អង់គ្លេស ៖ កីឡាករ Cristiano Ronaldo រួម​និង​មិត្ត​ស្រី​គឺ​នាង Georgina Rodriguez បាន​ប្រកាស​ដំណឹង​គួរ​ឱ្យ​ភ្ញាក់ផ្អើល​ដល់​អ្នកគាំទ្រ​នៅ​លើ​បណ្តាញ​ទំនាក់ទំនង​សង្គម ដោយ​ពួក​គេ​ទទួល​បាន​ចំណងដៃ​កូនភ្លោះ​។ ខណៈ​មិត្ត​ស្រី​ខ្សែប្រយុទ្ធ​ក្រុម​បិសាច​ក្រហម Manchester United ត្រូវ​បាន​រាយការណ៍​ថា​កំពុង​មាន​ផ្ទៃពោះ​៣​ខែ​មក​ហើយ​។

កាលពី​ថ្ងៃ​ទី​២៨ ខែតុលា ខ្សែប្រយុទ្ធ​ព័រ​ទុ​យ​ហ្គា​ល់វ័យ​៣៦​ឆ្នាំ និង​មិត្ត​ស្រី​វ័យ​២៧​ឆ្នាំ​បាន​បង្ហោះ​សា​រលើ​បណ្តាញ​សង្គម​របស់​ពួក​គេ​ថា «​ពួក​យើង​រីករាយ​ក្នុង​ការ​ប្រកាស​ថា ពួក​យើង​កំពុង​ទន្ទឹងរង់ចាំ​កូនភ្លោះ​។ បេះដូង​របស់​ពួក​យើង​ពោរពេញ​ដោយ​ក្តី​ស្រឡាញ់​»​។

តាម​ពិត​ទៅ​ដំណឹង​នេះ ត្រូវ​បាន​ទម្លាយ​ដោយ​ទស្សនាវដ្ដី Hola របស់​អេ​ស្ប៉ា​ញ មុន​ពេល​គូស្នេហ៍​មួយគូ​នេះ​បង្ហោះ​សា​រលើ​បណ្តាញ​សង្គម ដើម្បី​ប្រកាស​ជា​ផ្លូវការ​។

ជាមួយ​ការ​ប្រកាស​នេះ មាន​ន័យ​ថា Ronaldo នឹង​ក្លាយជា​ឪពុក​បង្កើតកូន​៦​នាក់ ដោយ​ក្នុង​នោះ​រួម​មានកូន​ប្រុស​ច្បង Cristiano Jr. និង​កូនប្រុស​-​ស្រី​ភ្លោះ​គឺ Eva និង Mateo មាន​អាយុ​៤​ឆ្នាំ ដែល​កើត​ចេញពី​ម្តាយ​មិន​ត្រូវ​បាន​បង្ហាញ​អត្តសញ្ញាណ ដែល​កីឡាករ​រូប​នេះ​ជួល​ដើម្បី​ពពោះ​។ ខណៈ Ronaldo និង Rodriguez មានកូន​ស្រី​ជាមួយ​គ្នា​ម្នាក់​ឈ្មោះ​ថា Alana Martina បច្ចុប្បន្ន​មាន​អាយុ​៣​ឆ្នាំ​៕ (​ដកស្រង់​ចេញពី ESPN និង Marca)