.ប់ប្លន់យកម៉ូតូ១ករណីនៅតាមផ្លូវជាតិលេខ២ ក្នុងភូមិរុន ឃុំចំបក់ ។ ប៉ុន្តែក្រោយកើតហេតុជនសង្ស័យ៣នាក់និងវត្ថុតាងត្រូវបានបកស្បែក ឯបក្ខពួកម្នាក់ទៀតកំពុងគេចខ្លួន ។
លោកអធិការឲ្យដឹងទៀតថា ក្រុមជនសង្ស័យប្រដាប់ដោយដាវ និងដំបងដែក ជិះម៉ូតូ២គ្រឿង បានដេញកា.ប់ប្លន់ម៉ូតូ១គ្រឿងម៉ាកហុងដាឌ្រីម សេ១២៥ ស៊េរី២០១៤ ឡើងតែមប្រិ៍២០២១ របស់បុរសឈ្មោះ ង៉ែត សារ៉ាន់ អាយុ៣៨ឆ្នាំ មានទីលំនៅក្នុងភូមិរមេញ ឃុំរមេញ ស្រុកកោះអណ្តែត ។ បន្ទាប់ពីបានទទួលព័ត៌មាននេះភ្លាម លោកបានដឹកនាំកម្លាំងសមត្ថកិច្ចចុះទៅកាន់ចំណុចកើតហេតុ និងធ្វើការស្រាវជ្រាវ ។
ក្រោមការដឹកនាំបញ្ជារបស់លោកស្នងការ និងមានការសម្របសម្រួលនីតិវិធីពីសំណាក់ឯកឧត្តម ជីវ ចាន់តារា ព្រះរាជអាជ្ញាអមសាលាដំបូងខេត្តសមត្ថកិច្ចបានប្រើប្រាស់គ្រប់វិធានការ និងសម្ភារពួនស្ទាក់គ្រប់ច្រកល្ហក ហើយរហូតដល់វេលាម៉ោងប្រមាណ៨និង៣០នាទីព្រឹកថ្ងៃដដែល ក៏កំណត់មុខសញ្ញានិងឈានដល់ឃាត់ខ្លួនបានចំនួន៣នាក់ ។
លោកអធិការបញ្ជាក់ថា ជនសង្ស័យទាំង៣នាក់នេះ ត្រូវបានសមត្ថកិច្ចចាប់ខ្លួននៅផ្ទះសំណាក់«មាន មាន» ស្ថិតក្នុងភូមិរុន ឃុំចំបក់ ស្រុកបាទី ដែលមាន ៖ ១-ឈ្មោះ សិលា រ៉ាវុធ ហៅវិត ភេទប្រុស អាយុ២៥ឆ្នាំ រស់នៅភូមិតានប់ ឃុំចំបក់ ស្រុកបាទី ២-ឈ្មោះ ផន បញ្ញា ភេទប្រុស អាយុ២១ឆ្នាំ រស់នៅភូមិត្រពាំងលាន ឃុំចំបក់ និង៣-ឈ្មោះ ឆាន ប៊ុនណា ភេទប្រុស អាយុ១៩ឆ្នាំ រស់នៅភូមិរវៀង ឃុំរវៀង ស្រុកសំរោង។ ចំណែកជនសង្ស័យម្នាក់ទៀតឈ្មោះ សេង សុវណ្ណ ភេទប្រុស អាយុ២៧ឆ្នាំ រស់នៅភូមិស្រមោចហែ ឃុំចំបក់ បានជិះម៉ូតូដែលប្លន់បានរត់គេចខ្លួនបាត់ ។
នៅចំពោះមុខសមត្ថកិច្ច ជនសង្ស័យឆ្លើយថា ពួកគេពិតជាបានធ្វើសកម្មភាពដេញកា.ប់ប្លន់យកម៉ូតូពីជនរងគ្រោះនៅចំណុចខាងលើប្រាកដមែន ។ ជាមួយនឹងការចាប់ឃាត់ខ្លួននេះ សមត្ថកិច្ចក៏បានដកហូតវត្ថុតាងមាន ម៉ូតូជិះធ្វើសកម្មភាពចំនួន២គ្រឿង ដាវ២ និងដំបងដែក១ ។
លោកវរសេនីយ៍ឯក សែម សុជាតិ នាយការិយាល័យនគរបាលព្រហ្មទណ្ទកម្រិតធ្ងន់ខេត្ត បានឱ្យដឹងថា ជនសង្ស័យត្រូវបានកសាងសំណុំរឿងបញ្ជូនទៅសាលាដំបូងខេត្ត នៅថ្ងៃទី២ ខែវិច្ឆិកា ២០២១ និងបន្តស្រាវជ្រាវតាមចាប់ជនសង្ស័យម្នាក់ទៀតដែលកំពុងរត់គេចខ្លួន ៕
ចែករំលែកព័តមាននេះ